ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ
ພາບປະກອບ

ກຸ່ມ​ຜະ­ລິດ​ກະ­ສິ­ກຳ​ຜັກ​ອິນ​ຊີ ນະ­ຄອນ­ຫຼວງ​ວຽງ​ຈັນ (ນວ) ໄດ້​ຮັບ​ການ​ຊຸກ­ຍູ້​ມາ​ແຕ່​ປີ 2004 ເປັນ­ຕົ້ນ​ມາ ໂດຍ​ການ​ສົມ­ທົບ​ລະ­ຫວ່າງ​ກົມ​ປູກ­ຝັງ ກະ­ຊວງ​ກະ­ສິ­ກຳ ແລະ ປ່າ­ໄມ້ ຂະ­ແໜງ​ປູກ­ຝັງ ພະ​ແນກ​ກະ­ສິ­ກຳ ແລະ ປ່າ­ໄມ້ ແລະ ຫ້ອງ­ການ​ກະ­ສິ­ກຳ ແລະ ປ່າ­ໄມ້​ເມືອງ.

ເຊິ່ງ​ໄດ້​ຮັບ​ການ​ສະ­ໜັບ­ສະ­ໜູນ​ຈາກ​ໂຄງ­ການ​ສົ່ງ­ເສີມ​ກະ­ສິ­ກຳ​ອິນ​ຊີ ແລະ ການ​ຕະ­ຫຼາດ​ໄດ້​ຈັດ​ຕັ້ງ​ປະ­ຕິ­ບັດ​ຢູ່ 4 ເມືອງ​ເປົ້າ​ໝາຍ​ຂອງ ນວ​ຮູບ​ແບບ​ການ​ສົ່ງ­ເສີມ​ມີ​ລັກ­ສະ­ນະ​ເປັນ​ຄອບ­ຄົວ​ຕົວ​ແບບ ປັດ­ຈຸ­ບັນ​ເຫັນ​ໄດ້​ວ່າ​ກຸ່ມ​ກະ­ສິ­ກຳ​ອິນ​ຊີ​ມີ​ການ​ຂະ­ຫຍາຍ­ຕົວ​ນັບ​ມື້​ເພີ່ມ​ຂຶ້ນ​ເມື່ອ​ທຽບ­ໃສ່​ເມື່ອ​ກ່ອນ.

ທ່ານ ທອງ​ໄຊ ເພັດ​ນະ­ຄອນ​ສີ ປະ­ທານ​ກຸ່ມ​ຜະ­ລິດ​ກະ­ສິ­ກຳ​ອິນ​ຊີ ນວ ໄດ້​ລາຍ​ງານ​ຜົນ­ສຳ­ເລັດ​ການ​ພັດ­ທະ­ນາ​ກະ­ສິ­ກຳ​ອິນ​ຊີ (ພືດ​ຜັກ ແລະ ໝາກ​ໄມ້) ຕໍ່​ກອງ​ປະ­ຊຸມ​ໃຫຍ່​ຄັ້ງ​ທີ VII ຂອງ​ຄະ­ນະ​ພັກ​ຮາກ​ຖານ​ພະ​ແນກ​ກະ­ສິ­ກຳ ແລະ ປ່າ­ໄມ້ ນວ ວ່າ:

ບ່ອນສະແດງໂຄສະນາ
ພາບປະກອບ

ໃນ 5 ປີ ຜ່ານ​ມາ (2014-2019) ກຸ່ມ​ຜະ­ລິດ​ກະ­ສິ­ກຳ​ອິນ​ຊີ ນວ ມີ​ບາດ­ກ້າວ​ຂະ­ຫຍາຍ­ຕົວ ແລະ ມີ​ຄວາມ​ເຂັ້ມ­ແຂງ​ຫຼາຍ​ຂຶ້ນ ເມື່ອ​ທຽບ­ໃສ່​ເມື່ອ​ກ່ອນ ປັດ­ຈຸ­ບັນ​ປະ­ກອບ​ມີ 12 ກຸ່ມ​ນ້ອຍ ສະ­ມາ­ຊິກ​ຊາວ​ສວນ​ທັງ​ໝົດ 303 ຄອບ­ຄົວ ເນື້ອ­ທີ່ 329 ເຮັກ­ຕາ ຜົນ​ຜະ­ລິດ 2.874 ໂຕນ​ຕໍ່​ປີ ໃນ​ນັ້ນ ເມືອງ​ຫາດ​ຊາຍ​ຟອງ​ມີ 2 ກຸ່ມ​ຄື:

ກຸ່ມ​ໂຄກ​ຊາຍ ແລະ ກຸ່ມ​ຊາຍ​ຟອງ​ເໜືອ ມີ 19 ຄອບ­ຄົວ ເນື້ອ­ທີ່ 7,12 ເຮັກ­ຕາ ເມືອງ​ໄຊ​ເສດ​ຖາ 2 ກຸ່ມ​ຄື:

ກຸ່ມ​ຊຽງ​ດາ ແລະ ກຸ່ມ​ນາ​ສ້າງ​ໄພ ມີ 24 ຄອບ­ຄົວ ເນື້ອ­ທີ່ 19,34 ເຮັກ­ຕາ ເມືອງ​ສີ​ໂຄດ​ຕະ­ບອງ 2 ກຸ່ມ​ຄື:

ກຸ່ມ​ໜອງ​ດາ ແລະ ກຸ່ມ​ຈຳ­ປາ ມີ 22 ຄອບ­ຄົວ ເນື້ອ­ທີ່ 21,59 ເຮັກ­ຕາ ເມືອງ​ໄຊ​ທາ­ນີ 4 ກຸ່ມ​ຄື:

ກຸ່ມ​ໂນນ​ແຕ້ ສົມ​ສະ­ຫວັນ ທົ່ງ​ນາ ແລະ ກຸ່ມ​ປາກ​ຊາບ​ໃໝ່ ມີ 120 ຄອບ­ຄົວ ເນື້ອ­ທີ່ 160,2 ເຮັກ­ຕາ ເມືອງ​ນາ​ຊາຍ​ທອງ​ມີ​ກຸ່ມ​ໂພນ​ແກ້ວ 7 ຄອບ­ຄົວ ເນື້ອ­ທີ່ 5,84 ເຮັກ­ຕາ ແລະ ເມືອງ​ປາກ​ງື່ມ ກຸ່ມ​ທ່າ​ຊ້າງ ມີ 111 ຄອບ­ຄົວ ເນື້ອ­ທີ່ 120 ເຮັກ­ຕາ

ພ້ອມ​ນັ້ນ ການ​ປູກ​ພືດ​ລະ­ດູ­ຝົນ​ໄດ້​ມີ​ການ​ຂະ­ຫຍາຍ​ຈຳ­ນວນ​ເຮືອນ​ຮົ່ມ​ປູກ​ພືດ​ຜັກ​ຂອງ​ກຸ່ມ​ກະ­ສິ­ກຳ​ອິນ​ຊີ ນວ ໄດ້​ທັງ​ໝົດ 400 ກວ່າ​ຫຼັງ.

ພາບປະກອບ

ສ່ວນ​ວຽກ​ງານ​ຕະ­ຫຼາດ​ມີ​ສະ­ຖານ­ທີ່​ຈັດ​ຕະ­ຫຼາດ­ນັດ​ຈຳ­ໜ່າຍ​ພືດ​ຜັກ​ອິນ​ຊີ 6 ແຫ່ງ ໃນ​ນີ້ ເມືອງ​ໄຊ​ເສດ​ຖາ​ຢູ່​ຕະ­ຫຼາດ​ອິນ​ຊີ​ສູນ​ການ​ຄ້າ​ລາວ-ໄອ​ເຕັກ ແລະ ຕະ­ຫຼາດ​ອິນ​ຊີ​ຫຼັກ 5 ເມືອງ​ສີ​ໂຄດ​ຕະ­ບອງ​ຢູ່​ຕະ­ຫຼາດ​ອິນ​ຊີ​ສວນ​ເຈົ້າ­ຟ້າ​ງຸ່ມ ແຕ່​ປັດ­ຈຸ­ບັນ​ຍ້າຍ​ມາ​ຢູ່​ດົງ​ນາ​ໂຊກ ເມືອງ​ຈັນ­ທະ​ບູ​ລີ​ຢູ່​ຕະ­ຫຼາດ​ຫ້ວຍ​ຫົງ ເມືອງ​ໄຊ​ທາ­ນີ ຢູ່​ຕະ­ຫຼາດ​ອິນ​ຊີ​ບ້ານ​ຊ້າງ​ຄູ.

ນອກ​ນັ້ນ ຍັງ​ມີ​ຮ້ານ​ຂາຍ​ພືດ​ຜັກ​ອິນ​ຊີ​ຫຼັກ 8 ໜຶ່ງ​ຫຼັງ ມີ​ຜົນ​ຜະ­ລິດ​ທັງ​ໝົດ 2.570 ໂຕນ​ຕໍ່​ປີ ມູນ​ຄ່າ 35,8 ຕື້​ກີບ ສະ­ເລ່ຍ​ຄອບ­ຄົວ​ໜຶ່ງ​ຈະ​ໄດ້​ຮັບ 5-8 ລ້ານ​ກີບ​ຕໍ່​ເດືອນ ນອກ​ນີ້ ຍັງ​ເຂົ້າ​ຮ່ວມ​ງານ​ວາງ­ສະ­ແດງ​ຕ່າງໆ ເປັນ­ຕົ້ນ ວັນ​ອາ­ຫານ​ໂລກ ເທ​ສະ­ການ​ອາ­ຫານ​ລາວ ແລະ ບຸນ​ນະ­ມັດ­ສະ­ການ​ງານ​ສຳ­ຄັນ​ຕ່າງໆ​ຫຼາຍ​ກວ່າ 10 ຄັ້ງ​ຕໍ່​ປີ.

ສຳ­ລັບ​ທິດ​ທາງ​ຕໍ່­ໜ້າ ສຸມ​ໃສ່​ຂະ­ຫຍາຍ​ເນື້ອ­ທີ່​ການ​ປູກ​ຜັກ ໝາກ​ໄມ້ ກະ­ສິ­ກຳ​ອິນ​ຊີ ຕາມ​ນະ­ໂຍ­ບາຍ​ກະ­ສິ­ກຳ​ສະ­ອາດ​ຂອງ ນວ ໃຫ້​ໄດ້ 30% ສູ້​ຊົນ​ຜະ­ລິດ​ໃຫ້​ໄດ້ 3.000-4.000 ໂຕນ​ຕໍ່​ປີ ແລະ ສົມ­ທົບ​ກັບ​ພະ​ແນກ​ກະ­ສິ­ກຳ ແລະ ປ່າ­ໄມ້ ນວ ໂຄ­ສະ­ນາ​ຕະ­ຫຼາດ​ກະ­ສິ­ກຳ​ອິນ​ຊີ​ໃຫ້​ມີ​ຕະ­ຫຼາດ​ຖາ­ວອນ ແລະ ສົ່ງ­ເສີມ​ການ​ຜະ­ລິດ​ຕິດ​ພັນ​ກັບ​ການ​ຕະ­ຫຼາດ​ສູ້​ຊົນ​ເພີ່ມ​ລາຍ​ຮັບ​ໃຫ້​ໄດ້ 10 ຕື້​ກີບ​ຕໍ່​ປີ.

ແຫຼ່ງຂໍ້ມູນ: ວຽງຈັນໃໝ່

Hits: 28

ບ່ອນສະແດງໂຄສະນາ

ອອກ​ຈາກ REPLY ເປັນ

ກະລຸນາໃສ່ຄໍາເຫັນຂອງທ່ານ!
ກະລຸນາໃສ່ຊື່ຂອງທ່ານທີ່ນີ້