ໃນບັນດາເຫດຜົນຕ່າງໆນາໆ ທີ່ເຮັດໃຫ້ກາເຟແຕ່ລະຈອກມີລົດຊາດຕ່າງກັນ ມີທັງລົດຊາດສົ້ມ ຂົມ ຫວານ ຫຼື ມີກິ່ນດອກໄມ້ຊ້ອນຂຶ້ນມາ ແລະໜຶ່ງປັດໄຈທີ່ມີຜົນຕໍ່ລົດຊາດເຫຼົ່ານັ້ນກໍ່ແມ່ນການ “ຂົ້ວ”

ມື້ນີ້ ອິນໄຊລາວ ຈະພາໄປຮູ້ຈັກການຂົ້ວກາເຟ ໂດຍຈະມີຜູ້ທີ່ຊໍານານໃນການຂົ້ວກາເຟ ຈາກເມືອງປາກຊ່ອງ ແຂວງຈໍາປາສັກ ‘ວິລະພົງ ສັນຕະອິນຊີ’ Roaster ຜູ້ທີ່ໄດ້ພົວພັນຢູ່ກັບກາເຟຕັ້ງແຕ່ນ້ອຍຈົນໃຫ່ຍ ແລະ ເປັນຜູ້ທີ່ກຳລັງສຶກສາກ່ຽວກັບກາເຟເພື່ອຍົກລະດັບກາເຟລາວໃຫ້ດີຂຶ້ນ

ໂດຍວິລະພົງໄດ້ເປີດເຜີຍກັບອິນໄຊລາວວ່າ: ເມັດກາເຟທີ່ຍັງບໍ່ທັນຜ່ານການຂົ້ວ ເຮົາເອີ້ນ green bean ຫຼື ສານກາເຟ ແລະ ພາສາພື້ນບ້ານມັກຈະເອີ້ນວ່າ ໝາກຊອມ ເຊິ່ງຈະເປັນເມັດສີຂຽວອ່ອນ ທີ່ຍັງບໍ່ສາມາດນຳມາຊົງດື່ມໄດ້ ແຕ່ເມື່ອເຮົາເລີ່ມໃຊ້ຄວາມຮ້ອນເພື່ອມາຂົ້ວກາເຟແລ້ວ ກາເຟຈະຄ່ອຍໆປ່ຽນສີຈາກສີຂຽວ ເປັນສີນໍ້າຕານອ່ອນ ໂດຍຜິວເມັດຍັງແຫ້ງຢູ່ ແລະ ຖ້າຂົ້ວຕໍ່ໄປດົນໆ ສີກາເຟກໍ່ຈະເຂັ້ມຂຶ້ນ ຈົນກາຍເປັນສີນໍ້າຕານແກ່ ແລະ ມີນໍ້າມັນອອກມາຈາກເມັດກາເຟເຄືອບບໍລິເວນຜິວຂອງເມັດກາເຟຫຼັງຈາກການຂົ້ວແລ້ວໄລຍະໜຶ່ງ

ການຂົ້ວມີຂັ້ນຕອນທີ່ບໍ່ຊັບຊ້ອນ ໂດຍຈະມີຢູ່ຫົກລະດັບດັ່ງນີ້:

• ກາເຟທີ່ຂົ້ວອ່ອນ ເປັນສີນໍ້າຕານອ່ອນ ຜິວແຫ້ງ (LIGHT BROWN/CINNAMON)

ການຂົ້ວລະດັບນີ້ແມ່ນຈະໃຊ້ອຸ່ນຫະພູມຢູ່ລະຫວ່າງ 380-400 ອົງສາຟາເລັນຮາຍເຊິ່ງຜິວຂອງເມັດກາເຟຂະນະນີ້ແມ່ນຍັງແຫ້ງຢູ່ ແລະ ຖ້າຊົງກາເຟດ້ວຍເມັດທີ່ຂົ້ວອ່ອນລະດັບນີ້ ລົດຊາດ ຄວາມສົ້ມແມ່ນຢູ່ໃນລະດັບທີ່ສູງ ກິ່ນແມ່ນຢູ່ລະດັບກາງໆ ຄວາມເຂັ້ມຂຸ້ນ ຢູ່ໃນລະດັບທີ່ອ່ອນ ແລະ ຄວາມຫວານໜ້ອຍ ເຊິ່ງຈຸດພິເສດເເມ່ນຍັງຄົງລົດຊາດຂອງໝາກໄມ້ຈະຍັງຫຼົງເຫຼືອຢູ່ຫຼາຍກວ່າກາເຟທີ່ຂົ້ວເຂັ້ມ ເຊິ່ງຫາກເຮົາດື່ມກາເຟຂົ້ວອ່ອນທີ່ເປັນ Single Origin ໝາຍຄວາມວ່າມາຈາກແຫຼ່ງປູກດຽວ ສວນດຽວ ກໍ່ຈະຮູ້ສຶກເຖິງລົດໝາກໄມ້ບາງຢ່າງ ຫຼື ກິ່ນດອກໄມ້ [fruity & floral] ທີ່ເປັນເອກະລັກສະເພາະຂອງເມັດກາເຟນັ້ນໄດ້ຊັດເຈນ ເພາະມັນບໍ່ຖືກຄວາມຮ້ອນທຳລາຍຈາກການຂົ້ວ ທັງນີ້ ລົດສຳພັດຈະຊັດເຈນເທົ່າໃດນັ້ນ ແມ່ນຂຶ້ນກັບວິທີການຊົງທີ່ເລືອກໃຊ້ ແລະ ປະສາດສຳພັດຂອງຜູ້ດື່ມເອງອີກດ້ວຍ

• ການຂົ້ວກາເຟກາງ ສີນໍ້າຕານກາງ ຫຼື ອ່ອນກາງ (MEDIUM LIGHT BROWN/AMERICAN)

ໃນການຂົ້ວກາເຟລະດັບນີ້ແມ່ນອຸ່ນຫະພູມຈະສູງຂຶ້ນເປັນປະມານ 400-450 ອົງສາຟາເລັນຮາຍເຊິ່ງເຮົາຈະໄດ້ລົດຊາດ ຄວາມສົ້ມ(Acidity)ຢູ່ໃນລະດັບທີ່ສູງຢູ່ ເຊິ່ງຄວາມເຂັ້ມຂຸ້ນ(Body)ເຕັມ, ຄວາມຫອມແມ່ນມານຳກັນ ແລະ ຄວາມຫວານຢູ່ໃນລະດັບກາງ ຜິວຂອງເມັດກາເຟຍັງແຫ້ງຢູ່ ລົດຊາດລະດັບນີ້ແມ່ນເໝາະແກ່ການຊົງແບບ Pour Over ກິນແບບໄດ້ລົດໝາກໄມ້ ແລະ ຫອມດອກໄມ້ຢ່າງຊັດເຈນ

• ການຂົ້ວແບບກາງ ຫຼື ພາສາອັງກິດເອີ້ນວ່າ (FULL MEDIUM BROWN / CITY)

ດັບການຂົ້ວແບບນີ້ ແມ່ນເຮົາຈະຄຸ້ນໆຫູວ່າຂົ້ວແບບກາງ ເຊິ່ງສີຂອງເມັດກາເຟແມ່ນຢູ່ໃນລະດັບນໍ້າຕານເຕັມທີ່ ຫຼື ສີງົວໂທນ ພາສາພື້ນບ້ານເພີ່ນເອີ້ນ, ອຸນຫະພຸມທີ່ໃຊ້ໃນການຂົ້ວແມ່ນຢູ່ລະຫວ່າງ 415-445 ອົງສາຟາເລັນຮາຍເມັດກາເຟແມ່ນຈະແຕກເປັນຄັ້ງທີ2ແລ້ວ(Second crack)ເຊິ່ງລົດຊາດທີ່ຕາມມາໃນການຂົ້ວລະດັບນີ້ແມ່ນ ຄວາມສົ້ມ(Acidity)ສູງ, ຄວາມເຂັ້ມຂຸ້ນເຕັມສ່ວນ, ຄວາມຫອມແມ່ນຫອມແຮງ ແລະ ຄວາມຫວານແມ່ນຍັງຢູ່ໃນລະດັບກາງໆບໍ່ຫວານຫຼາຍ ແຕ່ລະດັບນີ້ແມ່ນລະດັບທີ່ຄົນທົ່ວໄປສາມາດກິນໄດ້ແບບສະບາຍ ແລະ ຄົນກໍ່ນິຍົມກັນກິນ

• ການຂົ້ວລະດັບ ສີນໍ້າຕານກາງ (MEDIUM-DARK BROWN / FULL CITY / VIENNESE / LIGHT FRENCH)

ລະດັບການຂົ້ວແບບນີ້ແມ່ນການຂົ້ວທີ່ມີອຸນຫະພູມຢູ່ລະຫວ່າງ 435-445 ອົງສາຟາເລັນຮາຍ ໃນການຂົ້ວກາເຟ ເມື່ອກາເຟຖືກຄວາມຮ້ອນ ເຊວລູໂລໃນກາເຟຈະຖືກທຳລາຍ ເຊິ່ງໃນກໍລະນີທີ່ຂົ້ວກາງແບບນີ້ ເຊວລູໂລບໍ່ເຖິງກັບຖືກທຳລາຍໄປໝົດ ພຽງແຕ່ກາເຟຈະຫຼຸດຄວາມສົ້ມຫວານ ແບບໝາກໄມ້ລົງ ແລ້ວເລີ່ມມີກິ່ນທີ່ເຂັ້ມຂຶ້ນ ອອກໄປທາງຊ໊ອກໂກແລັດ ຫຼື ໝາກຖົ່ວຫຼາຍຂຶ້ນ [nutty and chocolaty]ເຊິ່ງຄວາມສົ້ມຈະຫຼຸດລົງມາຢູ່ໃນລະດັບກາງ ແຕ່ຄວາມຫອມແມ່ນຫອມຫຼາຍ, ຈະໄດ້ຄວາມເຂັ້ມຂຸ້ນ ຫຼື (Body)ແບບເຕັມໆກວ່າລະດັບການຂົ້ວທີ່ຜ່ານມາ, ໄດ້ຄວາມຫອມທີ່ເຕັມທີ່ ແລະ ລົດຊາດທີ່ຫວານຫຼາຍ ແລະ ຜິວຂອງເມັດແມ່ນຈະເລີ່ມມີນໍ້າມັນອອກມາເລັກໜ້ອຍໃຫ້ເຮົາເຫັນ ເຊິ່ງໃນລະດັບນີ້ເຮົາສາມາດເຮັດໄດ້ຫຼາກຫຼາຍເມນູໂດຍສະເພາະແມ່ນ ລາເຕ້ ແລະ ກາປູຊິໂນ້

• ຂົ້ວລະດັບນໍ້າຕານແກ່(ກາງແກ່) (DARK BROWN/FRENCH/ESPRESSO)

ການຂົ້ວລະດັບນີ້ແມ່ນຄວາມສົ້ມແມ່ນເກືອບຫາຍໄປໝົດເຫຼືອໄວ້ແຕ່ຄວາມຫອມທີ່ຢູ່ໃນລະດັບກາງໆ, ຄວາມເຂັ້ນຂຸ້ນທີ່ຕາມມາຕິດໆ ພ້ອມກັບຄວາມຫວານແບບພໍດີ ເຊິ່ງຈະສັງເກດເຫັນກາເຟເປັນສີເຫຼື້ອມໆບໍລິເວນຜີວ ເຊິ່ງອຸນຫະພູມແມ່ນຢູ່ໃນລະຫວ່າງ 445-460 ອົງສາຟາເລັນຮາຍ ເຊິ່ງເພີ່ນນິຍົມເອົາການຂົ້ວລະດັບນີ້ມາເຮັດເມນູ ເອັສເປສໂຊ ເພາະມັນຈະໄດລົດຊາດກາເຟແບບເຕັມທີ່

• ການຂົ້ວກາເຟແກ່ ເປັນສີນໍ້າຕານແກ່ ມີນໍ້າມັນເຄືອບເມັດ (VERY DARK ROAST/DARK FRENCH/SPANISH)

ຈຸດສັງເກດງ່າຍໆ ແມ່ນສີກາເຟສີເຂັ້ມຈັດເກືອບດຳ ມີນໍ້າມັນເຄືອບຜິວກາເຟຈົນເປັນເງົາ ການຂົ້ວຈົນໄດ້ລະດັບນີ້ ເຮັດໃຫ້ເຊວລູໂລຂອງກາເຟຖືກທຳລາຍ ແລະ ບາງເທື່ອ ຖ້າຂົ້ວດົນໆຂຶ້ນ ກໍ່ຈະລະເຫີຍອອກມາຈົນກາຍເປັນນໍ້າມັນເຄືອບນັ້ນເອງ ເຊິ່ງເຮັດໃຫ້ກາເຟສູນເສຍລົດຊາດແບບໝາກໄມ້ ແລະ ມີກິ່ນໄໝ້ ລົດຊາດຂົມ ເຂົ້າມາແທນ ເຊິ່ງຄວາມສົ້ມແມ່ນຈະຕຳແຮງ ຫຼື ເກືອບບໍ່ມີເລີຍ, ຄວາມເຂັ້ມຂຸ້ນຫຼຸດລົງ, ຫອມໜ້ອຍລົງ ແລະ ຄວາມຫວານກໍຢູ່ໃນລະດັບຕໍ່າ ເຊິ່ງໃນກໍລະນີຂົ້ວແບບນີ້ຄຸນລັກສະນະຂອງກາເຟຈະຄ່ອຍໆຫາຍໄປເຫຼືອໄວ້ແຕ່ຄວາມເປັນຄາບອນ ແລະ ຄວາມຂິວ

ວິລະພົງຍັງໄດ້ແນະນໍາສຳລັບທ່ານໃດທີ່ຕ້ອງການຢາກເປັນຜູ້ຂົ້ວກາເຟວ່າ: ຖ້າຢາກເປັນນັກຂົ້ວກາເຟທີ່ດີທຳອິດກ່ອນໝູ່ໝົດແມ່ນຕ້ອງມີຄວາມມັກຮັກໃນກາເຟກ່ອນ, ສຶກສາຄຸນລັກສະນະຂອງກາເຟຢ່າງຖີ່ຖ້ວນຕັ້ງແຕ່ບາດກ້າວທຳອິດ ໂດຍສະເພາະແຫຼ່ງກຳເນີດກາເຟ, ຂະບວນການປູກ, ສາຍພັນ, ຂະບວນການເກັບ ແລະ ການຜະລິດ ຕາມມາແມ່ນການຄັດເມັດ ເພື່ອໃຫ້ໄດ້ກາເຟທີ່ດີ ຜູ້ຂົ້ວຕ້ອງກຽມຄວາມຮູ້ ສະສົມປະສົບການ ເຄື່ອງມືທີ່ຈຳເປັນທີ່ໃຊ້ໃນການຂົ້ວ ມີການທົດລອງເປັນປະຈຳເພື່ອຄວາມຊໍານານ ແລະ ທີ່ສຸດຕ້ອງກຽມຈິດໃຈທີ່ອົດທົນ ສຶກສາແລກປ່ຽນກັບຜູ້ທີ່ມີປະສົບການເປັນປະຈໍາ

“ໂລກຂອງກາເຟຄືໂລກແຫ່ງຄວາມສວຍງາມ ແບບບໍ່ມີຂໍ້ຈຳກັດ ກາເຟເປັນສື່ກາງຂອງຄວາມສຳພັນທີ່ດີ ເປັນເໝືອນພະລັງວິເສດທີ່ພາເຮົາໄປໄດ້ແບບບໍ່ສິ້ນສຸດ ຈົ່ງເປັນຜູ້ເຮັດກາເຟທີເປັນເໝືອນຜູ້ມອບຄວາມສຸກແກ່ຜູ້ດື່ມ ແລະ ອາຊີບຜູ້ເຮັດກາເຟ ບໍ່ແມ່ນອາຊີບທີ່ອົດຕາຍ” ວິລະພົງ ກ່າວໃນຕອນທ້າຍ

LEAVE A REPLY

Please enter your comment!
Please enter your name here