ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ທີ່ ເມືອງຮຸນ ແຂວງ ອຸດົມໄຊ ມີປ່າແຫ່ງໜື່ງຊື່ວ່າ “ປ່າໄມ້ລຳທຽນ” ຕັ້ງຢູ່ບ້ານຈອມແລງ ຫ່າງຈາກເທດສະບານເມືອງ ປະມານ 23 ກິໂລແມັດ, ສະພາບເສັ້ນທາງແມ່ນເປັນເສັ້ນທາງດິນແດງ ສາມາດທຽວໄດ້ລະດູດຽວ.

ຈຸດເດັ່ນຂອງປ່າແຫ່ງນີ້ ແມ່ນລັກສະນະຂອງຕົ້ນໄມ້ສູງຍາວ ບໍ່ມີງ່າຄ້າຍຄືກັບລຳທຽນທີ່ເກີດຂຶ້ນໂດຍທຳມະຊາດ ຊຶ່ງກວມເອົາຫຼາຍເຮັກຕາ

ຕາມການເລົ່າຕໍ່ໆກັນມາຂອງປະຊາຊົນບ້ານຈອມແລງ ວ່າ: ຕົ້ນໄມ້ລຳທຽນ ແລະ ໜອງຫຼົ່ມແຫ່ງນີ້ ແຕ່ປາງກ່ອນມີປະຊາຊົນໃນບ້ານຈອມແລງ (ໃນອະດີດ) ໄດ້ຟານດ່ອນໂຕໜຶ່ງ ແລ້ວມາແບ່ງປັນຊີ້ນຟານນັ້ນ ໃຫ້ແຕ່ລະຫຼັງຄາເຮືອນກິນ ແຕ່ຍັງມີຄອບຄົວແມ່ໝ້າຍຄອບຄົວໜຶ່ງ ບໍ່ກ້າເອົາຊີ້ນ ນັ້ນມາປຸງແຕ່ງກິນກໍເລີຍເອົາຊີ້ນຟານດັ່ງກ່າວ ໄປຫ້ອຍໄວ້ ຢູ່ເສົາຊານເຮືອນ.

ບ່ອນສະແດງໂຄສະນາ

ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ຕໍ່ມາໃນຄ່ຳຄືນຂອງມື້ນັ້ນຈິ່ງເກີດມີຝົນຕົກ ຟ້າຮ້ອງລົມຢ່າງແຮງ ຢ່າງໜັກ ແລະ ໃກ້ຂ້ອນແຈ້ງຈຶ່ງເກີດມີຂະບວນຂອງເງືອກມາພັດທະລົ່ມເອົາເຮືອນ ຂອງປະຊາຊົນຊາວ ບ້ານຈອມແລງ ຕາຍທັງໝົດຍັງເຫຼືອແຕ່ແມ່ໝ້າຍ ຜູ້ທີ່ບໍ່ກ້າກິນ ຊີ້ນຟານດ່ອນດັ່ງກ່າວ. ແມ່ໝ້າຍຄົນນັ້ນ ເຫັນຄົນອື່ນໃນ ໝູ່ບ້ານຕາຍໝົດ ລາວກໍຄິດຢາກຕາຍນຳເຂົາເຈົ້າ ລາວເບິ່ງບ່ອນໃດ ເປັນວັງນ້ຳເລິກ ລາວກໍ່ໄດ້ໂດດລົງໄປ ເພື່ອຂ້າໂຕເອງຕາຍ ແຕ່ເມື່ອໂດດລົງ ບ່ອນທີ່ເປັນນ້ຳວັງ ເລິກ ກໍ່ກາຍເປັນບົກ, ເປັນໂພນຂຶ້ນ ຍ້ອນລາວບໍ່ໄດ້ກິນ ຊີ້ນຟານດ່ອນ ເງືອກຈິ່ງບໍ່ຕ້ອງການລາວ. ເຂດບ້ານດັ່ງກ່າວ ກໍເລີຍເປັນໜອງ. ແຕ່ປະຈຸບັນຍັງມີຮ່ອງຮອຍ ໃຫ້ເຫັນເຊັ່ນ: ໂນນໂພນ ທີ່ແມ່ໝ້າຍກະໂດດ, ໂນນເຮືອນ ຂອງແມ່ໝ້າຍ.


ຕໍ່ມາ ໃນບໍລິເວນບ້ານ ຫຼື ໜອງເກີດມີ ຕົ້ນໄມ້ໃຫຍ່, ຍາວ, ລຳຊື່, ບໍ່ມີງ່າ ຄືກັບລຳທຽນ. ດັ່ງນັ້ນ, ຊາວເມືອງຮຸນ ຈຶ່ງພາກັນເອີ້ນຊື່ວ່າ “ໜອງຕົ້ນໄມ້ລຳທຽນ”. ສ່ວນຕົ້ນໄມ້ ລຳທຽນ ທີ່ກ່າວມານີ້ ແມ່ນໄດ້ເກີດ ຂຶ້ນມາພາຍຫຼັງ ມີການຫລົ່ມບ້ານເປັນໜອງ.

ແລະ ເມື່ອບໍ່ດົນມານີ້, ໃນວັນທີ 17 ກໍລະກົດ 2020 ປະຊາຊົນບ້ານຈອມແລງ ກໍ່ໄດ້ພົບເສົາເຮືອນເກົ່າແກ່ບູຮານຟູຂຶ້ນຈາກໜອງລົ່ມ ປ່າໄມ້ລໍາທຽນ

ໂດຍມີປະຊາຊົນໄດ້ໄປລ້ຽງງົວຢູ່ຂອບເຂດໜອງລົ່ມ ປ່າໄມ້ລໍາທຽນ ເລີຍພົບເຫັນເສົາເຮືອນເກົ່າບູຮານຟູຂຶ້ນຈາກໜອງລົ່ມ ປ່າໄມ້ລໍາທຽນ ມີຄວາມຍາວ 3,60 ຊັງຕີແມັດ ແລະ ໜ້າຕ້າງກວ້າງ 30 ຊັງຕີແມັດ

ເຊີ່ງປະຊາຊົນໄດ້ເລົ່າວ່າ ນາງກໍ່າ ຜູ້ເປັນເມຍຂອງທ້າວ ເຊິງ (ຜູ້ພົບເສົາເຮືອນບູຮານ) ໄດ້ຝັນວ່າ ໄປລ້ຽງງົວ, ຄວາຍ ຢູ່ກາງໜອງ ແລະ ດຶງ ງົວຄວາຍ ຂຶ້ນມາຈາກໜອງແຕ່ໃນເມື່ອດຶງຂຶ້ນມາແລ້ວບໍ່ແມ່ນງົວຄວາຍແຕ່ເປັນຜູ້ເຖົ້າຫົວລ້ານບໍ່ນຸ່ງເຄື່ອງ

ເຊີ່ງປະຊາຊົນໄດ້ສັນນິຖານວ່າ: ໃນສະໄໝກ່ອນໄດ້ມີປະຊາຊົນດໍາລົງຊີວິດຕັ້ງບ້ານເຮືອນຢູ່ກາງໜອງໃນປະຈຸບັນແຕ່ໃນໄລຍະນັ້ນຊາວບ້ານໄດ້ກິນງູເຫຼືອມ ແລະ ຟານດ່ອນຕົກມາໃນກາງຄືນເກີດມີປະກົດການແປກປະຫຼາດຂຶ້ນ ເກີດມີຟ້າລົມຝົນຕົກພາຍຸແຮງເຮັດໃຫ້ດີນ, ເຮືອນຂອງປະຊາຊົນເຂດດັ່ງກ່າວຍຸບລົງກາຍເປັນໜອງຈົມໄປກັບພຶ້ນດີນ ໃນເຫດການດັ່ງກ່າວນີ້ເຫຼືອພຽງແຕ່ເຮືອນແມ່ໝ້າຍ 1 ຫຼັງທີ່ບໍ່ໄດ້ກິນຟານດ່ອນ

ຂອບໃຈຂໍ້ມູນ: ອົງການພັດທະນາການທ່ອງທ່ຽວ, ຂ່າວ ເມືອງຮຸນ

LEAVE A REPLY

Please enter your comment!
Please enter your name here