ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ວັນທີ 04 ພະຈິກ 2020 ນີ້, ຢູ່ຫ້ອງວ່າການ ແຂວງສະຫວັນນະເຂດ, ບໍລິສັດ ເບຍລາວ ຈຳກັດ ໄດ້ມອບນ້ຳດື່ມຫົວເສືອ ຂະໜາດ 1,5 ລິດ, ຈຳນວນ 4.000 ແພັກ ລວມມູນຄ່າ 74 ລ້ານກີບ ເພື່ອຊ່ວຍເຫລືອປະຊາຊົນທີ່ປະສົບໄພນ້ຳຖ້ວມໃນແຂວງສະຫວັນນະເຂດ. 

ໃນເດືອນ ຕຸລາ 2020 ທີ່ຜ່ານມານີ້, ເປັນໄລຍະທີ່ມີສະພາບນໍ້າຖ້ວມ ໜັກໜ່ວງ ແລະ ຮຸນແຮງ ໂດຍສະເພາະກໍ່ແມ່ນທີ່ ແຂວງ ສະຫວັນນະເຂດ ເນື່ອງຈາກມີພາຍຸຫຼາຍຫົວ ພັດຜ່ານເຂົ້າເຂດພາກກາງ ແລະ ພາກໃຕ້ ຂອງ ສປປ ລາວ. ຂໍ້ມູນຈາກ ພະແນກພະລັງງານ ແລະ ສະຫວັດດີການສັງຄົມ ແຂວງສະຫວັນນະເຂດ ໃຫ້ຮູ້ວ່າ: ປະຈຸບັນ ປະຊາຊົນ ຢູ່ 8 ເມືອງ ຂອງແຂວງ ປະກອບມີ ເຊໂປນ, ເມືອງນອງ, ວິລະບູລີ, ເມືອງພິນ ແລະ ອີກ 4 ເມືອງຕອນລຸ່ມ ລຽບຕາມລໍານໍ້າ ເຊບັ້ງຫຽງ ເຊັ່ນ: ເມືອງຊົນນະບູລີ, ຈໍາພອນ, ສອງຄອນ ແລະ ທ່າປາງທອງ ແມ່ນໄດ້ຮັບຜົນກະທົບຈາກນໍ້າຖ້ວມໜັກ, ເຮືອນຊານ ແລະ ເສັ້ນທາງ ຫຼາຍຫຼັງເປ່ເພ, ສັດລ້ຽງ ແລະ ຜົນຜະລິດກະສິກໍາ ເສຍຫາຍ ຢ່າງໜັກໜ່ວງ. ເຖິງແມ່ນວ່າ ປະຈຸບັນ ສະພາບນໍ້າຖ້ວມໄດ້ຫຼຸດລົງໄປແລ້ວ, ແຕ່ຄວາມເສຍຫາຍ ແລະ ຄວາມຕ້ອງການ ບັນດາປະຖົມປັດໃຈພື້ນຖານ ເຊັ່ນເຄື່ອງອຸປະໂພກ ບໍລິໂພກ ແມ່ນຍັງມີຄວາມຈໍາເປັນ ຢ່າງຮີບດ່ວນ. 

ເພື່ອແບ່ງປັນ ແລະ ບັນເທົາຄວາມລໍາບາກ ໃຫ້ກັບພໍ່ແມ່ປະຊາຊົນ ທີ່ໄດ້ຮັບຜົນກະທົບຈາກໄພນໍ້າຖ້ວມ ຢູ່ແຂວງສະຫວັນນະເຂດ, ທາງບໍລິສັດເບຍລາວ ຈໍາກັດ ໄດ້ປະກອບສ່ວນນໍ້າດື່ມກາຫົວເສືອ ຈຳນວນ 4.000 ແພັກ, ຊຶ່ງກ່າວມອບໂດຍທ່ານ ໃຈເພັດ ບູລົມ ຜູ້ຈັດການຝ່າຍຂາຍປະຈຳພາກກາງ ແລະ ຕາງໜ້າຮັບໂດຍ ທ່ານ ທ່ອນແກ້ວ ພຸດທະໄກຍະລາດ, ຮອງເຈົ້າແຂວງ ແຂວງສະຫວັນນະເຂດ ພ້ອມດ້ວຍ ພະນັກງານ ແລະ ພາກສ່ວນກ່ຽວຂ້ອງເຂົ້າຮ່ວມ.

ບ່ອນສະແດງໂຄສະນາ

ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ໃນໂອກາດນີ້, ຕາງຫນ້າໃຫ້ບໍລິສັດເບຍລາວຈຳກັດ ທ່ານ ໃຈເພັດ ບູລົມ ໄດ້ນຳເອົາຄວາມຫວ່ງໃຍ ຂອງບໍລິຫານ, ພະນັກງານ ກໍຄື ຄອບຄົວເບຍລາວ ມາຍັງພໍ່ແມ່ປະຊາຊົນ ຜູ້ປະສົບໄພນໍ້າຖ້ວມ, ພ້ອມທັງຊົມເຊີຍນໍ້າໃຈສາມັກຄີ ຮັກແພງ ຊ່ວຍເຫລືອເຊິ່ງກັນ ແລະ ກັນ ຂອງທຸກພາກສ່ວນ ແລະ ເຊື່ອໝັ້ນວ່າ ພາຍໃຕ້ການ ຊີ້ນຳ-ນຳພາຂອງການຈັດຕັ້ງທຸກຂັ້ນ, ການປະກອບສ່ວນຊ່ວຍເຫລືອ ແລະ ການຮ່ວມມື ຂອງທຸກພາກສ່ວນ ຈະຊ່ວຍເຮັດໃຫ້ການແກ້ໄຂ ແລະ ຟື້ນຟູຜົນກະທົບຄັ້ງນີ້ ຜ່ານໄປໄດ້ໂດຍໄວ.

LEAVE A REPLY

Please enter your comment!
Please enter your name here