ແຂວງໄຊຍະບູລີ ເປີດຕະຫລາດນັດແຮງງານ ຄັ້ງທີ I ຂຶ້ນໃນວັນທີ 24 ພຶດສະພາ 2019 ຢູ່ ທະນາຄານ ພົງສະຫວັນ ເພື່ອເປັນການສ້າງໂອກາດ ໃຫ້ຜູ້ທີ່ຕ້ອງການມີວຽກເຮັດງານທໍາໄດ້ເຂົ້າເຖິງ ການຈ້າງງານ ແລະ ບັນດາ ຫົວໜ່ວຍແຮງງານ ທີ່ມີຄວາມຕ້ອງການແຮງງານ, ສາມາດຄັດເລືອກເອົາແຮງງານທີ່ມີຄວາມເໝາະສົມ ກັບຕໍາແໜ່ງງານ, ທັງເປັນການສ້າງໂອກາດໃຫ້ກໍາລັງແຮງງານທີ່ຕ້ອງການ ວຽກເຮັດງານທໍາ ແລະ ຫົວໜ່ວຍແຮງງານຕ່າງໆ ໄດ້ພົບປະ, ປຶກສາຫາລືກັນກ່ຽວກັບການຮັບສະໝັກງານ ແລະ ການພັດທະນາສີມືແຮງງານ ທີ່ສອດຄ່ອງກັບຄວາມຕ້ອງການຂອງຕະຫຼາດແຮງງານ.
ທ່ານ ເພັງນິລັນ ຄໍາພັນເພັງ ຮອງເຈົ້າແຂວງໄຊຍະບູລີ ໄດ້ກ່າວວ່າ: ການຈັດຕະຫລາດນັດແຮງງານຄັ້ງນີ້ ນອກຈາກ ເປັນການສ້າງໂອກາດ ໃຫ້ຜູ້ທີ່ຕ້ອງການມີວຽກເຮັດງານທໍາ ໄດ້ເຂົ້າເຖິງການຈ້າງງານ ແລະ ບັນດາຫົວໜ່ວຍແຮງງານ ທີ່ມີຄວາມຕ້ອງການ ແຮງງານແລ້ວ ຍັງເປັນການສ້າງເງື່ອນໄຂໃຫ້ກັບຜູ້ອອກແຮງງານ ທີ່ຕ້ອງການພັດທະນາສືມືແຮງງານ ໄດ້ເຂົ້າເຖິງການສຶກສາຢູ່ບັນດາສະຖາບັນການຝຶກວິຊາຊີບ ແລະ ສູນອົບຮົມຕ່າງໆ ເພື່ອພັດທະນາຄວາມຮູ້, ຄວາມສາມາດໄປຄຽງຄູ່ກັບຄວາມຕ້ອງການ ຂອງຕະຫລາດແຮງງານ ແນໃສ່ເຮັດໃຫ້ອັດຕາການຫວ່າງງານ ແລະ ການເຄື່ອນຍ້າຍແຮງງານ ໄປຕ່າງປະເທດແບບບໍ່ຖືກຕ້ອງ ໃຫ້ລຸດລົງ ເທື່ອລະກ້າວ, ພ້ອມນີ້ ຍັງເປັນການເປີດກວ້າງດ້ານຂໍ້ມູນຂ່າວສານຕະຫລາດແຮງງານ, ເຮັດໃຫ້ກໍາລັງແຮງ ໄດ້ເຂົ້າເຖິງການມີວຽກເຮັດງານທໍາທີ່ມີຄຸນຄ່າ ແລະ ເປັນທໍາ.
ການງານຄັ້ງນີ້, ມີບໍລິສັດຈັດຫາງານ, ຫົວໜ່ວຍທຸລະກິດ ຫລື ຫົວໜ່ວຍແຮງງານ 15 ຫົວໜ່ວຍ ເພື່ອຮັບເອົາ ພະນັກງານຢູ່ກັບທີ່, ມີຫລາຍກວ່າ 20 ຕໍາແໜ່ງງານໃຫ້ເລືອກ, ເຊິ່ງມີຄວາມຕ້ອງການ ແຮງງານ 200 ກວ່າຄົນ, ພາຍຫລັງສໍາເລັດງານແລ້ວ ຜູ້ທີ່ລົງທະບຽນສະໝັກງານ ຈະຖືກບັນຈຸເຂົ້າເຮັດວຽກ ນໍາບັນດາຫົວໜ່ວຍແຮງງານ ຢ່າງໜ້ອຍ 100 ຄົນ.
ທີ່ມາ: ສຳນັກຂ່າວສານປະເທດລາວ
