ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ການເຮັດວຽກແຕ່ລະບ່ອນ ຍ່ອມມີຄວາມກົດດັນເປັນທຳມະດາ ບາງຄົນເກີດຄວາມກົດດັນຫຼາຍ ຄວາມຢາກຮ້າຍກໍລະເບີດອອກມາ ເຊິ່ງມັນອາດບໍ່ເປັນຜົນດີກັບເຮົາເອງ ໂດຍສະເພາະຢູ່ໃນບ່ອນທີ່ເຮົາເຮັດວຽກຢູ່, ສະນັ້ນ ເຮົາມີວິທີ ທີ່ສາມາດຄວບຄຸມຄວາມໃຈຮ້າຍຂອງເຮົາໄດ້ໃນຫ້ອງການ.

ພາບປະກອບ
  1. ຫາຍໃຈເຂົ້າເລິກໆ: ເຖິງວ່າສັນຊາດຕະຍານ ອາດເຮັດໃຫ້ທ່ານຢາກຈະເວົ້າສິ່ງໃດນຶ່ງອອກມາໃນເວລາໃຈຮ້າຍ ທ່ານກໍຄວນຈະຢຸດຄຳເວົ້າຂອງທ່ານໄວ້ກ່ອນ ແລ້ວຫາຍໃຈເຂົ້າເລິກໆ ແລະລອງນັບ 1-10 ເບິ່ງ ມັນອາດຈະບໍ່ໄດ້ຊ່ວຍໃຫ້ຄວາມຄຽດຫາຍໄປ, ແຕ່ມັນກໍຍັງຊ່ວຍຢືດເວລາໃຫ້ທ່ານໄດ້ລອງກັບໄປນຶ່ງກ້າວ ເພື່ອພິຈາລະນາສິ່ງທີ່ເກີດຂຶ້ນ ແລະຫ້າມໂຕເອງບໍ່ໃຫ້ເວົ້າສິ່ງໃດ ທີ່ອາດເຮັດໃຫ້ໂຕເອງຮູ້ສຶກເສຍໃຈພາຍຫຼັງ.
  2. ຂຽນລະບາຍ: ບາງຄັ້ງວິທີທີ່ສາມາດຫຼຸດອາລົມຮ້າຍແຮງໄດ້ ກໍຄື ການລະບາຍຄວາມຮູ້ສຶກນັ້ນອອກມາເປັນໂຕໜັງສື ໂດຍຈັບເອົາປຶ້ມ ຫຼື ເຈ້ຍກັບບິກ ແລ້ວຂຽນສິ່ງທີ່ຢູ່ໃນຄວາມຄິດຂອງທ່ານອອກມາ ແລ້ວເກັບມັນໄວ້ຢູ່ໃນກັບ, ແຕ່ຢ່າເອົາສິ່ງທີ່ທ່ານຂຽນໄວ້ໄປໃຫ້ໃຜອ່ານເດັດຂາດ. ເມື່ອທ່ານໄດ້ລະບາຍສິ່ງນັ້ນໆອອກມາແລ້ວ ກໍໃຫ້ທຳລາຍຫຼັກຖານເຫຼົ່ານັ້ນສາ.
  3. ລະບາຍກັບເພື່ອນຮ່ວມງານທີ່ໄວ້ໃຈໄດ້: ເກືອບທຸກຄົນມັກຈະມີເພື່ອນຮ່ວມງານທີ່ເຮົາສະໜິດທີ່ສຸດ ຄົນທີ່ເຮົາສາມາດໄວ້ໃຈທີ່ຈະບອກບັນຫາຕ່າງໆ ທີ່ກ່ຽວກັບເລື່ອງວຽກໄດ້, ການໂອ້ລົມປຶກສາກັບຄົນທີ່ຮູ້ຈັກ ແລະເຂົ້າໃຈວັດທະນະທຳຂອງອົງກອນ ແລະຄົນໃນອົງກອນ ຈະຊ່ວຍໃຫ້ທ່ານສາມາດຜ່ອນຄາຍຄວາມຕຶງຄຽດລົງໄດ້. ແຕ່ທ່ານຕ້ອງແນ່ໃຈວ່າ ຂະນະທີ່ທ່ານກຳລັງລົມກັນຢູ່ນັ້ນ ຈະບໍ່ມີຄົນອື່ນໄດ້ຍິນ ແລະເມື່ອເຖິງເວລາທີ່ເພື່ອນຂອງທ່ານມີບັນຫາ ກໍໃຫ້ຊ່ວຍຮັບຟັງເຂົາ ຄືກັນກັບແບບທີ່ເຂົາເຮັດກັບໂຕທ່ານເອງ.
  4. ຂໍກຳລັງໃຈຈາກຄົນສຳຄັນ: ບາງຄັ້ງ ສິ່ງທີ່ທ່ານຕ້ອງການເມື່ອຮູ້ສຶກບໍ່ດີ ກໍຄື ການກອດເພື່ອນ ຫຼື ຄົນອື່ນໆ ທີ່ສຳຄັນກັບທ່ານນັ້ນເປັນຄົນທີ່ຈະສາມາດຊ່ວຍໃຫ້ກຳລັງໃຈທ່ານໄດ້ເປັນຢ່າງດີ. ເມື່ອທ່ານພົບກັບສະຖານະການທີ່ຍາກລຳບາກ ຖ້າທ່ານສາມາດຫຼີກເວັ້ນ ແລ້ວມາສົ່ງຂໍ້ຄວາມ ຫຼື ໂທຫາຄົນທີ່ທ່ານຮັກໄດ້ໜ້ອຍນຶ່ງ ມັນອາດຈະພຽງພໍແລ້ວ ທີ່ຈະເຮັດໃຫ້ທ່ານຮູ້ສຶກດີຂຶ້ນ ເຖິງແມ່ນວ່າຄົນເຫຼົ່ານັ້ນຈະບໍ່ສາມາດໃຫ້ມຸມມອງສິ່ງໃດທີ່ກ່ຽວກັບວຽກໄດ້ ຄືກັບເພື່ອນຮ່ວມງານ, ແຕ່ພວກເຂົາສາມາດເຮັດໃຫ້ທ່ານມີກຳລັງໃຈໄດ້ໃນໄລຍະຍາວ ແລະຊ່ວຍເຕືອນທ່ານວ່າ ຊີວິດຍັງມີຫຼາຍຢ່າງກວ່າສິ່ງທີ່ເກີດຂຶ້ນກວ່ານັ້ນອີກ.
  5. ຊອກເຮັດສິ່ງທີ່ມີຄວາມສຸກ: ຖ້າທ່ານຕ້ອງການທີ່ຈະສະຫງົບສະຕິອາລົມ ຈາກຄວາມໃຈຮ້າຍຕ່າງໆ ທີ່ເກີດຂຶ້ນ ການເຂົ້າເວບໄຊ ທີ່ທ່ານມັກທີ່ສຸດ ເປັນວິທີທີ່ສາມາດຊ່ວຍທ່ານໄດ້. ການພັກຜ່ອນ ຫຼືຢຸດເຮັດວຽກຈັກ 5-10 ນາທີ ແລ້ວໄປໃຫ້ຄວາມສົນໃຈກັບສິ່ງທີ່ເຮັດໃຫ້ທ່ານມີຄວາມສຸກ ຈະຊ່ວຍຫຼຸດຄວາມຄຽດ ແລະເຮັດໃຫ້ທ່ານກັບໄປເຮັດວຽກດ້ວຍອາລົມທີ່ດີຂຶ້ນໄດ້.
  6. ພັກຜ່ອນ: ຖ້າທ່ານກຳລັງພົບກັບເລື່ອງທີ່ເຮັດໃຫ້ໃຈຮ້າຍ ຫຼື ຕຶງຄຽດທີ່ສຸດ ການພາໂຕເອງອອກຈາກສະຖານະການ ທີ່ຮຸນແຮງນັ້ນ ກໍຄື ການອອກໄປກິນເຂົ້າສວາຍ, ດື່ມກາເຟ, ອອກໄປຍ່າງຫຼິ້ນ ໂດຍການປະໂທລະສັບ ໄວ້ທາງຫຼັງ. ວິທີນີ້ ເປັນວິທີແກ້ບັນຫາດີທີ່ສຸດຢ່າງນຶ່ງ. ການອອກຈາກຫ້ອງເຮັດວຽກໄປ ຈະເຮັດໃຫ້ທ່ານໄດ້ຜ່ອນຄາຍທັງຮ່າງກາຍ ແລະຈິດໃຈ.

Hits: 23

ບ່ອນສະແດງໂຄສະນາ

ອອກ​ຈາກ REPLY ເປັນ

ກະລຸນາໃສ່ຄໍາເຫັນຂອງທ່ານ!
ກະລຸນາໃສ່ຊື່ຂອງທ່ານທີ່ນີ້