ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ພະທາດສີສອງຮັກ ຕັ້ງຢູ່ເມືອງດ່ານຊ້າຍ ແຂວງ ເລີຍ ປະເທດໄທ ທີ່ມີຊາຍແດນຕິດກັບ ແຂວງໄຊຍະບູລີ ຂອງ ສປປ ລາວເຮົາ ພະທາດດັ່ງກ່າວຕັ້ງຢູ່ແຄມຝັ່ງແມ່ນ້ຳຫມັນ ຫ່າງຈາກເມືອງດ່ານຊ້າຍ ປະມານ 1 ກິໂລແມັດ ພະທາດສີສອງຮັກ ມີຮູບຊົງລັກສະນະສິລະປະລ້ານຊ້າງ ອົງພະທາດວສູງ 4 ຫລ່ຽມຈະຕຸລັດ ຫຍໍ້ມຸນໄມ້ສິບສອງ ອົງລະຄັງຊົງບົວລ່ຽມຄ້າຍຄືກັບພະທາດຫລວງ ພະທາດສີໂຄດຕະບອງ ພະທາດພະນົມ ແລະ ພະທາດອື່ນໆໃນລຸ່ມແມ່ນ້ຳຂອງ ແຕ່ມີລັກສະນະປ້ອມມົນກວ່າ

ງານບຸນນະມັດສະການ ພຣະທາດສີສອງຮັກ ທີ່ຈັດຂຶ້ນທຸກປີ ໃນລະຫວ່າງ 12-15 ຄໍ່າເດືອນ 6 ຮູບຈາກ: https://pantip.com/topic/38914979/story

ພະທາດສີສອງຮັກ ຖືກສ້າງຂຶ້ນໃນສະໄຫມຂອງພະເຈົ້າໄຊຍະເຊດຖາທິລາດ ປີ ຄ.ສ 1560 ພ.ສ 2103 ແລະ ສ້າງສຳເລັດໃນປີ 1563 ພ.ສ 2106 ໂດຍການສ້າງຮ່ວມກັນຂອງສອງກະສັດຄື: ພະເຈົ້າໄຊຍະເຊດຖາທິລາດແຫ່ງກຸງສີສັດຕະນາຄະນະທຸດ (ລາວລ້ານຊ້າງ) ແລະ ພະມະຫາຈັກກະພັດແຫ່ງກຸງສີອະຍຸດທະຍາ (ໃນປະຫວັດສາດລາວ ກ່າວໄວ້ວ່າ ພະເຈົ້າໄຊຍະເຊດຖາເປັນຜູ້ສ້າງ) ເພາະໃນໄລຍະທີ່ທັງສອງ ພະອົງປົກຄອງແມ່ນໄລຍະທີ່ປະເທດມຽນມາ ເຮືອງອຳນາດ ຍ້ອນມີກະສັດທີ່ເຂັັ້ມແຂງໃນການປົກຄອງ ພະເຈົ້າຕະເບັງຊະເວຕີ້ ແລະ ພະຍາບູເຮັງນອງ ໄດ້ຍົກທັບມາຮຸກຮານທັງສອງປະເທດຫລາຍເທື່ອ ດັ່ງນັ້ນ ພະເຈົ້າໄຊຍະເຊດຖາທິລາດ ແລະ ພະມະຫາຈັກກະພັດຈຶ່ງມີຄຳເຫັນກົງກັນທີ່ຈະລວມກຳລັງເປັນພັນທະມິດນຳກັນ ເພື່ອຮ່ວມຕໍ່ສູ້ກັບພະມ້າ ແລະ ເພື່ອເປັນທີ່ລະນຶກ ຈຶ່ງໄດ້ຮ່ວມກັນສ້າງພະທາດເຈດີຂຶ້ນເປັນສັກຂີພະຍານ ພ້ອມທັງຕັ້ງຊື່ວ່າ: “ສີສັດຕະນະຄະນະຫຸດ ກັບ ສີອະຍຸດທະຍາ”

ງານບຸນນະມັດສະການ ພຣະທາດສີສອງຮັກ ທີ່ຈັດຂຶ້ນທຸກປີ ໃນລະຫວ່າງ 12-15 ຄໍ່າເດືອນ 6 ຮູບຈາກ: https://pantip.com/topic/38914979/story

 ໃນມື້ເພັງເດືອນ 6 ຂອງທຸກໆປີ ຈະມີພິທີສົມໂພດ ແລະ ນະມັດສະການພະເຈດີ ໂດຍການນຳເອົາຕົ້ນເຜີ້ງ (ເອົາຕົ້ນກ້ວຍມາເຮັດເປັນຮູບສາມຫລ່ຽມປິລະມິດ ປະດັບປະດາດ້ວຍດອກເຜີ້ງ) ທຽນວຽນຫົວ ແລະ ທຽນເຊັ່ນຄົນເຊັ່ນສັດ ເອົາມາຖວາຍພະທາດ ແລະ ກໍເປັນປະເພນີອັນສັກສິດທີ່ສືບທອດກັບມາເຖິງປັດຈຸບັນ ອີກສິ່ງໜຶ່ງທີ່ຖືກເປັນຕຳນານຂອງພະທາດແຫ່ງນີ້ແມ່ນເລື່ອງຂອງ “ສີແດງ” ເພາະໃຜໆກໍຕາມທີ່ຈະໄປນະມັດສະການພະທາດສີສອງຮັກແມ່ນຫ້າມນຸ່ງຖືດ້ວຍເຄື່ອງສີແດງ ແມ່ນແຕ່ດອກໄມ້ທີ່ຈະນຳໄປບູຊາກໍຫ້າມເປັນດອກໄມ້ສີແດງ ເພາະເນື່ອງຈາກວ່າ: ພະທາດນີ້ສ້າງຂຶ້ນເພື່ອສັດຈະ ແລະ ໄມຕີສີແດງ ຈຶ່ງຖືກປຽບເປັນສັນຍາລັກຂອງເລືອດ ແລະ ຄວາມຮຸນແຮງເຊິ່ງຫມາຍເຖິງຫມາກຜົນຂອງສົງຄາມ ນອກຈາກນັ້ນກໍຍັງມີຂໍ້ຫ້າມອື່ນໆອີກຈຳນວນຫນຶ່ງ
 

ບ່ອນສະແດງໂຄສະນາ
ຮູບຜູ້ເຖົ້າກຳລັງກະກຽມຕົ້ນເຜີ້ງ ເພື່ອໄປສັກກາລະບູຊາພຣະທາດສີສອງຮັກ ຮູບຈາກ: https://pantip.com/topic/38914979/story

ພະທາດສີສອງຮັກ ແມ່ນພະທາດຫນຶ່ງທີ່ເປັນສີມືຂອງຄົນລາວ ແລະ ກໍແມ່ນບັນພະບູລຸດລາວ ເປັນຜູ້ນຳພາສ້າງ ສະນັ້ນ ພະທາດສີສອງຮັກ ຈະເປັນສັນຍາລັກແຫ່ງຄວາມສາມັກຄີທີ່ອຳມະຕະລະຫວ່າງສອງອານາຈັກ ຫລື ບໍ່ນັ້ນມີແຕ່ປະຫວັດສາດເທົ່ານັ້ນຈາລຶກໄວ້ນັ້ນກໍຄືອະດິດ ສ່ວນປັດຈຸບັນກໍຄົງເຫລືອໄວ້ແຕ່ຮ່ອງຮອຍ ແລະ ຄວາມຊົງຈຳທີ່ຮູ້ຢູ່ດີແກ່ໃຈຂອງປະຊາຊົນທີ່ຢູ່ໃກ້ຄຽງເທົ່ານັ້ນເອງ

ຮູບພາບທັງໝົດຈາກ: https://pantip.com/topic/38914979/story

Hits: 1

ບ່ອນສະແດງໂຄສະນາ

ອອກ​ຈາກ REPLY ເປັນ

ກະລຸນາໃສ່ຄໍາເຫັນຂອງທ່ານ!
ກະລຸນາໃສ່ຊື່ຂອງທ່ານທີ່ນີ້