ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ອາກາດໃນບ້ານເຮົາເລີ່ມມີບັນຍາກາດທີ່ເຢັນລົງແນ່ແລ້ວ ເຊີ່ງຫຼາຍໆຄົນກໍ່ຄົງຢາກຈະນອນແຊ່ນໍ້າຮ້ອນ ເພື່ອຜ່ອນຄາຍສະບາຍໂຕ ໃນມື້ພັກຜ່ອນ ຫຼື ໃຜທີ່ກຳລັງມີແຜນຈະໄປທ່ຽວກັບຄອບຄົວໃນທ້າຍປີນີ້ ກໍ່ສາມາດພາຄອບຄົວໄປພັກຜ່ອນໄດ້ເຊັ່ນກັນ

ມື້ນີ້ ອິນໄຊລາວ ມີແຫຼ່ງບໍ່ນໍ້າຮ້ອນ ທີ່ຢູ່ທ່າມກາງທຳມະຊາດ ໃຫ້ທຸກຄົນໄດ້ໄປແຊ່ກັນ ແຖມດີຕໍ່ສຸຂະພາບ ທີ່ບໍ່ຕ້ອງຖ້າໃຫ້ດ່ານເປີດແລ້ວຈື່ງຄ່ອຍໄປແຊ່ອອນເຊັນທີ່ຍີ່ປຸ່ນ ເຮົາກໍ່ສາມາດແຊ່ອອນເຊັນແບບຟິນໆຢູ່ບ້ານເຮົາໄດ້ ຈະມີຢູ່ໃສ່ແນ່ ເຮົາມາເບີ່ງກັນເລີຍ  

1. ບໍ່ນ້ຳຮ້ອນເມືອງຄຳ ແຂວງຊຽງຂວາງ

ບ່ອນສະແດງໂຄສະນາ

ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ບໍ່ນໍ້າຮ້ອນແຫ່ງນີ້, ຫ່າງຈາກເທດສະບານເມືອງຄຳ ໄປຕາມສາຍທາງ ເລກທີ 7 ທາງທິດຕາເວັນອອກສ່ຽງໃຕ້ ປະມານ 17 ກິໂລແມັດ, ເປັນບໍ່ນ້ຳຮ້ອນທຳມະຊາດ ທີ່ມີຄວາມຮ້ອນ ປະມານ 40 ອົງສາ.

ບໍລິເວນອ້ອມຂ້າງ ປະກອບດ້ວຍຕົ້ນໄມ້ໃຫ່ຍນາໆຊະນິດ ເຊິ່ງປະຊາຊົນເຊື່ອວ່າ ເປັນດົງສັກສິດມາແຕ່ດົນນານ, ເໝາະແກ່ການມາພັກຜ່ອນຢ່ອນໃຈຂອງນັກທ່ອງທ່ຽວ ທີ່ມີຄວາມຕ້ອງການອາບນ້ຳແຮ່ ແລະ ພັກຜ່ອນໃນບ່ອນທີ່ມີປ່າໄມ້ທີ່ຮົ່ມເຢັນ.

2. ບໍ່ນໍ້າຮ້ອນ ເມືອງວຽງທອງ ແຂວງຫົວພັນ  

ຕັ້ງຢູ່ບ້ານສໍາພັນທອງ ຫ່າງຈາກເທດສະບານ ເມືອງວຽງທອງ 2 ກິໂລແມັດ. ເປັນແຫຼ່ງທ່ອງທ່ຽວບໍ່ນ້ຳຮ້ອນທຳມະຊາດ ທີ່ມີຄວາມຮ້ອນເຖິງ 90 ອົງສາ, ຈຸດທີ່ຮ້ອນທີ່ສຸດ ນ້ຳຈະຟົດ ແລະ ມີອາຍຢູ່ຕະຫຼອດເວລາ. ມີທາງລົດເຂົ້າເຖິງ ບໍລິເວນບໍ່ນໍ້າຮ້ອນ, ມີບ່ອນຈອດລົດ, ມີເຮືອນຂາຍປີ້, ມີອ່າງອາບ-ແຊ່ ສຳລັບນັກທ່ອງທ່ຽວ ແລະ ມີບ່ອນອາບສຳລັບຊາວບ້ານ.

3. ບໍ່ນ້ຳຮ້ອນ ບ້ານ ນາເມືອງ ແຂວງຫົວພັນ

ຕັ້ງ​ຫ່າງ​ຈາກ​ບ້ານ​ນາ​ເມືອງ ປະມານ 1 ກິ​ໂລ​ແມັດ ​ແລະ ຫ່າງ​ຈາກ​ເທສະບານ​ແຂວງ 22 ກິ​ໂລ​ແມັດ​​. ເປັນບໍ່ນໍ້າຮ້ອນທໍາມະຊາດ ທີ່ມີຄວາມຮ້ອນພໍສົມຄວນ. ເປັນແຫຼ່ງທ່ອງທ່ຽວ ທີ່ມີຄວາມງາມ ແລະ ໄດ້ຮັບຄວາມນິຍົມຈາກ ນັກທ່ອງທ່ຽວພາຍໃນ ເພາະຕັ້ງຢູ່ບໍ່ໄກຈາກ ເທດສະບານແຂວງ, ລົດ​ໃຫ່ຍ ແລະ ລົດຈັກ​ສາມາດ​ເຂົ້າ​ເຖິງ, ມີ​ອ່າງ​ອາບ-ແຊ່ ​ແລະ ອ່າງ​ອາບ​ກາງ​ແຈ້ງ​ສຳລັບ​ຊາວບ້ານ.

4. ບໍ່ນໍ້າຮ້ອນຢູ່ ເມືອງຮ້ຽມ ແຂວງຫົວພັນ

ບໍ່​ນໍ້າ​ຮ້ອນ​ເມືອງ​ຮ້ຽມຕັ້ງຢູ່ເຂດປ່າສະຫງວນແຫ່ງຊາດນໍ້າແອດ-ພູເລີຍ ຫ່າງຈາກເທສະບານເມືອງ ຊໍາເໜືອໄປທາງທິດຕາເວັນຕົກ 155 ກິໂລແມັດ ເປັນສະຖານທີທ່ອງທ່ຽວທີ່ມີເສັ້ນທາງເຂົ້າໄປເຖິງ. ກ່າວກັນວ່ານີ້ແມ່ນບໍ່ນໍ້າຮ້ອນໃຫຍ່ທີ່ສຸດຢູ່ ສປປ ລາວ ແລະ ກໍ່ມີຄວາມຮ້ອນສູງສຸດເຖິງ 100 ອົງສາ ຊຶ່ງບໍ່ບອກກໍ່ຮູ້ດີວ່າອຸນຫະພູມຂະໜາດນີ້ສາມາດຕົ້ມໄຂ່ ແລະ ປຸງແຕ່ງອາຫານປະເພດອື່ນສຸກໄດ້ພາຍໃນບໍ່ເທົ່າໃດວິນາທີ.

5. ບໍ່ນ້ຳຮ້ອນປຸ່ງເລາະ ເມືອງເມິງ ແຂວງບໍ່ແກ້ວ

 ບໍ່ນໍ້າຮ້ອນ ປຸ່ງເລາະ ເປັນສະຖານທີ່ທ່ອງທ່ຽວທາງທຳມະຊາດທີ່ມີຄວາມສວຍສົດງົດງາມ ເຊິ່ງເປັນບໍ່ນໍ້າຮ້ອນທີ່ເກີດຂຶ້ນຢູ່ທ່າມກາງແມ່ນໍ້າທີ່ເຢັນ, ເປັນສິ່ງທີ່ມະຫັດສະຈັນ ແລະ ສວຍສົດງົດງາມຫຼາຍ ສະຖານທີ່ດັ່ງກ່າວຕັ້ງຢູ່ບ້ານ ປຸ່ງເລາະ ເມືອງເມິງ ແຂວງບໍ່ແກ້ວ ເຊິ່ງເປັນຊາຍແດນລະຫວ່າງເມືອງເມິງ ແລະ ເມືອງຕົ້ນເຜິ້ງ ຫ່າງຈາກຕົວເມືອງ 62 ກມ, ສາມາດເຂົ້າເຖິງໄດ້ຜ່ານ 2 ທາງຄື: ເຂົ້າມາຜ່ານທາງເມືອງຕົ້ນເຜິ້ງ ຫຼື ເຂົ້າມາຜ່ານທາງເມືອງເມິງກໍ່ໄດ້.

ເປັນແນວໃດ, ສຳລັບສະຖານທີ່ບໍ່ນໍ້າຮ້ອນທີ່ອິນໄຊລາວ ເອົາມາຝາກ ຖ້າທ່ານມີບໍ່ນໍ້າຮ້ອນຈຸດອື່ນຢາກແນະນຳ ກໍ່ສາມາດແນະນຳກັນເຂົ້າມາຕື່ມໄດ້ຜ່ານກ່ອງຄອມເມັ້ນລຸ່ມນີ້

ຂໍ້ມູນ: ຫ້ອງການຖະແຫລງ,ຂ່າວວັດທະນະທຳແລະທ່ອງທ່ຽວເມືອງເມິງ, ອົງການພັດທະນາການທ່ອງທ່ຽວ,

 

LEAVE A REPLY

Please enter your comment!
Please enter your name here