ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ບັນຍາກາດ ການຊື້-ຂາຍ ເຮືອໄຟໂຄກ ຢູ່ນະຄອນຫຼວງວຽງຈັນ ປີນີ້ ເຫັນວ່າມີຄວາມງຽບເຫງົາຫຼາຍກວ່າທຸກໆປີ ເນື່ອງຈາກສະຖານະການຂອງໂຄວິດ-19, ເຊີ່ງຖ້າເປັນທຸກໆປີ ເຮົາກໍ່ຈະພົບເຫັນການວາງຂາຍເຮືອໄຟໂຄກຕາມແຄມທາງເປັນຈຳນວນຫຼວງຫຼາຍ ແລະ ຄືກຄື້ນ

ສຳລັບປີນີ້, ສັງເກດເຫັນວ່າ ພໍ່ຄ້າແມ່ຄ້າ ທີ່ນຳເຮືອໄຟໂຄກອອກມາວາງຈຳໜ່າຍ ມີຈຳນວນໜ້ອຍກວ່າທຸກໆປີ ທັງນີ້, ພໍ່ຄ້າທີ່ນຳເຮືອໄຟໂຄກມາວາງຂາຍນັ້ນ ຍັງພົບຫຼາຍບັນຫາຫຍຸ້ງຍາກ ເປັນຕົ້ນແມ່ນ ຂາຍບໍ່ໄດ້ຄືທຸກປີ, ມີການຈຳກັດພື້ນທີ່ໃນການຂາຍໃນຈຸດທີ່ຕັ້ງແຜງຂາຍ ເນື່ອງຈາກບ້ານເຫັນວ່າມີຄວາມຊະຊາຍ

ອ້າຍໄຊ ພໍ່ຄ້າຂາຍເຮືອໄຟໂຄກແຄມທາງ ເຂດບ້ານສີຖານ ໄດ້ໃຫ້ສຳພາດກັບອິນໄຊລາວວ່າ: ບັນຍາກາດການຊື້ຂາຍເຮືອໄຟປີນີ້ ແມ່ນບໍ່ຄືກຄື້ນຄືທຸກໆປີທີ່ຜ່ານມາ, ໂດຍບາງມື້ກໍບໍ່ໄດ້ຂາຍເລີຍ ແລະ ບາງມື້ກໍ່ໄດ້ຂາຍ 2-3 ລຳເທົ່ານັ້ນ. ນອກຈາກນີ້, ພວກເຮົາຍັງຈະໄດ້ຢຸດການມາຂາຍໃນຈຸດນີ້ແລ້ວ ເນື່ອງຈາກວ່າທາງບ້ານ ໄດ້ມີການມາຕັກເຕືອນວ່າເຮັດໃຫ້ຊະຊາຍຕາມແຄມທາງ ແລະ ພວກເຮົາຈະໄດ້ກັບໄປຂາຍຢູ່ບ້ານ ເຂດສີໄຄ ແທນ

ບ່ອນສະແດງໂຄສະນາ

ທັງນີ້, ຍັງມີແມ່ຄ້າບາງຄົນ ທີ່ໄດ້ໂພສຂາຍທາງອອນລາຍ ແລະ ມີຈຸດຂາຍນຳ ເຊີ່ງການຂາຍອອນລາຍ ກໍ່ຖືວ່າສາມາດຊ່ວຍໄດ້ໃນລະດັບໜຶ່ງ ແຕ່ກໍ່ຍັງຂາຍບໍ່ດີຄືທຸກໆປີ

ເອື້ອຍປຸ້ຍ ແມ່ຄ້າເຮືອໄຟໂຄກ ເຂດຫໍປະຊຸມ (ຫຼັກ 6) ໄດ້ໃຫ້ສຳພາດກັບອິນໄຊລາວວ່າ: ສໍາລັບປີນີ້ ແມ່ນບໍ່ໄດ້ສັ່ງເຮືອໄຟມາຫຼາຍ ເນື່ອງຈາກວ່າ ກັງວົນວ່າຈະຂາຍບໍ່ດີຄືທຸກປີ, ໂດຍພວກເຮົາໄດ້ວາງຂາຍຢູ່ໜ້າເຮືອນຂອງຕົນເອງ ແລະ ມີການໂພສຮູບພາບລົງເຟສບຸກ ເພື່ອເພີ່ມຊ່ອງທາງໃນການຂາຍໃຫ້ຫຼາຍຂຶ້ນ. ເຊີ່ງກໍ່ຖືວ່າໄດ້ຜົນດີໃນລະດັບໜຶ່ງ

ເອື້ອຍປຸ້ຍໄດ້ກ່າວຕື່ມວ່າ: ແລະ ຖ້າຫາກມີໜ່ວຍງານໃດໜຶ່ງ ທີ່ສາມາດໃຫ້ຄວາມຮູ້ຕ່າງໆ ໃນການຂາຍອອນລາຍ ກໍ່ຈະຖືວ່າເປັນການດີ ເພື່ອທີ່ພວກເຮົາຈະໄດ້ຕໍ່ຍອດ ແລະ ນຳມາປັບໃຊ້ໃນຊີວິດໃຫ້ໄດ້ດີຂຶ້ນ

ເຖິງວ່າ, ປີນີ້ ພວກເຮົາຍັງປະເຊີນກັບສະພາບການລະບາດຂອງພະຍາດໂຄວິດ-19 ແລະ ບໍ່ສາມາດຈັດງານບຸນປະເພນີໄຫຼເຮືອໄຟ ຕາມລໍາແມ່ນ້ຳຂອງໄດ້. ແຕ່ການໄຫຼເຮືອໄຟໂຄກ ຕາມວັດວາອາຮາມ ແລະ ເຮືອນຊານບ້ານຊ່ອງ ແມ່ນຍັງສາມາດເຮັດໄດ້ ໂດຍເຮັດແບບພາຍໃນຄອບຄົວ ເພື່ອເປັນການຮັກສາຮິດຄອງປະເພນີ ທີ່ສືບທອດກັນມາແຕ່ດົນນານ

ບ່ອນສະແດງໂຄສະນາ

ອອກ​ຈາກ REPLY ເປັນ

ກະລຸນາໃສ່ຄໍາເຫັນຂອງທ່ານ!
ກະລຸນາໃສ່ຊື່ຂອງທ່ານທີ່ນີ້