ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ເລີ່ມຕົ້ນຈາກການເປັນລູກຊາວສວນ ທີ່ອາໄສການຮຽນຮູ້ເລື່ອງກາເຟຈາກພໍ່ແມ່ ບວກກັບຄວາມມັກຮັກໃນສາຍອາຊີບກ່ຽວກັບກາເຟ ແລະ ຢາກພັດທະນາກາເຟລາວໃຫ້ດີຂຶ້ນກ່ວາເກົ່າ ໂດຍສະເພາະກໍ່ແມ່ນຊາວສວນຈາກເມືອງປາກຊ່ອງ ແຂວງຈໍາປາສັກ

ຄໍາກອງ ທອງພະຈັນ ຫຼື ທ້າວ ເປັນເຈົ້າຂອງຮ້ານໃຈກາເຟ ໄດ້ໃຫ້ສຳພາດກັບອິນໄຊລາວວ່າ: ສຳລັບຂ້ອຍແລ້ວ ແມ່ນເປັນຊາວສວນມາແຕ່ເກີດ ໂດຍອາໄສຮຽນຮູ້ກ່ຽວກັບກາເຟຈາກພໍ່ແມ່ ບວກກັບຄວາມມັກຮັກໃນອາຊີບນີ້ ຈື່ງຢາກພັດທະນາກາເຟໃຫ້ໄປໃນຮູບແບບທີ່ດີຂຶ້ນ ນອກຈາກຂ້າພະເຈົ້າຍັງໄດ້ມີໂອກາດໄດ້ໄປຮຽນແລກປ່ຽນປະສົບການຢູ່ຫຼາຍໆບ່ອນ ໂດຍຫຼັກໆກໍ່ແມ່ນຍີ່ປຸ່ນ ເພື່ອສຶກສາກ່ຽວກັບການເຮັດກາເຟ ແບ່ງປັນປະສົບການກັບຊ່ຽວຊານຂອງຍີ່ປຸ່ນແທ້ໆ ແລະ ຍັງໄດ້ໄປຮຽນຢູ່ປະເທດໄທ ແລະ ຫວຽດນາມອີກດ້ວຍ, ກາເຟຈາກຊາວສວນໃຈກາເຟ ແມ່ນຈະສົ່ງໄປປະເທດຍີ່ປຸ່ນເປັນຫຼັກ ໂດຍເລີ່ມສົ່ງໄປປະເທດຍີ່ປຸ່ນຕັ້ງແຕ່ປີ 2004 ຈົນມາຮອດປັດຈຸບັນນີ້

ຫຼັງຈາກນັ້ນ ກໍ່ໄດ້ມີການຕັ້ງຮ້ານໃຈຂຶ້ນ ເຊິ່ງມາຮອດປັດຈຸບັນນີ້ກໍ່ເປັນເວລາ 9-10 ປີແລ້ວ ທັງນີ້ ກໍ່ເພື່ອປັບປຸງຄຸນນະພາບຂອງກາເຟຂອງຊາວສວນໃຈ

ບ່ອນສະແດງໂຄສະນາ

ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ສະຫະກອນຊາວສວນໃຈກາເຟ ມີທັງໝົດ 19 ບ້ານ 450 ຄອບຄົວທົ່ວເມືອງປາກຊ່ອງ ແຕ່ການຈະເຮັດໃຫ້ກາເຟໄດ້ມາດຕະຖານຕ້ອງມີການເຮັດວຽກເປັນທີມ ເພື່ອໃຫ້ກາເຟມີຄຸນນະພາບໃນເປົ້າໝາຍດຽວກັນ ເຊິ່ງເຮົາຈະມີການປະຊຸມກັນເດືອນລະເທື່ອ ຫຼື ສອງເທື່ອໃນລະດູການເກັບກ່ຽວເພື່ອແລກປ່ຽນເຊິ່ງກັນແລະກັນ

ທ້າວ ຍັງໄດ້ເປີດເຜີຍວ່າ: ການຈະເຮັດໃຫ້ກາເຟໄດ້ຄຸນນະພາບ ເຮົາຕ້ອງສຶກສາຢູ່ 7 ຂັ້ນຕອນດັ່ງນີ້: ການປູກ, ການເບິ່ງແຍງຮັກສາ, ການເກັບກ່ຽວ, ການແປຮູບ, ການຂົ້ວ, ການຫຸ່ມຫໍ່ ແລະ ການສົ່ງອອກ

ຄໍາກອງ ຍັງໄດ້ເປັນຜູ້ຊ່ວຍຂອງສະຫະກອນ ໃນການຄວມຄຸມຄຸນນະພາບຂອງສະຫະກອນ ທີ່ສົ່ງໄປປະເທດຍີ່ປຸ່ນ ໂດຍຈະເຮັດຮ່ວມກັບວິຊາການທາງພາກລັດ (ພະແນກກະສິກຳແຂວງ) ແລະ ຊ່ຽວຊານຈາກຍີ່ປຸ່ນ ເພື່ອຕິດຕາມຄຸນນະພາບເປັນໄລຍະ ໂດຍຈະມີການຂໍຕົວຢ່າງກາເຟນໍາຊຸມຊົນມາຂົ້ວທົດລອງ ແລະ ແຈ້ງຜົນໃຫ້ກັບຄອບຄົວນັ້ນໆ ວ່າກາເຟຂະເຈົ້າເປັນແນວໃດ 

ໂດຍແຮງບັນດານໃນການເຮັດວຽກຂອງທ້າວ ຫຼັກໆກໍ່ຄືຄວາມມັກຮັກໃນອາຊີບນີ້ ແລະ ຢາກສືບຕໍ່ເຮັດອາຊີບນີ້ໄປເລື້ອຍໆ ເພື່ອແບ່ງປັນປະສົບການໃຫ້ກັບຊຸມຊົນ ແລະ ເຮັດໃຫ້ກາເຟລາວມີຊື່ສຽງ ແລະ ໄດ້ຄຸນນະພາບດີ ມີລາຄາສູງ

ແນວຄວາມຄິດອຸດົມການຂອງເຮົາ ປູກກາເຟເພື່ອພັດທະນາຄຸນນະພາບຊີວິດ ກາເຟເປັນສິ່ງທີ່ມີພະລັງ ຖ້າເບິ່ງໃນມຸມບວກ ການເຮັດກາເຟໄດ້ຄຸນນະພາບ ກໍ່ຈະປ່ຽນຊີວິດໃຫ້ດີຂຶ້ນໄດ້ ຄໍາກອງກ່າວ

ການສົ່ງອອກກາເຟ ກໍ່ດີຢູ່ແລ້ວ ແຕ່ການເປີດຮ້ານມັນຈະດີກວ່າ ເພາະວ່າຢູ່ບ້ານເຮົາກໍ່ເຮັດກາເຟຫຼາຍ ມີແຕ່ຊາວສວນກາເຟ ແຕ່ຄົນທີ່ຈະເຂົ້າໃຈລືກເຊິ່ງນັ້ນມີໜ້ອຍ ການເປີດຮ້ານກໍ່ເພື່ີອຢາກແບ່ງປັນໃຫ້ຄົນໃນປາກຊ່ອງເອງ ເພື່ອໃຫ້ຮູ້ເຖິງເລື່ອງກາເຟຄຸນນະພາບ ກິນກາເຟຄຸນນະພາບ ແລະ ຮຽນຮູ້ກັນໄປ

ຖ້າຄົນລາວຢູ່ໃສກໍ່ແລ້ວແຕ່ ຖ້າໄດ້ມີໂອກາດມາປາກຊ່ອງ ຢາກໃຫ້ລອງມາຊີມກາເຟສົດໆ ກໍ່ສາມາດຮ້ານເຮົາໄດ້ ຮ້ານເຮົາເປີດທຸກມື້   ທ້າວກ່າວປິດທ້າຍ

LEAVE A REPLY

Please enter your comment!
Please enter your name here