ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ພຣະທາດອິງຮັງ ເປັນສິລະປະ ແລະ ສະຖາປັດຕະຍະກຳ ທີ່ສວຍງາມທັງເປັນປູຊະນິຍິສະຖານທີ່ສຳຄັນແຫ່ງໜຶ່ງຢູ່ ສປປ ລາວ ຕັ້ງຢູ່ລະຫວ່າງເສັ້ນທາງ ສະຫວັນ-ເຊໂນ ປະມານ 15 ກິໂລແມັດແຂວງ ສະຫວັນນະເຂດ, ອົງພຣະທາດກວ້າງ ດ້ານລະ 9 ແມັດ ມີລັກສະນະເປັນສີ່ຫຼ່ຽມຫຍໍ້ມູມຄືຫໍຜາສາດ ເປັນພຣະທາດແບບປະສົມວິຫານ ຄືເປັນສະຖານທີ່ປະດິດສະຖານສິ່ງສັກສິດ ເພາະມີປະຕູເຂົ້າອອກໄດ້.

ອົງພະທາດຈັດເປັນ 3 ຖານຫຼຸດຫຼື່ນກັນເປັນລຳດັບຖານລຸ່ມ, ຖານກາງ ເປັນສິລະປະດັ້ງເດີມ, ຖານເທິງ ແລະ ຍອດພຣະທາດເປັນ ສິລະປະສະໄໝລ້ານຊ້າງ. ພຣະທາດອີງຮັງ ເປັນເຈດີບັນຈຸກະດູກ (ອັດຖິ) ສັນຫຼັງຂອງພະພຸດທະເຈົ້າ ເປັນມໍລະດົກຂອງຊາດ, ເປັນພະທາດທີ່ສັກທິດ ແລະ ເປັນທີ່ສັກກາລະບູຊາຂອງຊາວພຸດລາວ.

ບ່ອນສະແດງໂຄສະນາ
ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ພຣະທາດອີງຮັງ ຖືກສ້າງຂຶ້ນໃນປີ ພ.ສ 500 ເຊິ່ງນຳພາໂດຍ ພະເຈົ້າສຸມິດຕະທຳ ຜູ້ປົກຄອງເມືອງມະຣຸກຂະນະຄອນ (ອານາຈັກສີໂຄດຕະບູນ) ເພື່ອເປັນອະນຸສອນວ່າຄັ້ງໜຶ່ງ ພະພຸດທະເຈົ້າໄດ້ສະເດັດມາໂພດສັດໃນດິນແດນສຸວັນນະພູມ ແລະ ໄດ້ນັ່ງສັນເຂົ້າອີງຕົ້ນ ຈຶ່ງໄດ້ຊື່ວ່າ “ພຣະທາດອີງຮັງ”.

ໃນປີ 1548 ພະເຈົ້າໄຊຍະເສດຖາທິລາດ ແຫ່ງອານາຈັກລ້ານຊ້າງ ໄດ້ນຳພາປະຕິສັງຂອນໃຫ້ເປັນແບບສິລະປະລ້ານຊ້າງ ໂດຍກວ້າງ 9 ແມັດ ແລະ ສູງ 25 ແມັດ, ເຊິ່ງຍອດພຣະທາດມີລັກສະນະຄືກັບດອກບົວຈູມ.

ພຣະທາດອີງຮັງ ຫຼື ຄົນທົ່ວໄປມັກເອີ້ນວ່າ “ອິນຮັງ” ເປັນປູຊະນິຍະສະຖານເກົ່າແກ່ທີ່ສັກສິດ ແລະ ສຳຄັນ ເປັນທີ່ເຊີດໜ້າຊູຕາທາງວັດທະນະທຳຂອງແຂວງ ສະຫວັນນະເຂດ ພຣະທາດອົງນີ້ຖືກສະຫຼັກດ້ວຍລວດລາຍສິລະປະກຳສະໄໝບູຮານ ແລະ ຮັກສາໄວ້ ໂດຍບໍ່ຖືກທຳລາຍຈາກອຳນາດ ຫຼື ອິດທິພົນໃດຈັກເທື່ອ ນອກຈາກການເວລາເທົ່ານັ້ນ ແຕ່ກໍຖືກປະຕິສັງຂອນມາແລ້ວຫຼາຍຄັ້ງ.

ພຣະທາດນີ້ ຖືກສ້າງສະໄໝອານາຈັກສີໂຄດຕະບອງ (ປະມານສະຕະວັດທີ 6) ໂດຍພຣະເຈົ້າສຸມິນທະຣາຊ ຣາຊາແຫ່ງອານາຈັກສີໂຄດຕະບອງ ຊຶ່ງຖືກວາງຮາກຖານຈາກການແນະນຳຂອງພຣະເຖຣະ (ຄູບາອາຈານ) ຊາວອິນເດຍເພື່ອເປັນເຄື່ອງໝາຍເຖິງການສະເດັຈປະລິນິພານຂອງພຣະພຸດທະເຈົ້າທີ່ປ່າໄມ້ຮັງ ເມືອງກຸລິນາຣາຍ ປະເທດອິນເດຍເມື່ອສ້າງສຳເລັດ ເພິ່ນໄດ້ນຳເອົາກະດູກພຣະພຸດທະເຈົ້າມາໃສ່ໄວ້ ແຕ່ໜັງສືອຸລັງຄະທາດກ່າວວ່າ ສ້າງຂຶ້ນເພື່ອເປັນເຄື່ອງໝາຍສະຖານທີ່ບ່ອນນັ່ງຂອງພຣະພຸດທະເຈົ້າຄາວເພິ່ນມາຢ້ຽມຢາມພຣະຍາສີໂຄດຕະບອງ ແຕ່ຄວາມຈິງຄົງຈະມີຈຸດປະສົງເພື່ອໃຫ້ປະຊາຊົນເຫັນຄວາມສຳຄັນຂອງພຣະທາດອົງນີ້.

ໃນລະຫວ່າງຂະເໝນມີອຳນາດພຣະທາດອົງນີ້ ຖືກດັດແປງໃຫ້ເປັນເທວະສະຖານຂອງຊາວຮີນດູ ແລະ ໄດ້ເສີມສ້າງຕໍ່ຂຶ້ນໄປຕື່ມ ຊຶ່ງລິງລາຍຕົບແຕ່ງອອກມາໃນລັກສະນະຂອງຮີນດູ ໂດຍສະເພາະເລື່ອງເມຖຸນສັງວາດ ແລະອື່ນໆ ຈາກນັ້ນພຣະທາດອິງຮັງ ກໍ່ຕົກຢູ່ໃຕ້ອິດທິພົນຂອງຜູ້ສືບຣາຊະການສະໄໝຕ່າງໆ.

ທີ່ມາ: ລາວ Temple 

ຂໍຂອບໃຈຂໍ້ມູນ ແລະ ຮູບພາບຈາກ : ພຣະອາຈານ ດາວສະເດັດ ເລີດມະນີ

Hits: 16

LEAVE A REPLY

ກະລຸນາໃສ່ຄໍາເຫັນຂອງທ່ານ!
ກະລຸນາໃສ່ຊື່ຂອງທ່ານທີ່ນີ້