ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ເອກະລັກທຸງຊາດລາວ ໄດ້ກ່າວແລ້ວວ່າ ທຸງຊາດລາວມີທີ່ມາແນວໃດເກີດຂຶ້ນເວລາໃດ. ແມ່ນຜູ້ໃດເປັນຜູ້ລິເລີ່ມ ຈິນຕະນາການອອກຫົວຄິດປະດິດ ສ້າງຮູບແບບທຸງຊາດລາວ.

ເວລາສະຫຍາມປົກຄອງລາວ ສະຫຍາມໄດ້ນຳທຸງຊາດສະຫຍາມເຂົ້າມາ, ເວລາຝຣັ່ງປົກຄອງລາວ ຝຣັ່ງກໍ່ນຳທຸງຊາດຝຣັ່ງເຂົ້າມາ ໂດຍທີ່ບໍ່ມີທຸງຊາດ ລາວ, ບໍ່ມີເອກະສານຫຼັກຖານໃດຢັ້ງຢືນພິສູດວ່າມີທຸງຊາດລາວມາກ່ອນນັ້ນ.

ສະນັ້ນ, ຈຶ່ງມີເຫດຜົນໜັກໜ່ວງທີ່ຕ້ອງມີທຸງຊາດຂອງລາວ ໃນເວລາທີ່ລາວ ມີເອກະລາດແລ້ວ ແລະ ແລ້ວ ຄະນະກູ້ຊາດລາວອິດສະຫຼະຕົວຈິງ, ໃນນາມມະຫາຊົນຄົນລາວ, ຈຶ່ງມີມະຕິໃຫ້ມີທຸງຊາດນັບແຕ່ບັດນັ້ນເປັນຕົ້ນມາ.

ບ່ອນສະແດງໂຄສະນາ

ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ເອກະລັກຂອງທຸງຊາດລາວ ຕາມມະຕິດັ້ງເດີມຂອງຜູ້ລິເລີ້ມຈິນຕະນາການ ມີລັກສະນະຖືກຕ້ອງດັ່ງນີ້:

  • ສີຂາວມີຮູບເປັນວົງກົມ ຢູ່ໃນໃຈກາງຂອງແຖບສີແຫຼ້ໝາກຄໍ້ ( ສີຟ້າແກ່ ) ມີຂະໜາດເສັ້ນທາງສູນກາງທໍ່ກັບ 4/5 ຂອງລວງກວ້າງຂອງສີແຫຼ້ ໝາກຄໍ້ (ສີຟ້າແກ່).
  • ສີແຫຼ້ໝາກຄໍ້ (ສີຟ້າແກ່) ເປັນແຖບໆດຽວຢູ່ກາງ, ຍາວຕາມທາງນອນ ອົມເອົາວົງກົມສີຂາວໄວ້ໃຈກາງມີຂະໜາດກວ້າງເທົ່າກັບສອງເທື່ອ ຂອງແຖບສີແດງ.
  • ສີແດງ (ແດງເຂັ້ມ) ເປັນແຖບສອງແຖບເທົ່າກັນ ຍາວຕາມທາງນອນ ຕິດກັບຂອບສອງຂອບຂອງສີຟ້າແກ່ ແຕ່ລະແຖບມີຂະໜາດເທົ່າກັບ ເຄິ່ງໜຶ່ງ (1/2) ຂອງແຖບສີແຫຼ້ໝາກຄໍ້ (ສີຟ້າແກ່). ທັງໝົດນັ້ນ ເມື່ອຕໍ່ຕິດເຂົ້າກັນແລ້ວຈະຕ້ອງໄດ້ຂະໜາດທາງຍາວ ສອງເທົ່າຂອງທາງກວ້າງ.

ຜູ້ຕັດຫຍິບທຸງຊາດລາວຜືນທຳອິດແມ່ນປ້າຄຳຈັນ (ເວລານັ້ນຍັງບໍ່ໃຊ້ນາມສະກຸນ) ປ້າຄຳຈັນ ມີກິດຈະການຕັດຫຍິບປະຈຳຄອບຄົວເປັນອາຊີບ; ມີຈັກຫຍິບສອງຈັກຕັ້ງຢູ່ຫ້ອງຕຶກຊັ້ນດຽວ ໃນຄຸ້ມວັດບ້ານອິນແປງ ຕາແສງວັດຈັນ, ເມືອງຈັນທະບູລີ ກຳແພງນະຄອນຫຼວງວຽງຈັນ ໃນປາງນັ້ນ (ດຽວນີ້ແມ່ນເຂດໜຶ່ງຂອງບ້ານຫາຍໂສກ). ປ້າຄຳຈັນ ຈັດການຕັດຫຍິບທຸງຊາດລາວຕາມການຊີ້ແນະ ແລະ ຕາມຮູບແຜນຜັງຂອງທ້າວ ທຳ ໄຊຍະສິດເສນາ ຜູ້ເປັນນ້ອງຄີງ ແລະ ເປັນປະທານກຳມະການຂອງຂະບວການລາວອິດສະຫຼະກູ້ເອກະລາດ.

ການໃຊ້ທຸງຊາດລາວຜືນປະຈຸບັນ ແມ່ນເລີ້ມໃຊ້ມາແຕ່ວັນກຳເນີດເກີດຂຶ້ນ ຄືວັນທີ 12 ຕຸລາ ຄສ 1954 ຕະຫຼອດມາໂດຍບໍ່ຂາດໄລຍະ. ຫຼັງຈາກ ຄສ 1946 ຮອດປີ 1974, ພວກຈັກກະພັດ ໄດ້ຟື້ນຟູໃຫ້ພະລາຊະວັງຫຼວງພະບາງ ນຳເອົາທຸງຊ້າງສາມຫົວ ຄືນມາໃຊ້ແຂ່ງຊີງລັດສະໝີກັນ ແຕ່ແລ້ວທຸງຊ້າງສາມຫົວກໍ່ໄດ້ເລີກລາຫາຍໄປ.

ເວລານີ້ໃນເວທີສາກົນ ມີທຸງຊາດລາວປິວສະບັດພັດແກ່ວງຢູ່ຍອດເສົາທຸງ ຕັ້ງລຽງລາຍຢູ່ຄູ່ຄຽງກັບທຸງຊາດອື່ນທຸກຊາດ ໃນທຸກສະຖາບັນ ທີ່ສຳຄັນຢ່າງສະເໝີພາບ ຄຽງບ່າຄຽງໄຫຼ່ກັນ. ເປັນຕົ້ນຢູ່ອົງການສະຫະປະຊາຊາດ ທີ່ນະຄອນນິວຢອກສະຫະລັດອາເມລິກາ ແລະ ຢູ່ທຸກເມືອງ ທີ່ມີອົງການນີ້ຕັ້ງຢູ່, ຢູ່ອົງການພຸດທະສາດສະໜາສຳພັນໂລກ ຢູ່ອົງການກິລາເອຊຽນເກມ ຢູ່ອົງການກິລາໂລແລມປິກ. ຢູ່ພາຍໃນປະເທດລາວ ແມ່ນມີທຸງຊາດລາວຕິດຕັ້ງເດຍລະດາດທົ່ວໄປຕາມໂຮງຮຽນ, ຄ້າຍທະຫານ, ຄ້າຍຕຳຫຼວດ, ສຳນັກງານສະຖານທີ່ທາງການ, ຕາມວັດວາອາຮາມ, ຕາມຫົວເຮືອ, ຕາມປີກເຮືອບິນ. ໂດຍສະເພາະໃນວັນສຳຄັນຂອງຊາດ (ວັນຊາດ, ວັນລັດຖະທຳມະນູນ, ວັນກອງທັບ…. ) ມີການປະດັບປະດາ ທຸງຊາດຕາມເຄຫະສະຖານບ້ານເຮືອນ ຕາມຖະໜົນຫົນທາງຢ່າງວີຈິດງົດງາມ ບາງຜ່ອງກໍ່ຈັດດອກໄຟຟ້າສະຫຼັບສີເປັນທຸງຈັນເພັງ. ເວລານັກກິລາ ໄປຮ່ວມເກມກິລາຕ່າງປະເທດ ກໍ່ເອົາທຸງຊາດລາວໄປສະແດງໃຫ້ເຫັນວ່າມີຊາດລາວຢູ່ນຳເພື່ອຊິງໄຊຊະນະ ຄັນໄດ້ໄຊຊະນະ ກໍ່ໂບກທຸງຊາດກວັດແກ່ວງ ໄປມາ ສະແດງກຽດສັກສີຄວາມສາມາດຂອງຊາດລາວທັນທີ. ຊຶ່ງຊາວລາວພາກັນຮ້ອງໂຮສະອອນສະອຶ້ນເຖິງໃຈ.

LEAVE A REPLY

Please enter your comment!
Please enter your name here