ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ວັນທີ 1 ກັນຍາ ຂອງທຸກໆປີ ໄດ້ກຳນົດໃຫ້ເປັນມື້ໄຂສົກຮຽນໃໝ່ ເຊິ່ງໃນທຸກໆປີ ກໍ່ຈະມີສານຈາກ ບຸກຄົນສຳຄັນຕ່າງໆ ທີ່ຝາກເຖິງນ້ອງນັກຮຽນ. ມື້ນີ້ ອິນໄຊລາວ ຈະພາມາຍ້ອນກັບອາດີດໄປອີກ 56 ປີກ່ອນ (1964-1965) ທີ່ປະທານສຸພານຸວົງ ໄດ້ສົ່ງຈົດໝາຍເຖິງບັນດານັກຮຽນໃນໂອກາດໄຂ ສົກຮຽນ 1964-1965 ໂດຍມີເນື້ອໃນດັ່ງນີ້:

ພວກລູກຫຼານນັກຮຽນທີ່ຮັກແພງທັງຫຼາຍ ມື້ນີ້ແມ່ນມື້ໄຂໂຮງຮຽນຂອງສະໄຫມປີຮຽນໃໝ່ . ພວກລູກຫຼານໄດ້ພາກັນເບີກບານ ມ່ວນຊື່ນ ໄປຮຽນ, ປະຊາຊົນໃຜໆກໍສົດຊື່ນເພາະລູກຫຼານເປັນຜູກໍາອະນາຄົດ ອັນຈົບງາມຂອງເມືອງລາວສັນຕິພາບ.

ໃນຊູ່ມື້ນີ້ຈັກກະພັດອາເມລິກາພວມຢຽບຢໍ່າປະເທດຊາດຂອງພວກເຮົາ. ພວກເຂົາໄດ້ບຸກໂຈມຕີບຽດຢຶດເຂດປົດປ່ອຍ, ມ້າງເພການຮໍ່າຮຽນມ່ວນຊື່ນຂອງລູກຫຼານ, ດ້ວຍເຫດນັ້ນ, ພວກລູກຫຼານຈຶ່ງຕ້ອງຄຽດຊັງຈັກກະພັດອາເມລິກາແລະລູກມື. ພວກລູກຫຼານຕ້ອງຮັກຊາດ, ຮັກການອອກແຮງງານແລະຮັກວິທະຍາສາດ.

ບ່ອນສະແດງໂຄສະນາ

ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ໃນສະໄຫມກ່ອນນັກຮຽນໄປຮຽນເພື່ອຫວັງ ເປັນເຈົ້າເປັນນາຍ ເປັນອາດຍາສິດ,ແຕ່ຕົວຈິງແມ່ນເປັນຂີ້ຂ້າຫນ້າຂ້ອຍໃຫ້ພວກຈັກກະພັດວ່າເມືອງຂຶ້ນ, ແຕ່ໃນຊູ່ມື້ນີ້ພວກລູກຫຼານໄປຮຽນແມ່ນ ເພື່ອຮັບໃຊ້ປະເທດຊາດ, ຮັບໃຊ້ປະຊາຊົນແລະຮັບໃຊ້ການຜະລິດຜົນ. ພວກຫຼານຮໍ່າຮຽນ ເພື່ອພາຍຫນ້າຈະໄດ້ເປັນນັກຮົບທີ່ດີ, ເປັນຜູ້ອອກແຮງງານເກັ່ງ, ເປັນພະນັກງານແກ່ນສານຂອງການປະຕິວັດ.

ແຕ່ນີ້ໄປພວກຫຼານຕ້ອງເຂົ້າຮ່ວມໃນການແຂ່ງຂັນຮັກຊາດ ຕ້ານຈັກກະພັດອາເມລິກາຕາມເຫື່ອແຮງຂອງຕົນ. ພວກຫຼານຕ້ອງແຂ່ງຂັນກັນຮໍ່າຮຽນ, ອອກເເຮງເຝິກຝົນຮ່າງກາຍແລະເຂົ້າຮ່ວມວຽກງານສ້າງສັງຄົນໃຫມ່ , ພວກລູກຫຼານຕ້ອງປະຕິບັດຄໍາຂວັນທີ່ວ່າ : ( ເຄົາລົບຄູ, ຮັກແພງໝູ່, ຟັງຄວາມພໍ່ແມ່)

ປະເທດຊາດໄດ້ຝາກຝັ່ງຄວາມຫວັງໄວ້ກັບພວກລູກຫຼານຫຼາຍທີ່ສຸດ ເພາະພວກລູກຫຼານຈະໄດ້ເປັນຜູ້ກໍາອະນາດບ້ານເມືອງສືບຕໍ່ໄປ.

ຂໍຝາກຄວາມຮັກເພງມາຍັງລູກຫຼານທັງຫຼາຍ

ວັນທີ 1 ເດືອນກັນຍາ ປີ 1964

ສະເດັດປະທານສຸພານຸວົງ .

LEAVE A REPLY

Please enter your comment!
Please enter your name here