ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ອີງຕາມການລາຍງານຂອງ ທ່ານ ທອງລຸນ ສີສຸລິດ ນາຍົກລັດຖະມົນຕິ ແຫ່ງ ສປປ ລາວ ໃນກອງປະຊຸມສະໄຫມສາມັນ ເທື່ອທີ 10 ຂອງສະພາແຫ່ງຊາດ ຊຸດທີ VII, ໃນຄັ້ງວັນທີ 27 ຕຸລາ 2020

ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ແລະ ແຜນເງິນຕາປີ 2020 ແລະ ທິດທາງແຜນການປີ 2021

ເຊິ່ງໃນນັ້ນ, ທ່ານນາຍົກລັດຖະມົນຕີ ໄດ້ລາຍງານເຖິງຜົນສຳເລັດໃນຫຼາຍດ້ານ ແຕ່ຄຽງຄູ່ກັນນັ້ນ ທ່ານຍັງໄດ້ລາຍງານເຖິງບັນດາຂໍ້ຄົງຄ້າງ ແລະ ສິ່ງທ້າທາຍຈໍານວນຫນຶ່ງ ທີ່ລັດຖະບານ ຍັງຈະຕ້ອງໄດ້ສືບຕໍ່ສຸມໃສ່ແກ້ໄຂ ໂດຍມີທັງໝົດ 9 ຂໍ້ຄົງຄ້າງ ແລະ ສິ່ງທ້າທາຍດັ່ງນີ້:

ບ່ອນສະແດງໂຄສະນາ

ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

1. ຄາດຫມາຍມະຫາພາກຈໍານວນຫນຶ່ງ ຄາດວ່າຈະບໍ່ບັນລຸຕາມແຜນ ເປັນຕົ້ນ: GDP, ລາຍຮັບ, ລາຍຈ່າຍ, ອັດຕາເງິນເຟີ້ ແລະ ອື່ນໆ ເນື່ອງຈາກໄດ້ຮັບຜົນກະທົບຈາກການແຜ່ລະບາດພະຍາດ ໂຄວິດ 19 ແລະ ຄວາກຫຍຸ້ງຍາກທາງ ດ້ານການເງິນ-ງົບປະມານ ແລະ ເງິນຕາ;

2. ການປະຕິບັດແຜນງົບປະມານແຫ່ງລັດ ທາງດ້ານລາຍຮັບ ແລະ ລາຍຈ່າຍ ບໍ່ສາມາດບັນລຸໄດ້ຕາມທີ່ສະພາແຫ່ງ ຊາດຮັບຮອງເບື້ອງຕົ້ນ, ຈຶ່ງເຮັດໃຫ້ໄດ້ມີການສະເຫນີດັດແກ້ແຜນງົບປະມານຕໍ່ສະພາແຫ່ງຊາດ. ໃນນັ້ນ, ໄດ້ຕັດແຜນລາຍຈ່າຍລົງຈໍານວນຫນຶ່ງ ຊຶ່ງສົ່ງຜົນກະທົບໂດຍກົງຕໍ່ການຈັດຕັ້ງປະຕິບັດເປົ້າຫມາຍການພັດທະນາຂອງຂະແຫນງການ ແລະ ທ້ອງຖິ່ນ

3. ການຮັກສາສະຖຽນລະພາບທາງດ້ານເງິນຕາແຫ່ງຊາດ ໄດ້ຮັບຄວາມກົດດັນສູງ ໂດຍສະເພາະການຄຸ້ມຄອງອັດຕາແລກປ່ຽນ ຍ້ອນແຫຼ່ງລາຍຮັບເປັນເງິນຕາຕ່າງປະເທດຫຼຸດລົງ ໃນຂະນະທີ່ພັນທະຊໍາລະສະສາງຫນີ້ສິນກັບຕ່າງປະເທດ ສືບຕໍ່ຕ້ອງເອົາໃຈໃສ່ປະຕິບັດຕາມລະບົບ ແລະ ກໍານົດເວລາ, ພື້ນຖານການຜະລິດພາຍໃນ ຍັງບໍ່ທັນຕອບສະຫນອງໄດ້ຄວາມຕ້ອງການຂອງສັງຄົມ

4. ຂໍ້ຈໍາກັດທາງດ້ານໂຄງລ່າງພື້ນຖານ, ສະພາບແວດລ້ອມໃນການດໍາເນີນທຸລະກິດ ແລະ ການລົງທຶນຂອງລັດ ອາດສົ່ງຜົນກະທົບໃຫ້ການລົງທຶນຂອງພາກເອກະຊົນຫຼຸດລົງ

5. ການຊຸກຍູ້ສົ່ງເສີມການຜະລິດ ເພື່ອທົດແທນການນໍາເຂົ້າ ແລະ ເພີ່ມການສົ່ງອອກຍັງບໍ່ທັນຕັ້ງຫນ້າ, ການຄຸ້ມ ຄອງລາຄາສິນຄ້າ ຍັງບໍ່ທັນໄດ້ດີ ເຮັດໃຫ້ອັດຕາເງິນເຟີ້ ມີທ່າອ່ຽງສູງ

6. ການສ້າງສີມືແຮງງານ ເຂົ້າໃນລະບົບ ໂດຍລວມແມ່ນເພີ່ມຂຶ້ນ ແຕ່ແຮງງານທີ່ມີສີມື ແລະ ຄຸນນະພາບສູງ ແມ່ນມີຈໍາກັດ. ພ້ອມນັ້ນ, ໃນໄລຍະການລະບາດຂອງພະຍາດ ໂຄວິດ-19 ນີ້, ເຮັດໃຫ້ອັດຕາການວ່າງງານຂ້ອນຂ້າງສູງ ຊຶ່ງສົ່ງຜົນກະທົບຕໍ່ເສດຖະກິດ-ສັງຄົມ ໃນປັດຈຸບັນ ແລະ ອາດສືບຕໍ່ມີຜົນກະທົບໃນຕໍ່ຫນ້າ

7. ປະກົດການຫຍໍ້ທໍ້ໃນສັງຄົມ ເປັນຕົ້ນ ບັນຫາຢາເສບຕິດ, ການຂີ້ລັກ, ງັດແງະ ແລະ ອຸປະຕິເຫດຕາມທ້ອງຖະຫນົນ ຍັງມີລັກສະນະເພີ່ມຂຶ້ນ

8. ຄຸນນະພາບການຮຽນ-ການສອນ ບາງເຂດ ຍັງບໍ່ທັນເຮັດໄດ້ດີສ່ວນຫນຶ່ງ ກໍ່ຍ້ອນການຂາດແຄນອຸປະກອນ ໂດຍສະເພາະ ແມ່ນໄລຍະທີ່ມີການລະບາດຂອງພະຍາດ ໂຄວິດ 19 ເຖິງວ່າ ມີການຮຽນ-ການສອນ ທາງໄກ ໂດຍຜ່ານ ລະບົບເອເລັກໂຕຣນິກ ແຕ່ກໍ່ເຫັນວ່າ ຍັງບໍ່ທັນໄດ້ຫຼາຍ ແລະ ບໍ່ຄົບຕາມຈໍານວນວິຊາ ຊ່ອງທາງໃນການເຂົ້າເຖິງກຸ່ມເປົ້າ ຫມາຍແບບອື່ນໆ ແລະ ພື້ນຖານວັດຖຸເຕັກນິກ ບໍ່ໄດ້ຖືກອອກແບບໃຫ້ທັນ ເພື່ອຮອງຮັບກັບສະພາບການດັ່ງກ່າວ

9. ການບໍລິການປິ່ນປົວສຸຂະພາບຢູ່ໂຮງຫມໍລັດຈໍານວນຫນຶ່ງ ຍັງເປັນທີ່ຈົ່ມວ່າຂອງສັງຄົມ ແລະ ຍັງບໍ່ທັນເປັນເຈົ້າການປັບປຸງຄຸນນະພາບການບໍລິການ ຢ່າງຮອບດ້ານ ເມື່ອທຽບກັບປະເທດໃກ້ຄຽງ, ຍັງບໍ່ທັນຖືເອົາໂອກາດໃນໄລຍະປີດປະເທດປັບປຸງໃຫ້ມີຄຸນນະພາບ ແລະ ພິສູດຕົນເອງໃຫ້ສັງຄົມຍອມຮັບ ແລະ ເພິ່ງພໍໃຈໃນການບໍລິການເພື່ອໃຫ້ເຂົາເຈົ້າຫັນມານໍາໃຊ້ໂຮງຫມໍພາຍໃນປະເທດໃຫ້ຫຼາຍຂຶ້ນໃນເວລາເປີດປະເທດ.

LEAVE A REPLY

Please enter your comment!
Please enter your name here