ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ສູນພັດທະນາແມ່ຍິງພິການລາວ (ສພຍລ) LAO DISABLED WOMAN DEVELOPMENT CENTER (LDWDC)  ສ້າງຕັ້ງຂຶ້ນໃນປີ 2001 ໂດຍໄດ້ຮັບການສະໜັບສະໜູນຈາກລັດຖະບານລາວ ມີຈຸດປະສົງເພື່ອເຮັດໃຫ້ແມ່ຍິງພິການໃນ ສປປ ລາວ ມີໂອກາດໄດ້ຮັບການສຶກສາ, ການຝຶກອົບຮົມດ້ານວິຊາຊີບ, ມີໂອກາດເຂົ້າເຖິງການຈ້າງງານ ແລະ ມີວຽກເຮັດງານທຳ ນອກຈາກນີ້, ຍັງເປັນການສະໜັບສະໜູນດ້ານສິດທິແມ່ຍິງພິການ ແລະ ໃຫ້ມີໂອກາດເທົ່າທຽມກັບຄົນໃນສັງຄົມ

ທ່ານ ນາງ ຈັນເພັງ ສີວິລາ ຜູ້ອຳນວຍການສູນພັດທະນາແມ່ຍິງພິການລາວ

ທ່ານ ນາງ ຈັນເພັງ ສີວິລາ ຜູ້ອຳນວຍການສູນພັດທະນາແມ່ຍິງພິການລາວ ແລະ ທັງເປັນຜູ້ສ້າງຕັ້ງ ສພຍລ ໄດ້ໃຫ້ສຳພາດກັບທິມງານອິນໄຊລາວວ່າ: ວິຊາການຮຽນການສອນທີ່ເຮົາໄດ້ມີການຝຶກອົບຮົມຢູ່ສູນແຫ່ງນີ້ ແມ່ນປະກອບມີ: ຍົກລະດັບການສຶກສາລະດັບຂັ້ນປະຖົມໃຫ້ກັບບັນດາແມ່ຍິງພິການໃນເຂດຫ່າງໄກສອກຫຼິກ ຮ່ວມກັບຫ້ອງການສຶກສາເມືອງຫາດຊາຍຟອງ, ຝຶກອົບຮົມວິຊາຄອມພິວເຕິ, ຝຶກອົບຮົມພາສາອັງກິດ, ຝຶກອົບຮົມການຕັດຫຍິບ, ການຕ່ຳຫູກ, ເຄື່ອງປັ້ນດິນເຜົາ ແລະ ແປຮູບເຈ້ຍ, ນອກຈາກນີ້ ຍັງມີການຝຶກອົບຮົມໃຫ້ແມ່ຍິງພິການໄດ້ຮຽນຮູ້ການດຳລົງຊີວິດໃນສັງຄົມອີກດ້ວຍ 

“ນັບແຕ່ມື້ສ້າງຕັ້ງສູນຂຶ້ນມາ ມີແມ່ຍິງພິການຫຼາຍກ່ວາ 1500 ຄົນ ທີ່ຈົບຈາກສູນພັດທະນາແມ່ຍິງພິການລາວແຫ່ງນີ້ ແລ້ວມີວຽກເຮັດງານທຳ” ທ່ານ ນາງ ຈັນເພັງ ສີວິລາ ກ່າວ

ບ່ອນສະແດງໂຄສະນາ
ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ທ່ານ ນາງ ຈັນເພັງ ຍັງໄດ້ກ່າວຕື່ມອີກວ່າ: ໃນອະນາຄົດແມ່ນທາງສູນພັດທະນາແມ່ຍິງພິການລາວ ຈະຂະຫຍາຍອອກໄປຕ່າງແຂວງໂດຍສະເພາະແມ່ນແຂວງຫຼວງພະບາງ ແລະ ຍັງມີແຜນຈະຫຍາຍໄປທາງພາກໃຕ້ ກໍ່ຄືແຂວງອັດຕະປືອີກດ້ວຍ ແຕ່ເນື່ອງຈາກວ່າປະຈຸບັນພວກເຮົາຍັງຂາດທືນຮອນໃນການພັດທະນາ ແຕ່ແນວໃດກໍ່ຕາມ, ທາງສູນພວກເຮົາກໍ່ຈະພະຍາຍາມສ້າງໃຫ້ໄດ້ ເພາະວ່ານັກຮຽນທີ່ຈົບໄປຈາກສູນນີ້ ໃນແຕ່ລະແຂວງແມ່ນສາມາດຖ່າຍທອດຄວາມຮູ້ຄວາມສາມາດໃຫ້ກັບແມ່ຍິງພິການຄົນອຶ່ນໆໄດ້ ແລະ ໃນອະນາຄົດຕໍ່ໜ້າແມ່ນທາງສູນຢາກຍົກລະດັບໃຫ້ສູນພັດທະນາແມ່ຍິງພິການລາວແຫ່ງນີ້ ເປັນວິທະຍາໄລຂັ້ນຕົ້ນນຳອີກດ້ວຍ

ປະຈຸບັນ, ສູນພັດທະນາແມ່ຍິງພິການລາວ ແມ່ນໄດ້ມີຫ້ອງວາງສະແດງສິນຄ້າ ຢູ່ສູນພັດທະນາແມ່ຍິງພິການລາວ ( ຖະໜົນທ່າເດື່ອ, ບ້ານດົງໂພສີ, ເມືອງຫາດຊາຍຟອງ, ນະຄອນຫຼວງວຽງຈັນ ) ແລະ ມີຫ້ອງວາງສະແດງສິນຄ້າແຫ່ງໃໝ່ ຢູ່ກົງກັນຂ້າມກັບວັດອົງຕື້ ມະຫາວິຫານ ໂດຍໃສ່ຊື່ວ່າ: “ສາຍໃຍຮັກ ຫັດຖະກຳລາວ” ເຊິ່ງໃນປະຈຸບັນ ສູນພັດທະນາແມ່ຍິງພິການລາວ ມີພະນັກງານ ແລະ ນັກຮຽນທັງໝົດແມ່ນຫຼາຍກວ່າ 50 ຄົນ  

ສຸດທ້າຍນີ້, ເນື່ອງໃນໂອກາດວັນແມ່ຍິງສາກົນ ຄົບຮອບ 110 ປີ ອິນໄຊລາວຂໍອວຍພອນໄຊມາຍັງແມ່ຍິງພິການລາວໃນທົ່ວປະເທດ ຈົ່ງມີສຸຂະພາບແຂງແຮງ ປະສົບຜົນສຳເລັດໃນໜ້າທີ່ວຽກງານ 

Hits: 41

LEAVE A REPLY

ກະລຸນາໃສ່ຄໍາເຫັນຂອງທ່ານ!
ກະລຸນາໃສ່ຊື່ຂອງທ່ານທີ່ນີ້