ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ຫຼັງຈາກທີ່ມີການລະບາດຂອງພະຍາດໂຄວິດ-19 ຕັ້ງແຕ່ຕົ້ນປີ 2020 ແລະ ເລີ່ມມີຜູ້ຕິດເຊື້ອພະຍາດດັ່ງກ່າວຢູ່ໃນ ສປປ ລາວ ຕັ້ງແຕ່ວັນທີ 23 ມີນາ 2020 ແລະ ລັດຖະບານ ກໍ່ໄດ້ອອກມາດຕະການຫຼາຍຢ່າງ ເພື່ອບໍ່ໃຫ້ມີການລະບາດເປັນວົງກວ້າງ

ແລະ ຍ້ອນພະຍາດໂຄວິດ-19 ນີ້, ມັນໄດ້ສົ່ງຜົນກະທົບໃນຫຼາຍໆດ້ານ ໂດຍສະເພາະກໍ່ແມ່ນດ້ານການທ່ອງທ່ຽວ

ນາງ ນິພາພອນ ສໍໄຊຍະວົງ ຫຼື ປ້ຽວ ອາດີດພະນັກງານຕ້ອນຮັບຢູ່ໂຮງແຮມແຫ່ງໜຶ່ງ ໃນນະຄອນຫຼວງວຽງຈັນ ເປັນຜູ້ໜຶ່ງທີ່ໄດ້ຮັບຜົນກະທົບຈາກການລະບາດຂອງພະຍາດໂຄວິດ-19 ເນື່ອງຈາກບໍ່ມີແຂກຕ່າງປະເທດເຂົ້າມາທ່ຽວພາຍໃນປະເທດ ເຮັດໃຫ້ທຸລະກິດໂຮງແຮມບໍ່ມີລາຍຮັບຫຼາຍເທົ່າທີ່ຄວນ. ດັ່ງນັ້ນ, ປ້ຽວຈື່ງໄດ້ຕັດສິນໃຈໂຈະການເຮັດວຽກໃນສາຍການໂຮງແຮມ ເພື່ອຊອກຫາຊ່ອງທາງໃໝ່ ທີ່ມີລາຍຮັບຫຼາຍຂຶ້ນ

ບ່ອນສະແດງໂຄສະນາ

ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ປັດຈຸບັນ, ປ້ຽວໄດ້ຮ່ວມທຶນກັບໝູ່ອີກ 5 ຄົນ ທີ່ໄດ້ຮັບຜົນກະທົບຈາກໂຄວິດ-19 ເຊັ່ນດຽວກັນ ເພື່ອເປີດຮ້ານຂາຍກ້ຽວ ທີ່ມີຊື່ວ່າ KIEW-KIEW MALA ເພື່ອໃຫ້ຢູ່ລອດໃນຍຸກຂອງໂຄວິດ

ປ້ຽວ ໄດ້ໃຫ້ສຳພາດກັບອິນໄຊລາວວ່າ: ຫຼັງຈາກທີ່ເຮົາໄດ້ໂຈະການເຮັດວຽກໂຮງແຮມແລ້ວ, ຕົນເອງ ແລະ ໝູ່ກໍ່ໄດ້ ສັງເກດເຫັນວ່າ ພຶດຕິກຳຂອງຜູ້ບໍລິໂພກ ແລະ ສະຖານະການໃນໄລຍະນັ້ນ. ສາມາດສັງລວມໄດ້ວ່າທຸລະກິດອາຫານ ກໍ່ຖືວ່າຍັງເປັນທຸລະກິດໜຶ່ງທີ່ສາມາດສ້າງລາຍຮັບໄດ້ຢູ່ ເຖິງແມ່ນວ່າ ເສດຖະກິດຈະຕົກຕໍ່າ ຫຼື ຄົນໃນສັງຄົມມີບັນຫາທາງດ້ານການເງິນ. ໂດຍສະເພາະ, ໃນຊ່ວງທີ່ມີການແຜ່ລະບາດພະຍາດໂຄວິດນີ້ ພວກເຮົາໄດ້ແນມເຫັນໂອກາດຊ່ອງທາງທຸລະກິດໃນການເຮັດອາຫານເດຣິເວີຣີ ເພາະວ່າ ມັນຕອບໂຈດ ແລະ ເຂົ້າກັບສະຖານະການໃນຕອນນັ້ນທີ່ສຸດ (ຊ່ວງທຳອິດທີ່ມີການລະບາດພະຍາດໂຄວິດ-19)

ປ້ຽວໄດ້ບອກຕື່ມວ່າ: ເລີ່ມທຳອິດ ແມ່ນພວກເຮົາເປີດຂາຍແບບອອນລາຍ ໂດຍໄດ້ເລືອກຫ້ອງເຊົາທີ່ຢູ່ບໍລິເວນວັດສີດຳດວນ ເນື່ອງຈາກຫ້ອງເຊົາມີລາຄາຖືກ ແລະ ຕອນນັ້ນ ພວກເຮົາກໍ່ໄດ້ຂາຍອອນລາຍເປັນຫຼັກ ແລະ ກໍ່ຖືວ່າໄດ້ຮັບຄວາມນິຍົມຫຼາຍພໍສົມຄວນ. ຫຼັງຈາກນັ້ນ, ລັດຖະບານໄດ້ຜ່ອນຄາຍມາດຕະການ ພວກເຮົາຈື່ງໄດ້ເລີ່ມເປີດເປັນໜ້າຮ້ານ ຢູ່ຫ້ອງເຊົາເລີຍ ໂດຍເລີ່ມທີ່ 3 ໂຕະ ແລະ ໄດ້ເພີ່ມໂຕະມາເລື່ອນໆ. ປັດຈຸບັນ, ພວກເຮົາກຳລັງຈະເປີດສາຂາສອງ ຢູ່ຂ້າງວິທະຍາໄລລັດຕະນະ ເພື່ອເພີ່ມທາງເລືອກໃໝ່ໃຫ້ກັບລູກຄ້າ

ລູກຄ້າບາງຄົນ ຍັງບໍ່ກ້າມາກິນ ເນື່ອງຈາກວ່າຕັ້ງຢູ່ໃນວັດ, ແຕ່ຂ້າພະເຈົ້າຄິດວ່າ ມັນກໍ່ເປັນສະເໜ່ອີກຢ່າງໜຶ່ຂອງຮ້ານເຮົາ ປ້ຽວກ່າວ

ສໍາລັບກ້ຽວຂອງພວກເຮົາ ແມ່ນຈະປະສົມປະສານ ລະຫວ່າງກ້ຽວ ແລະ ໝາລ່າ ເຮັດໃຫ້ມີຄວາມແຕກຕ່າງຈາກຮ້ານອື່ນ. ລວມທັງລັກສະນະການຫໍ້ກ້ຽວ ແລະ ວັດຖຸດິບໃນແຜນກ້ຽວ ແລະ ເສັ້ນໝີ່ ທີ່ມີການປະສົມປະສານຜັກຫົມເຂົ້າໄປນຳ

ສຸດທ້າຍ ປ້ຽວ ຍັງໄດ້ບອກຕື່ມວ່າ:​ ຝາກເຖິງທຸກຄົນທີ່ກຳລັງວ່າງງານ ຫລື ກຳລັງສູ້ກັບວຽກຢູ່ ໃຫ້ສູ້ຕໍ່ໄປເຖິງວ່າເຮົາຈະຕົກຢູ່ໃນສະຖານະການທີ່ມີພະຍາດລະບາດ ແຕ່ຢາກໃຫ້ທຸກຄົນຈົ່ງມີສະຕິ ຄິດມອງຫາສິ່ງທີ່ມັນອາດຈະເປັນໄປໄດ້ ບໍ່ໃຫ້ຕື່ນຕົກໃຈຈົນເກີນໄປ ເພາະເຮົາບໍ່ຮູ້ວ່າມື້ອື່ນ ແລະ ມື້ຕໍ່ໆໄປເຮົາຈະກັບໄປເຮັດວຽກທີ່ເຮົາເຄີຍເຮັດໄດ້ຫລື ບໍ່ ສະນັ້ນຈົ່ງຫາວິທີທາງທີ່ຈະເຮັດໃຫ້ເຮົາຢູ່ລອດ ແລະ ມີລາຍຮັບໃນຊ່ວງວິກິດນີ້.

LEAVE A REPLY

Please enter your comment!
Please enter your name here