ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ
ອົງປະທານສູນກາງອົງການພຸດທະສາສະໜາສັມພັນ ແຫ່ງ ສປປ ລາວ

ປີເກົ່າຜ່ານໄປ ເນື່ອງໃນໂອກາດດິຖີປີໃໝ່ມາເຖິງ ຈຸລະສັກກະຣາດ ໑໓໘໑ ຄ.ສ. 2019 ເຊິ່ງກໍ ໃກ້ຈະເຖິງ ວິສາຂະບູຊາ ປີພຣະພຸດທະສັງກາດ ໒໕໖໒ ໃນເດືອນໜ້ານີ້ ບັນດາທ່ານພຸດທະສາສະນິກະຊົນ ລາວ ແລະ ປະຊາຊົນລາວບັນດາເຜົ່າ ໄດ້ມີການພັກວຽກງານ ທຸຣະກິດ ລັດຖະການ ເພື່ອສະເຫຼີມສະຫຼອງ ບຸນປີໃໝ່ລາວກັນ ເຊິ່ງໃນປີນີ້ ທາງຄະນະລັດຖະບານ ໄດ້ມີແຈ້ງການປະກາດຊົດເຊີຍ ໃຫ້ພວກເຮົາພັກ ຈົນເຖິງ ວັນທີ 17 ເມສາ ດັ່ງນັ້ນ ໂອກາດທີ່ພວກເຮົາທັງຫຼາຍໄດ້ພັກຜ່ອນ ແລະມ່ວນຊື່ນເບີກບານ ຕໍ່ ການສະຫຼອງບຸນປີໃໝ່ ຫຼື ເທດສະການປີໃໝ່ລາວ ກໍມີເວລາຫຼາຍວັນຂຶ້ນ.

ຢ່າງໃດກໍຕາມ ເນື່ອງໃນໂອກາດວັນບຸນປີໃໝ່ລາວມາເຖິງ ທາງລັດຖະການ ໄດ້ຢຸດພັກວຽກງານ ໃຫ້ຫຼາຍວັນ ນອກຈາກການຫຼິ້ນກິນມ່ວນຊື່ນ ຕາມຄອງທຳມະດາຂອງໂລກແລ້ວ ກໍຢາກຝາກເຖິງບັນດາ ທ່ານທັງຫຼາຍ ສະເຫຼີມສະຫຼອງບຸນປີໃໝ່ລາວ ໂດຍໃຫ້ໄດ້ທັງຄວາມມ່ວນ ແລະເນື້ອຫາສາຣະ ພ້ອມທັງ ຄຸນປະໂຫຍດ ຈາກການສະຫຼອງປີໃໝ່ລາວເຮົາດ້ວຍ ຄື ເອົາເວລາຢຸດພັກວຽກງານນັ້ນ ແບ່ງໄປທຳສິ່ງທີ່ເປັນສາຣະປະໂຫຍດນຳ ເຊັ່ນ ກັບໄປຫາພໍ່ແມ່ ລູງປ້າອາວອາ ຍາດພີ່ນ້ອງ ເພື່ອເຕົ້າໂຮມຄວາມສາມັກຄີ ໃນໝູ່ຄະນະຍາດ ພ້ອມກັນນັ້ນ ກໍຈະໄດ້ຫົດສົງ ເພື່ອຂໍຄາຣະວະສົມມາ ໃນການກະທຳ ຄຳເວົ້າ ແລະຄຳຄິດ ບາງສິ່ງບາງຢ່າງ ເຮົາອາດຈະຫຼົງລ່ວງເກີນ ປະໝາດພາດພັ້ງຕໍ່ເພິ່ນ ເມື່ອມີໂອກາດເວລາ ຂຶ້ນປີໃໝ່ມາ ເຖິງ ກໍໄປທຳພິທີຄາຣະວະສົມມາ ການທີ່ບຸກຄົນມີຄວາມຮູ້ສຶກຮັບຜິດຊອບຊົ່ວດີໄດ້ ນັ້ນເປັນຫົນທາງ ແຫ່ງຄວາມຈະເຣີນຂອງຊີວິດ ແລະ ໃນນັ້ນ ກໍຈະໄດ້ຂໍບຸນຂໍຄຸນຈາກພໍ່ແມ່ ລູງປ້າອາວອາ ຍາດຕິພີ່ນ້ອງ ຜູ້ ໃຫຍ່ໃນວົງຕະກູນ ຄຳປາກເວົ້າຂອງພໍ່ແມ່ ເປັນສິ່ງສັກສິດ ໃຫ້ເພິ່ນອຳນວຍອວຍພອນໃຫ້ ຊີວິດຈະມີ ຄວາມຈະເຣີນຮຸ່ງເຮືອງ.

ແລະສື່ທັມຄຳສອນ ໃນການນຳເອົານຳ້ ມາຮົດສົງ ໃນໂອກາດບຸນປີໃໝ່ລາວກໍຄື ສອນໃຫ້ມີ ຄວາມສາມັກຄີ ດ້ວຍວ່ານຳ້ ບໍ່ມີໃຜຈະມາຕັດແຍກນຳ້ອອກຈາກກັນໄດ້ ຖ້າແຍກອອກໄປແລ້ວ ເມື່ອນຳມາເທລວມກັນ ນຳ້ກໍລວມເຂົ້າເປັນອັນດຽວກັນໄດ້ ການທີ່ດຳຣົງຕົນຢູ່ໃນສັງຄົມ ຕ້ອງມີຄວາມຮັກ ຄວາມສາມັກຄີກັນ ຈຶ່ງຈະມີກຳລັງພັດທະນາ ສ້າງສາສັງຄົມບ້ານເມືອງໃຫ້ຈະເຣີນຮຸ່ງເຮືອງກ້າວໜ້າໄດ້ ນຳ້ສອນໃຫ້ມີໃຈສະຫງົບເຢັນ ນຳ້ໂດຍທຳມະຊາດ ຈະມີຄວາມເຢັນໃນຕົວ ເມື່ອຮ້ອນອົບເອົ້າ ອາບນຳ້ ແລ້ວກໍເຢັນສະບາຍ ເມື່ອຫິວກະຫາຍ ດື່ມນຳ້ແລ້ວກໍສຸກອີ່ມສະບາຍ ຈິດໃຈກໍໃຫ້ສະຫງົບເຢັນເໝືອນນຳ້ ຈະທຳການອັນໃດ ຫຼືເວົ້າສິ່ງໃດ ກໍທຳຄວາມຄວາມສະຫງົບເຢັນ ສຸຂຸມຮອບຄອບ ຄິດພິຈາລະນາດ້ວຍ ຈິດໃຈ ແລະປັນຍາກ່ອນ ຈຶ່ງກະທຳລົງໄປ ຫຼືເວົ້າອອກໄປ ຢ່າໄປກະທຳກ່ອນ ຈຶ່ງມາຄິດຕາມຫຼັງ ເພາະຈະ ເກີດຄວາມເພພັງເສຍຫາຍ ນຳ້ສອນໃຫ້ລະຈາກຄວາມຊົ່ວ ປະພຶດແຕ່ຄວາມດີ ດ້ວຍວ່າ ນຳ້ຍ່ອມຊຳຮະສິ່ງ ສົກກະປົກເປິເປື້ອນ ໃຫ້ສະອາດໄດ້ ເໝືອນການທຳຄຸນງາມຄວາມດີ ຄິດດີ ເວົ້າດີ ເຮັດດີ ຍ່ອມຊຳຮະລ້າງ ສິ່ງທີ່ຊົ່ວ ສົກກະປົກເປິເປື້ອນອອກໄດ້ ດ້ວຍເຫດນັ້ນ ເມທີຊົນ ບັນພະບຸຣຸດພວກເຮົາ ຈຶ່ງນຳເອົານຳ້ມາ ເປັນເຄື່ອງໃຊ້ຫຼິ້ນບຸນປີໃໝ່ລາວ ໂດຍຈຸດປະສົງກໍຄື ຄວາມເຢັນສະບາຍທາງກາຍ ຊື່ນໃຈ ປອດໂປງໂລ່ງ ເບົາ ແລະສື່ສອນທັມຄວາມໝາຍ ຕາມທີ່ກ່າວມາໂດຍຫຍໍ້ນັ້ນ ເພາະນັ້ນ ກໍໃຫ້ນຳເອົານຳ້ສະອາດບໍຣິສຸດ ໄປຮົດສົງກັນ ຕາມປະສົງຄວາມໝາຍ ຂອງພໍ່ແມ່ບູຮານເຮົາພາກັນເຮັດສືບກັນມາ ແລະຮົດສົງດ້ວຍ ຄວາມສຸພາບ ມາລະຍາດຕາມແບບຮີດຄອງລາວ ຢ່າໄດ້ພາກັນເອົານຳ້ສີ ນຳ້ເປື້ອນ ຫຼື ນຳ້ກ້ອນ ຮົດຮວາດສາດໂຍນໃສ່ກັນ ຈະເກີດຄວາມເສຍຫາຍ ອຸບັດເຫດເພດໄພຈະຕາມມາ.

ບ່ອນສະແດງໂຄສະນາ

ພ້ອມກັນນັ້ນ ກໍໃຊ້ເວລາ ໂອກາດ ໄປເຮັດບຸນ ສ້າງຄຸນງາມຄວາມດີດ້ວຍການໃຫ້ທານ ຮັກສາ ສີລ ຟັງທັມ ທີ່ວັດ ແລະທຳບຸນດ້ວຍການຮົດສົງພຣະພຸດທະຮູບ ຮົດສົງພຣະສົງອົງຄະເຈົ້າ ຄູບາອາຈານ ພໍ່ ແມ່ ປູ່ຍ່າ ຕານາຍ ເປັນຜູ້ຊົງໄວ້ເຊິ່ງບຸນຄຸນກັບເຮົາ ຄູບາອາຈານ ລູງປ້າອາວອາ ເຖົ້າແກ່ ກໍເໝືອນກັນ ເປັນຜູ້ມີຄຸນຕໍ່ລູກຕໍ່ຫຼານ ເຮົາຈຶ່ງໄປຮົດສົງຂໍບຸນຂໍຄຸນນຳ ສ່ວນພຣະພຸດທະຮູບ ເປັນເຄື່ອງລະນຶກເຖິງພຣະ ພຸດທະເຈົ້າ ພຣະສົງອົງຄະເຈົ້າ ເປັນຜູ້ຊົງຄຸນສີລຄຸນທັມ ເຮົາໄປຮົດສົງກໍເປັນບຸນກຸສົນແກ່ຊີວິດ.

ຫຼັກສຳຄັນອີກ ໃນການຫຼິ້ນບຸນປີໃໝ່ລາວ ທີ່ຢາກຝາກບັນດາພໍ່ແມ່ພີ່ນ້ອງ ຄື ອັບປະມາທະທັມ ໝາຍເຖິງ ຄວາມບໍ່ປະໝາດ ພຣະພຸດທະເຈົ້າ ໄດ້ຊົງຕັດເຕື່ອນໄວ້ວ່າ ອັບປະມາໂທ ອະມະຕັງ ປະທັງ ປະມາໂທ ມັດຈຸໂນ ປະທັງ ແປວ່າ ຄວາມປະໝາດ ເປັນທາງແຫ່ງຄວາມຕາຍ ຄວາມບໍ່ປະໝາດ ເປັນທາງ ບໍ່ຕາຍ ເພາະສະນັ້ນ ການຫຼິ້ນກິນມ່ວນຊື່ນແນວໃດກໍຕາມ ກໍຕ້ອງເຮັດໃຫ້ພໍດີ ຢ່າເຮັດໃຫ້ເກີນພໍດີ ຖ້າເຮັດພໍດີ ຈະດີໝົດທຸກຢ່າງ ແຕ່ຖ້າເຮັດເກີນພໍດີ ຈະເສຍໝົດທຸກຢ່າງເໝືອນກັນ ດັ່ງນັ້ນ ຕ້ອງເຮັດດ້ວຍ ຄວາມພໍດີ ກະທຳການດ້ວຍຄວາມບໍ່ປະໝາດ ມີສະຕິລະມັດລະວັງ ໂດຍສະເພາະໃນການໄປມາ ການຂັບ ຂີ່ຍານພາຫະນະ ທັງນ້ອຍທັງໃຫຍ່ ບໍ່ປ່ອຍປະລະເລີຍ ບໍ່ປ່ອຍໂຕ ຖ້າຫາກຂາດສະຕິ ປະໝາດຍາມໃດ ບັນຫາ ອຸບັດເຫດເພດໄພຕ່າງໆ ກໍເກີດຂຶ້ນຕາມມາ ຈະເຮັດໃຫ້ເສຍຫາຍ ທັງແກ່ຊັບສິນສົມບັດ ຕະຫຼອດ ຮອດຊີວິດຂອງຕົນ ແລະຜູ້ອື່ນ ຖ້າມີສະຕິລະມັດລະວັງ ບໍ່ປະໝາດ ກໍຈະຫຼິ້ນບຸນສະຫຼອງປີໃໝ່ລາວ ດ້ວຍ ຄວາມສະໜຸກສະໜານ ແລະ ເປັນສຸກໄດ້ຢ່າງຄຸ້ມຄ່າ ສົມເວລາພັກທີ່ທາງລັດຖະການເພິ່ນອະນຸຍາດໃຫ້.

ເນື່ອງໃນໂອກາດປີໃໝ່ລາວເຮົາມາເຖິງນີ້ ຂ້າພະເຈົ້າ ໃນນາມອົງການພຸດທະສາສະໜາສັມພັນ ແຫ່ງ ສປປ ລາວ ຂໍນ້ອມນຳອາຣາທະນາ ເອົາຄຸນແກ້ວອັນປະເສີດທັງສາມ ຄື ພຣະພຸດທະເຈົ້າ ພຣະທັມມະເຈົ້າ ແລະ ພຣະສັງຄະເຈົ້າ ພ້ອມທັງຄຸນງາມຄວາມດີທີ່ໄດ້ກະທຳແລ້ວ ຂໍນຳມາອຳນວຍອວຍພອນ ໃຫ້ແກ່ບັນດາທ່ານພຸດທະສາສະນິກະຊົນ ແລະປະຊາຊົນລາວບັນດາເຜົ່າທັງໝົດທັງປວງ ຈົ່ງປະສົບພົບແຕ່ ຄວາມສຸກຄວາມຈະເຣີນ ຫາຍທຸກ ຫາຍໂສກ ຫາຍໂຣກໄພ ຫາຍພະຍາດໂຣຄາ ອຸປະສັກປັນຫາທັງຫຼາຍ ທັງປວງ ຈົ່ງຈະເຣີນຂຶ້ນໃນຊີວິດ ທຸລະກິດການງານ ໜ້າທີ່ຕຳແໜ່ງ ແລະຄຸນທັມ ປັນຍາອັນປະເສີດ ລາບ ຜົນ ດັ່ງປາຖະນາ ໝົດທຸກທ່ານ ທຸກຄົນເທີ້ນ.

ສາທຸ ສາທຸ ສາທຸ

ທີ່​ມາ:
ສູນກາງອົງການພຸດທະສາສະໜາສຳພັນ ແຫ່ງ ສປປ ລາວ

Hits: 4

ບ່ອນສະແດງໂຄສະນາ

ອອກ​ຈາກ REPLY ເປັນ

ກະລຸນາໃສ່ຄໍາເຫັນຂອງທ່ານ!
ກະລຸນາໃສ່ຊື່ຂອງທ່ານທີ່ນີ້