ສາຍກິນດື່ມ ເລີ່ມກັບມາຄືກຄັກອີກຄັ້ງ ທີ່ຕະຫຼາດສະຫວັນກາງຄືນ ທັງໂຊນລົດຂາຍອາຫານ ເຄື່ອງດື່ມ ແລະ ບາເຫຼົ້າ

ຫຼັງຈາກທີ່ອິນໄຊລາວ ໄດ້ໄປສຳຫຼວດຕະຫຼາດສະຫວັນກາງຄືນ ນັບເປັນເວລາເກືອບເດືອນແລ້ວ ທີ່ທຸລະກິດໃນເມືອງໄກສອນ ພົມວິຫານ ແຂວງສະຫວັນນະເຂດ ເລີ່ມກັບມາເປີດໃຫ້ບໍລິການອີກຄັ້ງ ຫຼັງຈາກຕ້ອງຢຸດດໍາເນີນກິດຈະການ ຕາມນະໂຍບາຍປ້ອງກັນການແຜ່ລະບາດຂອງພະຍາດໂຄວິດ-19 ທີ່ຜ່ານມາ

ເຮົາໄປຮອດຕະຫຼາດໃນເວລາປະມານ 20:00-21:00 ໂມງ ແລະ ເຫັນໄດ້ຊັດເຈນວ່າ ມີຮ້ານຄ້າກັບມາດຳເນີນທຸລະກິດເກີນເຄີ່ງໜຶ່ງຂອງພື້ນທີ່ ໂດຍຮ້ານສ່ວນໃຫ່ຍທີ່ມີຄົນມາໃຊ້ບໍລິການແມ່ນຮ້ານປະເພດຕິ໋ມຊໍາ ແລະ ຂອງແກ້ມ ເຊັ່ນດຽວກັນກັບຮ້ານເຄື່ອງດື່ມທີ່ຈໍາໜ່າຍເຄື່ອງດື່ມແອວກໍຮໍໄປນໍາ ໃນຂະນະທີ່ບາເຫຼົ້າບາງຮ້ານ ກໍມີຜູ້ເຂົ້າໃຊ້ບໍລິການເກືອບເຕັມຮ້ານ ເຊັ່ນ ຮ້ານສຸກສະຫວັນ ແລະ ຮ້ານຄັນທະບຸລິ ເຊິ່ງລູກຄ້າທະຍອຍເຂົ້າຮ້ານເພີ່ມຂຶ້ນ  

ທ້າວພຸ ເຈົ້າຂອງຮ້ານຂາຍປາເຕໂຊແຄມທາງ ທີ່ຂານມາດົນກວ່າ 6 ປີ ແລ້ວ ໄດ້ກ່າວວ່າ: ຕົນເອງກໍຈໍາເປັນຕ້ອງໄດ້ຢຸດຂາຍຕາມຄໍາສັ່ງຂອງພາກລັດ ແລ້ວກັບໄປຊ່ວຍທຸລະກິດທາງບ້ານແທນ ໂດຍຫາກໍ່ກັບມາຂາຍໄດ້ບໍ່ຮອດເດືອນ ແລະ ຍອມຮັບວ່າຂາຍໄດ້ໜ້ອຍລົງກວ່າເກົ່າປະມານ 50 ເປີເຊັນ ວັດຕາມຈໍານວນປາເຕໂຊທີ່ຂາຍ ເຊິ່ງກ່ອນໜ້າທີ່ຈະມີໂຄວິດ-19 ແມ່ນໄດ້ຂາຍປະມານ 160 ກ້ອນ/ຄືນ ສ່ວນປັດຈຸບັນແມ່ນຂາຍໄດ້ພຽງ 100ກ້ອນ/ຄືນ

ແຕ່ສຳລັບແມ່ຄ້າຕີ໋ມຊໍາ ໄດ້ກ່າວວ່າ: ການຈໍາກັດການເດີນທາງເຂົ້າອອກປະເທດ ແມ່ນສົ່ງຜົນດີຕໍ່ຮ້ານກວ່າເກົ່າ ເນື່ອງຈາກຊ່ວງມື້ພັກຜ່ອນ ມີຄົນອອກນອກປະເທດໜ້ອຍລົງ ແລະ ມາທ່ຽວໃນປະເທດຫຼາຍຂຶ້ນ ເຮັດໃຫ້ມີລາຍຮັບຈາກຜູ້ມາອຸດໜູນຮ້ານອາຫານໃນຕະຫຼາດສະຫວັນກາງຄືນເພີ່ມຂຶ້ນກວ່າເກົ່າ

ນອກຈາກສິນຄ້າປະເພດອາຫານແລ້ວ ເຄື່ອງດື່ມປະສົມແອກໍຮໍ ກໍ່ເປັນອີກລາຍການໜຶ່ງທີ່ໄດ້ຮັບຄວາມນິຍົມໃນຍາມຄໍ່າຄືນ ໃນຂະນະທີ່ລໍ້ຂາຍຂະໜົມຫວານ ກໍ່ມີຍອດຂາຍກັບຄືນມາເຊັ່ນກັນ ໂດຍ ນາງ ຕຸກຕາ ເຈົ້າຂອງຮ້ານເສົາກວ໊ຍໃນຕະຫຼາດ ໃຫ້ຄວາມເຫັນວ່າ: ເຖິງວ່າຊ່ວງນີ້ຈະກັບມາເປີດຮ້ານຍັງບໍ່ປົກກະຕິ ແຕ່ລູກຄ້າທີ່ມາອຸດໜູນໃນປັດຈຸບັນ ກໍມີຫຼາຍກວ່າ 50 ເປີເຊັນຂອງຈໍານວນລູກຄ້າເກົ່າ

ແນວໃດກໍ່ຕາມ, ພໍ່ຄ້າແມ່ຄ້າທຸກຄົນຍອມຮັບວ່າ ການແຜ່ລະບາດຂອງພະຍາດໂຄວິດ-19 ສ້າງຄວາມຮູ້ສຶກກັງວົນຕໍ່ຕົນເອງ ເຖິງວ່າໃນສະຫວັນນະເຂດຈະບໍ່ມີຂ່າວຜູ້ຕິດເຊື້ອເລີຍກໍ່ຕາມ ໂດຍຊ່ວງກັກຕົວຢູ່ບ້ານ ກໍ່ມີຂ່າວລືເລື່ອງຜູ້ຕິດເຊື້ອໂຄວິດຢູ່  ຈາກຈໍານວນຄົນລາວ ທີ່ກັບມາຈາກປະເທດກຸ່ມສ່ຽງ ແຕ່ສຸດທ້າຍແລ້ວ ກໍ່ບໍ່ມີຂ່າວລືໃດເປັນຄວາມຈີງ

LEAVE A REPLY

Please enter your comment!
Please enter your name here