ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ໃກ້ຈະຮອດມື້ບຸນອອກພັນສາປະວໍລະນາແລ້ວ, ແຕ່ເນື່ອງຈາກສະພາບການລະບາດຂອງພະຍາດໂຄວິດ-19 ຈື່ງເຮັດໃຫ້ບໍ່ສາມາດຈັດກິດຈະກຳຕ່າງໆ ເປັນຕົ້ນແມ່ນ: ການໄຫຼເຮືອໄຟ, ໃຕ້ປະທິບ ແລະ ກິດຈະກຳຄົບງັນອື່ນໆ ຄືທຸກໆປີທີ່ຜ່ານມາ

ແຕ່ເພື່ອບໍ່ເປັນການປະຮີດໃຫ້ໝອງປະຄອງໃຫ້ເສົ້າ ພວກເຮົາກໍ່ຍັງສາມາດສ້າງກິດຈະກຳພາຍໃນຄອບຄົວໄດ້ ໂດຍການວຽນທຽນຢູ່ໜ້າເຮືອນ, ໄຫຼເຮືອໄຟບົກ ແລະ ຈູດປະທີບ ຫຼື ໂຄມໄຟ ປະດັບປະດາ ເພື່ອເປັນການບູຊາ ອົງບໍລົມມະສາສະດາສັມມາສັມພຸດທະເຈົ້າ ເນື່ອງໃນໂອກາດບຸນອອກພັນສາ

ມື້ນີ້, ອິນໄຊລາວ ໄດ້ນໍາເອົາຂັ້ນຕອນການເຮັດປະທີບ ຫຼື ໂຄມໄຟ ທີ່ສາມາດເຮັດໄດ້ງ່າຍໆ ພາຍໃນຄອບຄົວ ໂດຍວັດສະດຸປະກອບມີ: ເຈ້ຍສີ, ກະປ໋ອງນົມທີ່ໃຊ້ແລ້ວ, ໄມ້ໄຜ່ ຫຼື ເຫຼັກລວດ, ກາວຕິດເຈ້ຍ ແລະ ສະກ໋ອດໃສ

ບ່ອນສະແດງໂຄສະນາ

ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ຂັ້ນຕອນທຳອິດ ແມ່ນເຈາະຮູກະປ໋ອງນົມທັງ 4 ຂ້າງໃຫ້ເທົ່າກັນ ແລະ ເຈາະທາງກາງໃຫ້ພໍດີກັບທຽນທີ່ຈະໃຕ້

ຫຼັງຈາກນັ້ນ, ໃຫ້ເຫຼົາໄມ້ໄຜ່ ໃຫ້ມີຂະໜາດພໍດີກັບຮູທີ່ເຈາະໄວ້ ແລະ ມີຄວາມຍາວ 50 ຊມ ເປັນຈຳນວນ 4 ອັນ (ເທົ່າກັບການເຮັດປະທີບ 1 ດວງ, ຖ້າເຮັດຫຼາຍດວງ ກໍ່ຄູນຕາມຈຳນວນ)

ຈາກນັ້ນ, ເອົາໄມ້ໄຜ່ທີ່ເຫຼົາແລ້ວນັ້ນຍັດເຂົ້າໄປໃນຮູທີ່ເຈາະໄວ້ ແລະ ຕິດສະກ໋ອດໃສ່ສົ້ນທັງສອງແໜ້ນໆ ແລ້ວໂຄ້ງໄມ້ໃຫ້ເປັນຮູບໄຂ່ ແລະ ເອົາອີກສົ້ນຍັດໃສອີກຮູ (ຕາມຮູບ)

ເມື່ອປະກອບທັງໝົດເຂົ້າກັນ ທັງ 4 ຂ້າງແລ້ວ, ຂັ້ນຕອນຕໍ່ໄປ ແມ່ນນຳເອົາເຈ້ຍທີ່ກຽມໄວ້ ມາຕິດໃສ່ກັບໄມ້ໄຜ່ທີ່ປະກອບກັບກະປ໋ອງແລ້ວ (ຕາມຮູບ)

ຫຼັງຈາກຕິດແລ້ວ ແມ່ນມາເລມຂອບເຈ້ຍທີ່ເກີນອອກມາໃຫ້ພໍດີ ແລະ ຕິດເຈ້ຍເຫຼື້ອມໃສ່ກົ້ນທີ່ເປັນກະປ໋ອງ ພຽງເທົ່ານີ້ ເຮົາກໍ່ໄດ້ປະທີບໄວ້ຈູດໃນມື້ອອກພັນສາແລ້ວ

ໃຜທີ່ເຮັດແລ້ວ ຢ່າລືມຖ່າຍຮູບມາໃຫ້ແອັດມິນເບີ່ງແນ່ເດີ້

ຄຳເຕືອນ: ການຈູດທຽນ, ວຽນທຽນ ແລະ ໃຕ້ປະທີບ ຄວນມີການລະມັດລະວັງເປັນພິເສດ ເພາະອາດເຮັດໃຫ້ເກີດອັກຄີໄພໄດ້, ສະນັ້ນ, ຄວນດັບໄຟໃຫ້ສະໜິດທຸກຄັ້ງ ຫຼັງຈາກສຳເລັດພາກິດແລ້ວ, ດ້ວຍຄວາມເປັນຫ່ວງຈາກພວກເຮົາ ອິນໄຊລາວ

LEAVE A REPLY

Please enter your comment!
Please enter your name here