ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ອໍານາດການປົກຄອງເມືອງວັງວຽງ ແຈ້ງໃຫ້ຮູ້ວ່າ: ບັນຫານ້ຳທີ່ເປັນສີດຳ (ດຳຄືຖ່ານໄຟ) ທີ່ໄຫລອອກມາຈາກເຂດເຈາະອຸໂມງ ໂຄງການທາງລົດໄຟ ລາວ-ຈີນ ແລ້ວໄຫລລົງສູ່ນໍ້າຊອງ ເປັນຄວາມຈິງ, ແຕ່ນ້ຳດັ່ງກ່າວ ບໍ່ມີສານພິດ ຫລືສານເຄມີ, ບໍ່ໄດ້ສົ່ງຜົນກະທົບຕໍ່ຂະແໜງການທ່ອງທ່ຽວ ຄືດັ່ງກະແສຂ່າວ ໃນສື່ສັງຄົມອອນລາຍ ໄດ້ນຳສະເໜີ.

ທ່ານ ຄຳຜອງ ດວງວິໄລ ເຈົ້າເມືອງໆວັງວຽງ ໄດ້ໃຫ້ສຳພາດຕໍ່ນັກຂ່າວມື້ວານ ນີ້ວ່າ: ສາເຫດທີ່ເຮັດໃຫ້ນໍ້າດໍາໄຫລລົງສູ່ນໍ້າຊອງຢູ່ເຂດບ້ານຜາຕັ້ງ ໃນວັນທີ 10 ພະຈິກ 2018, ເນື່ອງມາຈາກການເຈາະອຸໂມງ ແລ້ວໄປພົບບໍ່ນ້ຳໃຫຍ່ ແລ້ວເຮັດໃຫ້ນໍ້າຈຳນວນຫລາຍ ໄຫລຊຸເອົາຕົມ, ດິນທີ່ເປັນສີດຳອອກມາ ເຮັດໃຫ້ທໍ່ລະບາຍນ້ຳ ໄປສູ່ອ່າງບຳ ບັດນ້ຳເສຍແຕກ, ຈຶ່ງເຮັດໃຫ້ນ້ຳດຳໄຫລລົງສູ່ນໍ້າຊອງ ປະມານ 3-4 ຊົ່ວໂມງ ຫລັງ ຈາກເກີດເຫດ ແລະ ວິຊາການກໍໄດ້ມີການແກ້ໄຂຢ່າງຮີບດ່ວນ ເພື່ອຢຸດບໍ່ໃຫ້ນໍ້າດັ່ງກ່າວ ໄຫລລົງສູ່ນໍ້າຊອງ ແລະ ແກ້ໄຂປ່ຽນທໍ່ລະບາຍນໍ້າສຳເລັດພາຍໃນ 2 ວັນ, ຊຶ່ງປັດຈຸບັນ ໄດ້ລະບາຍນໍ້າລົງສູ່ອ່າງບຳບັດເປັນປົກກະຕິແລ້ວ.

ອຳນາດການປົກຄອງເມືອງວັງວຽງ ແລະ ວິຊາການ ທີ່ກ່ຽວຂ້ອງ ເປັນຕົ້ນແມ່ນ ຂະແໜງຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ພ້ອມກັນລົງໄປກວດເບິ່ງ ພາຍຫລັງທີ່ໄດ້ຮັບຂ່າວດັ່ງກ່າວ ແລະ ພົບວ່າ ບໍ່ມີສິ່ງຜິດປົກກະຕິ, ບໍ່ມີກໍລະນີປາຕາຍ ແລະ ຜົນກະທົບດ້ານອື່ນໆ ຕໍ່ນ້ຳຊອງ ຄືດັ່ງກະແສຂ່າວໃນສື່ສັງຄົມອອນລາຍ. ເນື່ອງຈາກວ່າການເຈາະອຸໂມງ ຈະໃຊ້ພຽງແຕ່ດິນລະເບີດ, ບໍ່ມີສານເຄມີໃດໆ (ຕາມການລາຍງານ ຂອງວິຊາການເຈາະອຸໂມງ ຕໍ່ຄະນະລົງກວດກາ) ແລະ ໃນຂະນະດຽວກັນ ກໍຍັງບໍ່ທັນພົບເຫັນກໍລະນີ ມີນັກທ່ອງທ່ຽວເກີດຕຸ່ມ ຫລື ຄັນຄາຍ ຈາກການຫລິ້ນນໍ້າ.

ບ່ອນສະແດງໂຄສະນາ

ທ່ານ ຄຳຜອງ ດວງວິໄລ ກ່າວຕື່ມວ່າ: ເພື່ອສ້າງຄວາມໝັ້ນໃຈຕໍ່ປະຊາຊົນລາວ ກໍຄື ບັນດານັກທ່ອງທ່ຽວ ແລະ ຮັບປະກັນວ່າ ນ້ຳດຳດັ່ງກ່າວ ບໍ່ມີສານພິດ ຫລື ສານເຄມີ, ພວກເຮົາໄດ້ເຊີນເອົາພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ ແລະ ພາກສ່ວນທີ່ກ່ຽວຂ້ອງ ລົງມາກວດກາຄືນອີກ, ພ້ອມທັງເອົາຕົວຢ່າງນ້ຳດັ່ງກ່າວ ໄປວິໄຈໃຫ້ລະອຽດຕື່ມອີກ.

ໄລຍະນໍ້າຊອງ ຈາກເຂດບ້ານຜາຕັ້ງ ຫາຕົວເມືອງວັງວຽງປະມານ 12 ກິໂລແມັດ, ປັດຈຸບັນ ນໍ້າຊອງແມ່ນມີສະພາບປົກກະຕິ ແລະ ນັກທ່ອງທ່ຽວ ຍັງທ່ຽວຊົມ ແລະ ຫ໌ິ້ນກິດຈະກຳຕ່າງໆ ຕາມລຳນ້ຳຊອງເປັນປົກກະຕິ.

Cr.KPL
ຮູບພາບ: http://kidork.com/

Hits: 6

ບ່ອນສະແດງໂຄສະນາ

ອອກ​ຈາກ REPLY ເປັນ

ກະລຸນາໃສ່ຄໍາເຫັນຂອງທ່ານ!
ກະລຸນາໃສ່ຊື່ຂອງທ່ານທີ່ນີ້