ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ໃນໄລຍະຂອງການເປີດສົກຮຽນໃໝ່ທີ່ຜ່ານມາ, ປະເທດລາວຂອງພວກເຮົາ ກໍ່ໄດ້ປະເຊີນກັບບັນຫາການລະບາດຂອງພະຍາດໂຄວິດ-19 ເຮັດໃຫ້ຫຼາຍໆບ່ອນທີ່ຍັງມີການລະບາດໃນຊຸມຊົນ ຕ້ອງໄດ້ມີການຈັດລະບົບການຮຽນການສອນຜ່ານຊ່ອງທາງອອນລາຍເປັນຫຼັກ

ທັງນີ້, ການຮຽນ ການສອນ ຜ່ານທາງອອນລາຍ ກໍ່ມີທັງຂໍ້ດີຂໍ້ຫຍຸ້ງຍາກ ທີ່ແຕກຕ່າງກັນໄປໃນແຕ່ລະພື້ນທີ່ ແຕ່ສິ່ງທີ່ມີດີຄືກັນ ແມ່ນເຮັດໃຫ້ນັກຮຽນ ນັກສຶກສາ ແລະ ຄູອາຈານ ຫຼຸດຜ່ອນຄວາມສ່ຽງໃນການຕິດເຊື້ອພະຍາດໂຄວິດ-19

ອິນໄຊລາວ ໄດ້ມີໂອກາດໂອ້ລົມກັບ ອາຈານ ໄຊຍະເພັດ ຊາພິຈິດ ຈາກມະຫາວິທະຍາໄລແຫ່ງຊາດ ໂດຍອາຈານໄດ້ເລົ່າໃຫ້ອິນໄຊລາວຟັງວ່າ: ການຮຽນ ການສອນ ສຳລັບຂັ້ນມະຫາວິທະຍາໄລ ແມ່ນມີທັງຂໍ້ດີ ແລະ ຂໍ້ຫຍຸ້ງຍາກ ຢູ່ຫຼາຍຢ່າງ ເຊີ່ງຂໍ້ດີກໍ່ຄື ນັກຮຽນທຸກຄົນສາມາດເຂົ້າຮຽນໄດ້ 100% ໂດຍບໍ່ມີການຂາດຮຽນ ເພາະສາມາດຮຽນຢູ່ເຮືອນໄດ້, ບໍ່ເສຍເວລາໃນການເດີນທາງ, ສໍາລັບນັກຮຽນທີ່ຢູ່ຕ່າງແຂວງ ກໍ່ຈະປະຫຍັດຄ່າກິນຄ່າຢູ່ໄດ້ ແລະ ທີ່ສຳຄັນ ແມ່ນຍັງຫຼຸດຜ່ອນຄວາມສ່ຽງຈາກພະຍາດໂຄວິດ- 19 ທີ່ກຳລັງບາດເປັນວົງກວ້າງໃນປັດຈຸບັນ

ບ່ອນສະແດງໂຄສະນາ

ສ່ວນຂໍ້ຫຍຸ້ງຍາກນັ້ນ, ອາຈານ ໄຊຍະເພັດ ໄດ້ບອກວ່າ: ຍັງມີນັກຮຽນບາງຄົນ ບໍ່ມັກເປີດກ້ອງເວລາຮຽນ ເຊີ່ງບາງຄົນອາດຈະເປີດໄວ້ ແລ້ວໄປເຮັດແນວອື່ນ ຫຼື ບໍ່ຕັ້ງໃຈຮຽນ, ການພັດທະນາຄວາມສຳພັນ ແລກປ່ຽນປະສົບການໂດຍກົງກັບອາຈານ ແລະ ໝູ່ເພື່ອນ ນັກສຶກສາເຮັດໄດ້ຍາກຂື້ນ, ອາດຈະຕ້ອງໄດ້ຈ່າຍຄ່າສະມາດໂຟນໜ່ວຍໃຫມ່ (ສຳລັບນັກສຶກສາທີ່ບໍ່ມີສະມາດໂຟນ) ແລະ ຄ່າບໍລິການອິນເຕີເນັດ ຫຼື ຕ້ອງໄດ້ພັດທະນາທັກສະການນໍາໃຊ້ໂປຣແກຣມຕະຫຼອດເວລາ

“ແນວໃດກໍ່ຕາມ, ການຮຽນການສອນຜ່ານຊ່ອງທາງອອນລາຍ ຖືວ່າຍັງມີຄວາມຈໍາເປັນໃນໄລຍະທີ່ມີການລະບາດຂອງພະຍາດໂຄວິດ-19 ນີ້ ແລະ ຫວັງຢ່າງຍິ່ງວ່າພວກເຮົາຈະໄດ້ກັບມາຮຽນໃນມະຫາວິທະຍາໄລຄືນໃນໄວໆນີ້” ອາຈານ ໄຊຍະເພັດ ກ່າວ

ສຸດທ້າຍນີ້ ອາຈານຍັງໄດ້ກ່າວຕື່ມວ່າ: ເນື່ອງໃນໂອກາດວັນຄູແຫ່ງຊາດ ວັນທີ 7 ຕຸລາ ຄົບຮອບ 27 ປີ, ກໍ່ໍຂໍໃຫ້ຄູ ອາຈານທຸກຄົນ ອົດທົນ ສູ້ຊົນ ໄປນໍາກັນ ສົ່ງຕໍ່ຄວາມຮູ້ໃຫ້ນັກຮຽນໄດ້ຫຼາຍທີ່ສຸດ ໃນຍຸກ NEW NORMAL ນີ້ ແລະ ຂໍອວຍພອນໄຊໃຫ້ການນຳ ແລະ ຄູອາຈານ ທົ່ວປະເທດ ຈົ່ງມີສຸຂະພາບແຂງແຮງ ແລະ ຜ່ານຜ່າພະຍາດຮ້າຍໂຄວິດ-19 ນີ້ໄປໃຫ້ໄດ້

Hits: 1

ບ່ອນສະແດງໂຄສະນາ

ອອກ​ຈາກ REPLY ເປັນ

ກະລຸນາໃສ່ຄໍາເຫັນຂອງທ່ານ!
ກະລຸນາໃສ່ຊື່ຂອງທ່ານທີ່ນີ້