ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ແຂວງ ຄຳມ່ວນ ເປັນອີກແຂວງໜຶ່ງທີ່ມີແຫຼ່ງທ່ອງທ່ຽວທີ່ສຳຄັນຫຼາກຫຼາຍແຫ່ງ ທັງແຫຼ່ງທ່ອງທ່ຽວທາງທຳມະຊາດ, ປະຫວັດສາດ ແລະ ວັດທະນະທຳ ທີ່ສາມາດດຶງດູດນັກທ່ອງທ່ຽວພາຍໃນ ແລະ ຕ່າງປະເທດ ມາທ່ຽວຊົມ, ເຊິ່ງຕໍ່ໄປນີ້ແມ່ນສະຖານທີ່ທ່ອງທ່ຽວທີ່ສຳຄັນຂອງແຂວງ ຄຳມ່ວນ ທີ່ທ່ານຕ້ອງຫາໂອກາດໄປທ່ຽວຊົມໃຫ້ໄດ້.

ພຣະທາດສີໂຄດຕະບອງ

ພຣະທາດ​ສີ​ໂຄດ​ຕະບອງ (ທາດເມືອງເກົ່າ)​ ຕັ້ງ​ຢູ່ບ້ານ​ ມ່ວງສຸມ, ເມືອງ ທ່າແຂກ ຕາມ​ທາງ​ ເລກທີ 11 ​ໃຕ້, ຫ່າງ​ຈາກ​ຕົວເມືອງ ​ທ່າ​ແຂກ ໄປທາງທິດໃຕ້ 6 ກິ​​ໂລ​ແມັດ, ທິດຕາເວັນຕົກຂອງທາດ ຕິດກັບແຄມຝັ່ງແມ່ນຳ້ ເຊິ່ງບໍລິເວນນີ້ ເຄີຍເປັນໃຈກາງ ຂອງອະດີດເມືອງຫຼວງ ທີ່ເກົ່າແກ່ຂອງອານາຈັກລ້ານຊ້າງ.

ພະທາດອົງນີ້ ກໍ່ດ້ວຍດິນຈີ່ທາປູນ, ຖານເປັນຮູບສີ່ຫຼ່ຽມແບບດວງປີ ຍອດແຫຼມ. ການກໍ່ສ້າງພຣະທາດສີໂຄດ ແມ່ນຢູ່ໃນສະໄໝດຽວກັນກັບ ພຣະທາດພຣະນົມ, ພຣະທາດຫຼວງ, ພຣະທາດອີງຮັງ ແລະ ທາດບັງພວນ ເຊິ່ງສະກຸນຊ່າງ ສິລະປະກໍ່ສ້າງ ຂອງລາວລ້ານຊ້າງ.

ບ່ອນສະແດງໂຄສະນາ
ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ຖານແຕ່ລະດ້ານຂອງ ພຣະທາດສີໂຄດຕະບອງຍາວ 14,33 ແມັດ, ສູງ 28,89 ແມັດ, ບໍລິເວນຕີນພຣະທາດ ກວ້າງດ້ານລະ 25 ແມັດ, ສູງ 30 ແມັດ, ຍອດທາດປະດັບດ້ວຍ ເກດຕະສັດ 7 ຊັ້ນ ໃນແກນເປັນເຫຼັກເກດຕະສັດ ເຮັດດ້ວນເງິນ ແລະ ຄຳ, ປາຍເກດຕະສັດ ມີໂຄມແກ້ວ (ປັດຈຸບັນບໍ່ມີ), ສະເພາະເກດຕະສັດສູງ 2 ແມັດ).

ປັດຈຸບັນ, ພຣະທາດສີໂຄດຕະບອງ (ທາດເມືອງເກົ່າ) ເປັນປູສະນີຍະສະຖານ ແລະ ໄດ້ກາຍເປັນສັນຍະລັກຂອງ ແຂວງ ຄຳມ່ວນ. ໃນທຸກໆປີ ຈະມີມະໂຫລານງານບຸນສະເຫຼີມສະຫຼອງ ອົງພຣະທາດ ຫຼື ຄົນທ້ອງຖິ່ນເອີ້ນວ່າ ບຸນທາດເມືອງເກົ່າ, ຈັດຂຶ້ນໃນ ເດືອນ ສາມເພັງ (ປະມານກາງໆເດືອນ ກຸມພາ ຂອງທຸກປີ).

ຖຳ້ກອງລໍ:

​ເປັນ​ແຫຼ່ງທ່ອງ​ທ່ຽວ​ທຳ​ມະ​ຊາດ ທີ່ມີຊື່ສຽງລະດັບແນວໜ້າຂອງໂລກ ຍ້ອນວ່າ ມີຄວາມມະຫັດສະຈັນ, ຖຳ້ນີ້ ມີແມ່ນຳ້ຫີນບູນໄຫຼລອດ ໂດຍສາມາດໃຊ້ເຮືອຫາງເດີນທາງລອດຖຳ້ໄດ້ຕະຫຼອດປີ (ຈະມີອຸປະສັກກໍບາງໄລຍະ ໃນລະດູຝົນ). ຖຳ້ກອງລໍຕັ້ງຢູ່ລະຫວ່າງ ບ້ານ ນາຕານ, ເມືອງ ນາກາຍ ແລະ ບ້ານ ກອງລໍ, ເມືອງຄູນຄຳ ໂດຍຫ່າງຈາກ ເມືອງ ຄູນຄຳ ໄປທາງທິດຕາເວັນອອກສ່ຽງໃຕ້ 46 ກິໂລແມັດ. ຖ້າເດີນທາງຈາກຕົວ ເມືອງ ທ່າແຂກ ແມ່ນໄປຕາມເສັ້ນທາງເລກທີ 13 ມຸ່ງໜ້າໄປສູ່ ນະຄອນຫຼວງວຽງຈັນ ແລ້ວລ້ຽວຂວາ ໄປຕາມທາງເລກ 8 ຢູ່ບ້ານ ວຽງທອງ ໄປຮອດ ບ້ານ ຄູນຄຳ ດ້ວຍໄລຍະທາງທັງໝົດ 137 ກິໂລແມັດ.

ຖຳ້ກອງລໍ ມີຄວາມຍາວ 7,500 ແມັດ, ຄວາມກວ້າງພາຍໃນຖຳ້ ຢູ່ລະຫວ່າງ 30-150 ແມັດ ແລະ ສູງລະຫວ່າງ 20-100 ແມັດ. ຖຳ້ກອງລໍ ມີຄວາມງົດງາມ ແລະ ມີສະເໜ່ດຶງດູດທີ່ສຸດ ເພາະວ່າ ພາຍໃນຖຳ້ຈະມີ ແກ້ງ, ຫີນຍ້ອຍ, ຫາດຊາຍ ອີກດ້ວຍ. ນັກທ່ອງທ່ຽວ ສາມາດຂີ່ເຮືອລອດຜ່ານເຂົ້າໄປໃນຖຳ້ໄດ້ຕະຫຼອດ, ແຕ່ລະດູແລ້ງຈະເໝາະສົມທີ່ສຸດ ເພື່ອຊົມຮູບໂສມສີສັນຂອງຖຳ້ ໂດຍການຂີ່ເຮືອເຂົ້າໄປພາຍໃນຖຳ້ ແລ້ວລົງຈາກເຮືອແວ່ທ່ຽວຊົມທິວທັດ ແລະ ຍ່າງເລາະຫຼິ້ນຕາມຫາດຊາຍ, ຈະສຳຜັດໄດ້ກັບຄວາມຕື່ນເຕັ້ນໃນຄວາມມືດຂອງຖຳ້, ອາກາດທີ່ເຢັນຂອງອາຍນຳ້ ແລະ ສາຍລົມ.

ຖຳ້ນຳ້ລອດເຊບັ້ງໄຟ

ຕັ້ງຢູ່ທາງທິດຕາເວັນຕົກສ່ຽງເໝືອຂອງ ປ່າສະຫງວນແຫ່ງຊາດ ພູຫີນໜາມໜໍ່ ເຊິ່ງກວມເອົາເນື້ອທີ່ທັງໜົດ 10,430 ເຮັກຕາ ແລະ ຕິດກັບ 3 ບ້ານ ຄື: ບ້ານ ຫຍ້າແວດ, ບ້ານ ໜອງປີງ ແລະ ບ້ານ ກວນຄະໂຍມ. ຄວາມຍາວຂອງຖຳ້ ແມ່ນ 11,5 ກມ. ການເດີນທາງ ແມ່ນ​ໄປ​ຕາມ​ເສັ້ນທາງເລກທີ 12 ເມືອງ ມະຫາໄຊ ແລ້ວລ້ຽວຂວາໄປສູ່ຖຳ້ນຳ້ລອດເຊບັ້ງເຊບັ້ງໄຟ ທີ່ເມືອງ ບົວລະພາ , ຫ່າງຈາກຫ້ອງການປົກຄອງເມືອງ ປະມານ 14 ກິໂລແມັດ.

ໃນປີ 1995 ໄດ້ມີນັກສຳຫຼວດຊາວຝຣັ່ງ ລ່ອງແພໄມ້ໄຜ່ ເຂົ້າໄປສຳຫຼວດຖຳ້ນີ້ເປັນເທື່ອອິດ, ເມື່ອກ່ອນຊາວບ້ານໄດ້ເອີ້ນຖຳ້ແຫ່ງນີ້ວ່າ: ຖຳ້ຂຸນເຊ (ຍ້ອນວ່າ ແມ່ນຍອດຂອງນຳ້ເຊບັ້ງໄຟ ໄຫຼອອກ). ຈາກນັ້ນມາ ທີມງາມສໍາຫຼວດຈາກ ຝຣັ່ງ ໄດ້ເຂົ້າມາສໍາຫຼວດອີກ ແຕ່ກໍ່ເກັບກໍາຂໍ້ມູນໄດ້ພຽງເລັກນ້ອຍ. ໃນປີ 2006 ທ່ານ ຈອນໂພແລກ, ຜູ້ຊ່ຽວຊານກ່ຽວກັບຖຳ້ໄດ້ນໍາທີມງານສໍາຫຼວດຄືນໃໝ່,   ປີ 2008 ທ່ານ ຈອນໂພແລກ ກໍໄດ້ນໍາພານັກວິໄຈຈາກ ການດານາ ເຂົ້າຮ່ວມສຳຫຼວດນຳອີກ 4 ທ່ານ, ຈາກ ອາເມຣິການ 4 ທ່ານ. ມີຜູ້ຊ່ວຍຄົນລາວ ແລະ ພະນັກງານນຳທາງອີກຈຳນວນໜຶ່ງ.

ຖຳ້ແຫ່ງນີ້ ເປັນຖຳ້ນຳ້ໄຫຼລອດ ມີຫ້ອງທີ່ໃຫຍ່ໂຕມະໂຫລານ ແລະ ມີຄວາມງົດງາມໜ້າປະທັບໃຈ. ນັກສຳຫຼວດຖຳ້ ໄດ້ໃສ່ຊື່ຫ້ອງ​ດັ່ງກ່າວ​ວ່າ ຫໍວິຫານໃຫຍ່. ພາຍໃນຖຳ້ ໄດ້ມີການຕົບແຕ່ງຈາກທໍາມະຊາດຢ່າງງົດງາມ ເປັນຕົ້ນແມ່ນ ຫີນງອກ ຫີນຍ້ອຍ ທີ່ມີຂະໜາດໃຫຍ່-ນ້ອຍ ແຕກຕ່າງກັນ ທີ່ເກີດຈາກການສະສົມຂອງທາດຫີນປູນ, ບາງບ່ອນກໍເປັນອ່າງນຳ້ຫີນປູນ ທີ່ເປັນຊັ້ນໆ ຕາມລຳດັບຄືຈິດຕະກອນເອກ ເປັນຜູ້ສ້າງ, ບາງ​ບ່ອນ​ກໍ​ເປັນ​ຫີນ​ຊາຍ​ທີ່​ເປັນ​ຮູ​ບໜ່ວຍ​ໄຂ, ຄ້າຍຄືໝາກຂຽບ ຫຼື ກ້ອນເຂົ້າຈີ່ ​ຢັ່ງຢາຍ​ຢູ່​ຢ່າງ​ຫຼວງຫຼາຍ.

ຖຳ້ພະ ໜອງປາຝາ:

ຫ່າງຈາກຕົວເມືອງ ທ່າແຂກ ໄປທາງທິດຕາເວັ້ນອອກສ່ຽງເໜືອ 14 ກິໂລແມັດ, ຕັ້ງຢູ່ທິດຕາເວັນຕົກຂອງ ບ້ານ ນາຂ້າງຊ້າງ. ໃນຖຳ້ແຫ່ງນີ້ ມີພຣະພຸດທະຮູບ 229 ອົງ ອາຍຸເກົ່າແກ່ກວ່າ 600 ປີ, ເປັນຖຳ້ສອງຊັ້ນ (ຊັ້ນລຸ່ມເປັນຖຳ້ນຳ້, ຊັ້ນເທິງເປັນຖຳ້ແຫ້ງ ທີ່ເຂົ້າ-ອອກ ໄດ້ທາງດຽວ). ຢູ່ໜ້າຖຳ້ ມີໜອງປາຝາ ທີ່ງົດງາມເຊື່ອມຕໍ່ກັບໜອງເທົາ, ສະນັ້ນ ເພິ່ນຈຶ່ງໃສ່ຊື່ວ່າ ຖຳ້ພະ-ໜອງປາຝາ.

ຢູ່ຊັ້ນເທິງຂອງຖຳ້ມີ ພຣະພຸດທະຮູບຂະໜາດນ້ອຍ-ໃຫຍ່ ທີ່ເກົ່າແກ່ປະດິດສະຖານຢູ່ ຕາມພັກຄ້າຍຄືຂັ້ນໄດ. ສ່ວນຖຳ້ດ້ານລຸ່ມ ມີສາຍນຳ້ຈາກໜອງປາຝາ ໄຫຼຜ່ານທະລຸເຂົ້າໄປໃນຖຳ້. ຖຳ້ທັງສອງນີ້ ມີຄວາມຍາວປະມານ 200 ແມັດ, ເປັນຖຳ້ທີ່ມີຄວາມງົດງາມໄປດ້ວຍຫີນຍ້ອຍຫຼາຍຂະໜາດ ແລະ ຮູບຮ່າງແຕກຕ່າງກັນ ຢັ່ງຢາຍກັນຢູ່ເປັນຍ່ານ. ໃກ້ໆຖຳ້ແຫ່ງນີ້ ຍັງມີແຫຼ່ງທ່ອງທ່ຽວອື່ນອີກ ເຊັ່ນ ຖຳ້ປາເຊືອມ, ໜອງເທົ່າ, ຫ້ວຍນຳ້ໄສ…

ທ່າຝຣັ່ງ ຫຼື ວັງສັນຕິພາບ

ຕັ້ງ​ຢູ່​ລະຫວ່າງ ບ້ານ ສອງຄອນ ກັບ ບ້ານ ທອກ, ​ໄປ​ຕາມ​​ເສັ້ນທາງ​ເລກທີ 12 ​ຫາ​ເມືອງ​ ມະຫາ​ໄຊ, ຫ່າງຈາກເມືອງ ທ່າແຂກ 14 ກິ​ໂລ​ແມັດ. ມັນເປັນສາຍນຳ້ໂດນ ທີ່​ເປັນວັງສວຍ​ງາມ ​ມີນຳ້ໃສ ​ເຊິ່ງອ້ອມ​ຮອບ​ດ້ວຍ​ຜາ​ຫີນ ​ແລະ ປ່າ​ໄມ້.

ທ່າຝຣັ່ງ ຖືກເອີ້ນຕາມ ຊາວບ້ານທີ່ເລີ່ມແຕ່ສະໄໝຝຣັ່ງປົກຄອງລາວ ເພາະວ່າ ວັງນຳ້ນີ້ຄົນຝຣັ່ງ ມັກພາຄອບຄົວໄປພັກຜ່ອນ ແລະ ອາບນຳ້. ບໍລິເວນນີ້ ເປັນວັງນຳ້ເລີກ, ບາງບ່ອນເລີກ 5 ​ແມັດ (ຍາມແລ້ງ).

ບໍລິເວນທ່າຝລັ່ງ ຍັງມີຮ່ອງຮອຍ ທີ່ສະແດງເຖິງຄວາມຮຸ່ງເຮືອງ, ເປັນບ່ອນທີ່ມີຜູ້ຄົນອາໄສຢູ່ຢ່າງຫຼວງຫຼາຍ ເຊັ່ນ: ຍັງເຫັນສະຖານທີ່ ທີ່ເຄີຍໃຊ້ເປັນບ່ອນຕົ້ມປູນຂາວ ແລະ ຍັງມີຄວາມສົມບູນ.

ປັດຈຸບັນ ທ່າຝຣັ່ງ, ທາງແຂວງໄດ້ອະນຸຍາດໃຫ້ ບໍລິສັດສ່ວນບຸກຄົນ ເຂົ້າມາພັດທະນາ ເຊິ່ງຖືວ່າ ເປັນອີກສະຖານທີ່ທ່ອງທ່ຽວແຫ່ງໜຶ່ງ ທີ່ເປັນຈຸດດຶງດູດນັກທ່ອງທ່ຽວ ໃຫ້ເຂົ້າມາທ່ອງທ່ຽວໃນແຂວງ ຄຳມ່ວນ ນັບມື້ນັບຫຼາຍຂຶ້ນ.

ຂຸນກອງແລງ

ຕັ້ງຢູ່ບ້ານ ນາຄື, ເມືອງ ຫີນບູນ, ເດີນທາງ​ຕາມ​ເສັ້ນທາງເລກ 13 ​ໃຕ້, ຫ່າງຈາກຕົວເມືອງ ຫີນບູນ 20 ກິ​ໂລ​ແມັດ ແລະ ຈາກຕົວເມືອງ ທ່າແຂກ ໄປທາງທິດຕາເວັນອອກສ່ຽງເໜືອ 50 ກິໂລແມັດ. ມັນເປັນບ່ອນກຳເນີດ ສາຍນຳ້ກອງແລງ ເຊິ່ງເປັນສາຂາຂອງ ນຳ້ຄອນແກ້ວ ແລ້ວໄຫຼລົງສູ່ນຳ້ປະກັນ, ເປັນວັງນຳ້ສີຟ້າເຂັ້ມ, ກວ້າງປະມານ 80-100 ​ແມັດ, ເລີກປະມານ 27 ​ແມັດ. ນຳ້​ໃນ​ຂຸນ​ກອງ​ແລງ ໃນ​ປີ​ໜຶ່ງຈະ​ປ່ຽນ​ເປັນ 3 ສີ​ ຕາມລະດູການ ຄື: ສີຂຽວ​ມໍ​ລະ​ກົດ, ​ສີແດງຂຸ້ນ ​ແລະ ສີ​ຟ້າ​ໃສ. ລັກສະນະຂອງຂຸນນຳ້ກອງແລງ ເປັນວົງຮູບໜ່ວຍມົນຄືກັບກອກຢາສູບ, ພື້ນລຸ່ມນຳ້ ມີແປວນຳ້ຢູ່ 1 ແປວ (ສະເພາະບ່ອນທີ່ນັກສຳຫຼວດສາມາດເຂົ້າໄດ້),  ອ້ອມຮອບວົງນີ້ ເຕັມໄປດ້ວຍຕົ້ນຂະມ້າ.

ປັດຈຸບັນ, ຂຸນກອງແລງ ແມ່ນໄດ້ໂຈະການໃຫ້ເຂົ້າທ່ຽວຊົມ ເພາະວ່າ ບໍລິສັດ ອິນທຣາ ຄໍປໍເລຊັນ ຈຳກັດ ຜູ້ດຽວ ທີ່ໄດ້ຮັບການອະນຸຍາດຈາກແຂວງ ກຳລັງພັດທະນາໃຫ້ເປັນແຫຼ່ງທ່ອງທ່ຽວ ທີ່ມີກິດຈະກຳທາງດ້ານການທ່ອງທ່ຽວຫຼາກຫຼາຍ. ປັດຈຸບັນ ໂຄງການດັ່ງກ່າວ ສຳເລັດໄປແລ້ວ 70%, ຄາດວ່າ ຈະເປີດບໍລິການໃນເດືອນ ເມສາ 2020.

ຈຸດຊົມວິວພູຜາມ່ານ (The Rock ViewPiont)

ຕັ້ງຢູ່ແຄມທາງເລກ 8, ຂຶ້ນກັບບ້ານ ຄູນເງິນ-ຄູນຄຳ (ລະຫວ່າງກາງຂອງສອງບ້ານ), ເມືອງ ຄູນຄຳ, ທາງຫ່າງຈາກເມືອງ ທ່າແຂກ 122 ກິ​ໂລ​ແມັດ ແລະ ຫ່າງ​ຈາກ​ຕົວ​ເມືອງ ຄູນຄຳ 15 ກິ​ໂລ​ແມັດ ດ້ວຍ​ທາງ​ປູ​ຢາງ. ​ປະ​ຊາ​ຊົນ​ຢູ່​ໃນ​ເຂດບ້ານ ​ຄູນເງິນ-ຄູນຄຳ ແລະ ຜູ້ຄົນເດີນທາງສາຍນີ້ ມັກຢຸດພັກຜ່ອນ ແລະ ພັກກິນເຂົ້າທ່ຽງຢູ່ ສາລາຊົມວິວດັ່ງກ່າວ.

ທີ່ຈຸດຊົມວິວພູຜາມ່ານ ​ມີ​ຄວາມ​ອຸດົມສົມບູນ​ທາງ​ດ້ານ​ທັດສະນີຍະພາບທຳ​ມະ​ຊາດ ທີ່ເປັນເອກະລັກ ແລະ ຫາຊົມໄດ້ຍາກ ນັ້ນກໍຄື ມີຫີນໜາມໜໍ່ ທີ່ກວ້າງຂວາງສຸດສາຍຕາ, ຫີນໜາມໜໍ່ທີ່ແຫຼມຄົມເຫຼົ່ານັ້ນ ເກີດຂຶ້ນເອງຕາມທຳມະຊາດ, ມັນນອນຢູ່ໃນເຂດປ່າສະຫງວນແຫ່ງຊາດພູຫີນປູນ. ຢູ່ເຂດນີ້ ຍັງມີສັດປ່າຫຼາກຫຼາຍ​ຊະນິດ ຕາມລະບົບນິເວດວິທະຍາ.

ປັດຈຸບັນ, ບໍລິສັດ ກຣີນດີສໂຄເວີຣີ່ ທີ່ໄດ້ຮັບການອະນຸຍາດຈາກແຂວງ ເຂົ້າໄປພັດທະນາໃຫ້ເປັນແຫຼ່ງທ່ອງທ່ຽວ ທີ່ມີກິດຈະກຳ ຫຼາຍຢ່າງ ເຊັ່ນ ການຂີ່ສະລິງ, ໄຕ່ຂົວເຫຼັກກາງອາກາດ, ປີນຜາ, ໄຕ່ຂົວອູ່…

ທ່າລັ່ງ

ບ້ານດອນຈະເລີນ ເຂດທ່າລັ່ງ ຫຼື ທ່າລັ່ງ ຂຶ້ນກັບເມືອງ ນາກາຍ, ຫ່າງຈາກເມືອງ​ ທ່າ​ແຂກ 99 ກິ​ໂລ​ແມັດ ແລະ ຫ່າງ​ຈາກ​ເທດ​ສະ​ບານ​ເມືອງ ນາກາຍ 22 ກິ​ໂລ​ແມັດ, ເປັນ​ເສັ້ນ​ທາງ​ປູ​ຢາງຢ່າງດີ, ແຕ່ວ່າເສັ້ນທາງພາຍໃນບ້ານ ແມ່ນເປັນທາງດິນແດງ.

ສະ​ພາບ​ແວດ​ລ້ອມທຳມະຊາດບໍ​ລິ​ເວນ​ໃກ້​ຄຽງ ແມ່ນມີ​ຍັງ​ມີຄວາມອຸດົມສົມບູນ, ມີພືດພັນທັນຍາຫານຫຼາກ​ຫຼາຍ, ມີສັດປ່ານາໆ ຊະນິດ ທີ່ອາໄສຢູ່ຕາມ​ປ່າບໍ​ລິ​ເວນ​ໃກ້​ຄຽງ ເຊັ່ນ: ກະ​ຮອກ, ເຈຍ, ນົກ ແລະ ສັດ​ໃຫ​ຍ່​ຈຳ​ນວນ​ໜຶ່ງ. ນອກນີ້, ​ທ່າ​ລັ່ງ ​ເປັນ​ເຂດໜຶ່ງ​ທີ່​ຢູ່​ໃນ​ເຂດຄຸ້ມຄອງ ​ຂອງ​ໂຄງການເຄື່ອນ​ໄຟ​ຟ້າ​ນຳ້​ເທີນ 2 ແລະ ເປັນ​ເຂດ​ທີ່​ມີ​ພູມ​ສັນ​ຖານ​ສູງ. ​ເຂດ​ນີ້ ແມ່ນ​ມີ​ອາ​ກາດ​ຊົດ​ຊື່ນ ແລະ ເຢັນ​ດີ ເໝາະແກ່ການມາພັກຜ່ອນ, ຈັດກິດຈະກຳຕ່າງໆ ເຊັ່ນ ​ລົງ​ຫຼິ້ນ​ນຳ້, ຫາ​ປາ ແລະ ອື່ນໆ.

ທ່າລັ່ງ ມີຂົວຂ້າມນຳ້ເທີນ ທີ່ເຊື່ອມຕໍ່ຕາມເສັ້ນທາງເລກທີ່ 1E ອອກໄປສູ່ເມືອງ ຄຳເກີດ, ແຂວງ ບໍລິຄຳໄຊ. ໄລຍະຫຼັງໆມານີ້ ນັກທ່ອງທ່ຽວໄດ້ພາກັນໄປທ່ຽວທ່າລັ່ງນັບມື້ຫຼາຍຂຶ້ນ. ຢູ່ທີ່ນີ້ ມີໂຮມສະເຕ 10 ຫຼັງຄາເຮືອນ, ເຮືອນພັກ 2 ຫຼັງ, ຮ້ານອາຫານ 3 ແຫ່ງ, ມີເຮືອບໍລິການນຳທ່ຽວ 10 ລຳ, ຮ້ານຂາຍເຄື່ອງຍ່ອຍ 7 ຮ້ານ, ແລະ ມີກຸ່ມຜະລິດ ແລະ ຈຳໜ່າຍອາຫານ ທີ່ເຮັດມາຈາກປາ.

ນອກຈາກ ແຫຼ່ງທ່ອງທ່ຽວທີ່ກ່າວມານີ້ແລ້ວ ແຂວງ ຄຳມ່ວນ ຍັງມີສະຖານທີ່ທ່ອງທ່ຽວ ທີ່ໜ້າສົນໃຈອີກຫຼາຍແຫ່ງ ເຊິ່ງມີຈຸດທີ່ສາມາດພັດທະນາ ໃຫ້ເປັນແຫຼ່ງທ່ອງທ່ຽວ​​ໄດ້ຫຼາຍເຖິງ​ 207 ແຫ່ງ. ໃນນີ້, ແຫຼ່ງທ່ອງທ່ຽວ ດ້ານທຳມະຊາດ 143 ແຫ່ງ, ດ້ານປະຫວັດສາດ 31 ແຫ່ງ ແລະ ວັດທະນະທຳ 33 ແຫ່ງ.

Hits: 18

LEAVE A REPLY

ກະລຸນາໃສ່ຄໍາເຫັນຂອງທ່ານ!
ກະລຸນາໃສ່ຊື່ຂອງທ່ານທີ່ນີ້