ເຖິງວ່າທີມງານອິນໄຊລາວ ຈະມີໂອກາດໄດ້ໄປສະຫວັນນະເຂດຫຼາຍຄັ້ງ ແຕ່ຄັ້ງນີ້ ຖືວ່າເປັນຄັ້ງທຳອິດທີ່ເຮົາໄດ້ແວະເຂົ້າໄປທີ່ສວນສັດຫຼັກ 8 (ບ້ານອຸດົມວິໄລ) ຫຼື ໃນປັດຈຸບັນໃສ່ຊື່ວ່າ ສວນອາຫານສະຫວັນມີໄຊ ເຊິ່ງເລີ່ມກັບມາເປີດໃຫ້ບໍລິການໃນຕົ້ນເດືອນກໍລະກົດທີ່ຜ່ານມານີ້

ສວນນີ້ຢູ່ບໍ່ຫ່າງຈາກວົງວຽນໄດໂນເສົາ ໂດຍມຸ້ງໜ້າໄປທາງເໜືອ ຕາມເສັ້ນທາງຫຼວງເລກ 9w ປະມານ 2 ກິໂລແມັດ ຖ້າມາຈາກເທດສະບານເມືອງແມ່ນລ້ຽວເຂົ້າຮ່ອມ ແຕ່ຖ້າມາຈາກທາງເຊໂນ ແມ່ນລ້ຽວຂວາ ຫຼັງຈາກເຂົ້າຮ່ອມໄປແລ້ວ ເຮົາຈະເຫັນຮ້ານອາຫານທີ່ຢູ່ທ່າມກາງສວນສັດຂະໜາດນ້ອຍ ໂດຍມີຮູບປັ້ນສິງໂຕຫາງປາ (Merlion) ພົ່ນນໍ້າຢູ່ກາງບືງ ຄ້າຍໆກັບສັນຍະລັກຂອງສິງກະໂປ

ໃນບໍລິເວນຮອບໆບືງແຫ່ງນີ້ ແມ່ນຂອບເຂດຂອງຮ້ານອາຫານສະຫວັນມີໄຊ ທີ່ນອກຈາກຈະມີບ່ອນນັ່ງໃຫ້ເລືອກຫຼາກຫຼາຍມຸມແລ້ວ ຍັງມີອາຫານ ແລະ ເຄື່ອງດື່ມໄວ້ບໍລິການເລີ່ມແຕ່ເວລາ 9:00 ຫາ 19:00 ໂມງ

ກິນອິ່ມແລ້ວ ເບິ່ງວິວແບບເພີນໆແລ້ວ ກໍ່ບໍ່ຄວນພາດທີ່ຈະເລາະເບິ່ງສວນສັດທີ່ຍັງມີສັດໃຫ້ທ່ຽວຊົມ ເປັນຕົ້ນແມ່ນ: ນົກຍຸງ ໝີຂໍ ແລະ ລິງເຜຶອກ, ໃກ້ຈາກຈຸດກິນເຂົ້າ ເປັນພື້ນທີ່ຂອງກວ້າງ ຟານ ແລະ ເໝັ່ນ ເຊິ່ງທັງໝົດໄດ້ຮັບການເບິ່ງແຍ່ງໂດຍພະນັກງານສະເພາະທາງ

ສຳລັບສາຍເຊວຟິ ນອກຈາກຈະມີສິງໂຕຫາງປາໃຫ້ຖ່າຍຮູບແລ້ວ ກໍ່ຍັງມີເຮືອນໄມ້ຫຼັງນ້ອຍໆທີ່ໃຊ້ສຳລັບຈັດງານລ້ຽງເປັນກຸ່ມ ສາມາດໄປຖ່າຍຮູບໄດ້ເຊັ່ນກັນ ຫຼື ອອກຫາມຸມແປກຕາໜ້າສົນໃຈ ກໍ່ຍັງມີອີກຫຼາຍມຸມ ໃຫ້ຖ່າຍຮູບແບບຊິວໆ

ຊ່ວງຍາມຝົນແບບນີ້ ພາຍຸເຂົ້າຕະຫຼອດແບບນີ້ ໃຜຢູ່ສະຫວັນນະເຂດໃນມື້ຟ້າຄືມໆ ແລະ ຍັງບໍ່ຮູ້ວ່າຝົນຈະຕົກຫຼຶບໍ່ ຈຸດນີ້ຖືວ່າເປັນອີກທາງເລືອກໜຶ່ງທີ່ດີ ແລະ ໃກ້ເມືອງອີກດ້ວຍ

LEAVE A REPLY

Please enter your comment!
Please enter your name here