“ຫໍພຣະບາງ” ທີ່ຕັ້ງຢູ່ ວັດອິນແປງ ມະຫາວິຫານ, ເມືອງ ຈັນທະບູລີ, ນະຄອນຫຼວງ ວຽງຈັນ ສ້າງຂຶ້ນໃນສະໄຫມເຈົ້າຟ້າງຸ່ມ ມະຫາຣາຊ ເຊິ່ງຫຼົງເຫຼືອຈາກການຈູດເຜົາ ເມືອງວຽງຈັນ ໃນສະໄໝທີ່ ອານາຈັກລາວລ້ານຊ້າງ ຕົກເປັນປະເທດສະຣາຊ ໃຫ້ແກ່ສະຫຍາມ.
ໃນຕຳນານກ່າວໄວ້ວ່າ ພຣະມະຫາປາສະມັນຕະ ເຖຣະເຈົ້າ ແຫ່ງເມືອງຂະເໝນ ພ້ອມຄະນະຣາຊທູດ ໄດ້ອາຣາດທະນາເອົາພຣະບາງ ຂຶ້ນມາຮອດ ເມືອງວຽງຄຳ (ວຽງຈັນ) ພ້ອມດ້ວຍຄຳພີພຣະໄຕຣປິດົກ ໂດຍໄດ້ມີການມາເຮັດພິທີສະຫຼອງສົມໂພດຢູ່ທີດອນຈັນ (ຫາດດອນຈັນ) ຈົນຄົບ 3 ມື້ 3 ຄືນ ແລ້ວຈຶ່ງແຫ່ຂຶ້ນມາໃນ ເມືອງວຽງຄຳ (ພາຍຫຼັງຈຶ່ງເປັນມາເປັນເມືອງວຽງຈັນ).
ຫຼັງຈາກນັ້ນ, ກໍຈະມີພິທີອາຣາດທະນາຂຶ້ນ ເມືອງຊຽງດົງ-ຊຽງທອງ ໃນເວລາຈະອັນເຊີນຂຶ້ນເມືອ ກໍເກີດເຫດຫາມບໍ່ຂຶ້ນ ເດີມທີ ເຄີຍຫາມ 8 ຄົນ ກໍຫາມບໍ່ຂຶ້ນ, ຕື່ມຄົນໃສ່ 12 ກໍບໍ່ຂຶ້ນ, ຕື່ມຄົນໃສ່ອີກ 16-18 ຄົນ ກໍຫາມບໍ່ຂຶ້ນ, ຈົນໄດ້ເຮັດພິທີສ່ຽງທວາຍ ເບິ່ງວ່າ ຍ້ອນບໍ່ເຖິງເວລາອັນສົມຄວນທີ ພຣະບາງເຈົ້າ ຈະສະເດັດໄປສະຖິດຢູ່ ເມືອງຊຽງດົງ-ຊຽງທອງ (ຫຼວງພຣະບາງ) ເທື່ອ ດັ່ງນັ້ນ, ເພິ່ນຈຶ່ງມີການສ້າງ ຫໍພຣະບາງ ໄວ້ທີ່ ວັດອິນແປງ ແຫ່ງນີ້, ເພື່ອເປັນບ່ອນປະດິດສະຖານອົງພຣະບາງເຈົ້າ. ຫຼັງຈາກ ພຣະບາງ ສະເດັດຂຶ້ນໄປປະດິດສະຖານຢູ່ທີ ເມືອງຊຽງດົງ-ຊຽງທອງ ແລ້ວ ຫໍພຣະບາງ ແຫ່ງນີ້ ກໍໄດ້ນຳໃຊ້ເປັນຫໍພຣະໄຕປິກດົກ ສຶບຕໍ່ມາ.
ພາຍຫຼັງມີການຈູດເຜົາ ເມືອງວຽງຈັນ ແລະ ຖືກປະປອ່ຍໄວ້ເປັນເມືອງຮ້າງຫຼາຍປີ ຫໍພຣະບາງ ແຫ່ງນີ້ ກໍມີການເປ່ເພໄປຕາມ ກົດແຫ່ງກັມ, ຕົກມາຮອດເມື່ອປີ 1960 ຈິ່ງມີການບູຣະນະປະຕິສັງຂອນ ຫໍພຣະບາງແຫ່ງນີ້ ແລະ ມີການສ້າງຫຼັງຄາໃສ່ໃໝ່ ເຊິ່ງບໍ່ເຂົ້າກັບໂຄງສ້າງຂອງ ຫໍພຣະບາງ ຕາມແບບ.
ຂໍ້ມູນຈາກ : Houmphet Manisouk
ທີ່ມາ: ລາວ Temple