ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ຫຼວງພະບາງ ເປັນອີກແຂວງໜຶ່ງທີ່ມີຄວາມອຸດົມສົມບູນທາງດ້ານວັດທະນະທໍາ ເເລະ ມີຊື່ສຽງໃນເລື່ອງການແກະສະຫຼັກລວດລາຍເຄື່ອງໃຊ້ຕ່າງໆ ທີ່ເປັນເອກະລັກສະເພາະຂອງແຂວງຫຼວງພະບາງ.

ມື້ນີ້ ທີມຂ່າວຂອງພວກເຮົາໄດ້ມີໂອກາດສໍາພາດ ທ້າວ ເນລະມິດ ບັນດາວົງລັດຕະນະກອນ ຫຼື ໂດ້ ອາຍຸໄດ້ 23 ປີ ໝຸ່ມນ້ອຍຜູ້ຫຼົງຮັກໃນງານສິນລະປະ ການແຕ້ມແບບລວດລາຍຕ່າງໆເທິງຂັນ ແລະ ຍັງໄດ້ຕີຂັນເງີນພ້ອມຕ້ອງດອກລວດລາຍທີ່ເປັນເອກະລັກສະເພາະແຂວງຫຼວງພະບາງຢ່າງສວຍງາມ ຈົນໄດ້ນໍາໄປຖະຫວາຍໃຫ້ເເກ່ ສົມເດັດພຣະກະນິດຖາທິຣາຊ ເຈົ້າກຣົມສົມເດັດພຣະເທບຣັດຕະນະຣາຊະສຸດາ ສະຫຍາມບໍຣົມມະຣາຊະກຸມາຣີ ທີ່ປະເທດໄທ.

ໂດ້ ໄດ້ເລົ່າໃຫ້ກັບ ອິນໄຊລາວຟັງວ່າ: ຕົນເອງເກີດໃນຄອບຄົວນາຍຊ່າງຕີໂອເງີນ ຂັນເງີນ ແລະ ເເກະສະຫຼັກລວດລາຍບູຮານ ເຊິ່ງຄົນຫຼວງພະບາງຈະຮູ້ຄອບຄົວຂອງຕົນວ່າ ເປັນລູກຫຼານນາຍຊ່າງຕີເງິນຕີຄຳປະຈຳພຣະຣາຊະວັງ ແລະ ສິລະປິນແຫ່ງຊາດ ຕົນເອງໄດ້ເຫັນພໍ່ແມ່ເຮັດອາຊີບນີ້ມາເເຕ່ນ້ອຍ ເລີຍເຮັດໃຫ້ຕົນເອງຊຶມຊັບ ເເລະ ຫຼົງຮັກໃນງານສິນລະປະ ການອອກເເບບລວດລາຍບູຮານ ເມື່ອຕົນເອງຮຽນຈົບ ມ7 ກໍໄດ້ຕັດສິນໃຈທີ່ຈະບໍ່ຮຽນຕໍ່ ເເລະ ມາຊ່ວຍພໍ່ແມ່ເຮັດທຸລະກິດຕີເງິນ,ຕີໂອ,ຕີຂັນເງີນ ທີ່ສືບທອດມາຈາກວົງຕະກຸນ ລຸ້ນປູ່ຍ່າຕາຍາຍ ເຊີ່ງຕົນເອງເປັນລຸ້ນທີ່ 5 ຂອງຕະກຸນ.

ບ່ອນສະແດງໂຄສະນາ

ແຕ່ລະລວດລາຍທີ່ເຮັດອອກມານັ້ນ ຖືວ່າຍາກຫຼາຍ ເຊິ່ງທາງຮ້ານເຮົາຈະເຮັດແບບລາຍບູຮານທັງໝົດ ນັບຕັ້ງແຕ່ສະໄໝຫົວປູ່ມ່ອນເຮົາເປັນແນວໃດ ມາປັດຈຸບັນກໍ່ເປັນແນວນັ້ນ ສຳລັບລວດລາຍທີ່ຢູ່ໃນໂອ ແລະ  ຂັນ ສ່ວນຫຼາຍນ້ອງຈະເປັນຜູ້ອອກແບບແຕ້ມແບບຕ່າງໆເອງ ແລ້ວກໍ່ຈະໃຫ້ພະນັກງານຝ່າຍຕ້ອງດອກເປັນຜູ້ຕ້ອງດອກ ບາງຄັ້ງນ້ອງກໍ່ຕ້ອງດອກເອງ (ສຳລັບຄຳວ່າຕ້ອງດອກ ແປວ່າສັບດອກ ເຊີ່ງຄຳວ່າຕ້ອງດອກ ຈະໃຊ້ເອີ້ນໃນງານໂລຫະ ເງິນຄຳຕ່າງໆ ສ່ວນໃນງານໄມ້ ຈະເອີ້ນວ່າ ສັບ-ຄວັດ-ແກະ) ເຊິ່ງໂອ ແລະ ຂັນ ແຕ່ລະໜ່ວຍ ແມ່ນໃຊ້ເວລາ 1ເດືອນ ໃນການເຮັດ( ໂດ້ໄດ້ກ່າວ).

ສ່ວນລາຍທີ່ລູກຄ້ານິຍົມສັ່ງໃຫ້ເຮັດໃນໂອ ແລະ ຂັນ ສ່ວນຫຼາຍຈະເປັນລາຍດອກກູດ, ລາຍເທບພະນົມ, ລາຍພະຍານາກ ເຊີ່ງແຕ່ລະລາຍກໍຈະມີຄວາມໝາຍຕ່າງກັນ  ສຳລັບໂອ ແລະ ຂັນ ແມ່ນຕ້ອງໄດ້ຈ່ອງຄິວຕີເທົ່ານັ້ນ ຢູ່ຫນ້າຮ້ານແມ່ນລູກຄ້າຕ່າງແຂວງຈ່ອງ ແລະ ຈ່າຍເງິນຮຽບຮ້ອຍ ສຳລັບຄິວຕີຮ້ານນ້ອງແມ່ນ ສັ່ງຈ່ອງແລ້ວ ອີກ 1-2 ປີຈື່ງຈະໄດ້ຮັບເຄື່ອງເພາະທາງຮ້ານເຮົາຈະຕີໃຫ້ຕາມຄິວທີ່ລູກຄ້າຈ່ອງມາ ໂດ້ໄດ້ກ່າວ.

ໂດ້ ຍັງໄດ້ກ່າວຕື່ມອີກວ່າ: ຕົນເອງຮູ້ສືກດີໃຈ ແລະ ເປັນກຽດຫຼາຍທີ່ໄດ້ມີໂອກາດຕີຂັນເງີນຖວາຍໃຫ້ແກ່ສົມເດັດພຣະກະນິດຖາທິຣາຊ ເຈົ້າກຣົມສົມເດັດພຣະເທບຣັດຕະນະຣາຊະສຸດາ ສະຫຍາມບໍຣົມມະຣາຊະກຸມາຣີ ທີ່ປະເທດໄທ ເຊິ່ງຕ່າງໜ້ານໍາໄປມອບໂດຍທ່ານ ເອກອັກຄະລັດຖະທູດລາວ ປະຈຳບາງກອກ ປະເທດໄທ ເຊິ່ງນ້ອງໄດ້ນຳເອົາລວດລາຍທີ່ເປັນເອກະລັກສະເພາະຫຼວງພະບາງເຂົ້າໃຊ້ເຊັ່ນວ່າ ລາຍດອກດວງ ,ດອກກະດັນງາ, ດອກກາລະກັບ ຫຼື ດອກສີສູມົນທາ ເຊີ່ງດອກໄມ້ເຫຼົ່ານີ້ ແມ່ນນາຍຊ່າງບູຮານເພີ່ນນິຍົມສ້າງ ແລະ ປະດັບໄວ້ໃນວັດມາແຕ່ບູຮານ ແລະ ຍັງໄດ້ນຳເອົານິທານຕຳນານຟ້າຮ້ອງຟ້າຜ່າ ໂດຍນຳເອົາຕົວລະຄອນ ນາງເມຂະລາຫຼິ້ນແກ້ວ ແລະ ຣາມມະສູນແກວ່ງຂວານ ມາປະດິດສະຖານໃນໂອ ແລະ ຂັນ ເພື່ອໃຫ້ມີຄວາມໝາຍ ແລະ ເລື່ອງເລົ່າໃນຂັນນັ້ນ.

Hits: 77

ບ່ອນສະແດງໂຄສະນາ

ອອກ​ຈາກ REPLY ເປັນ

ກະລຸນາໃສ່ຄໍາເຫັນຂອງທ່ານ!
ກະລຸນາໃສ່ຊື່ຂອງທ່ານທີ່ນີ້