ການປູກຝັງ–ລ້ຽງສັດ ເປັນອາຊີບທີ່ຢູ່ຄູ່ກັບຄົນລາວມາແຕ່ດົນນານ, ແລະມາຮອດປັດຈຸບັນ ໄດ້ມີການດັດແປງຜັນປ່ຽນການຜະລິດຂອງຕົນໄປຕາມຍຸກສະໄໝ ໂດຍສະເພາະແມ່ນການປູກພືດອຸດສາຫະກຳເປັນອາຊີບ ຈາກທີ່ເຄີຍປູກຕາມທໍາມະຊາດກໍເລີ່ມຜັນປ່ຽນມາປູກຫຼາຍທີ່ເປັນສິນຄ້າ, ນໍາໃຊ້ເຕັກນິກການປູກແບບໃໝ່ ເພື່ອຊ່ວຍຫຼຸດແຮງງານ ແລະ ມີລາຍຮັບເພີ່ມຂຶ້ນ.

ໂດຍສະເພາະຄອບຄົວທ້າວ ຈັນສຸກ ແສງດາວອນ ປະຊາຊົນບ້ານ ນາຫວາຍ, ເມືອງ ບູນໃຕ້, ແຂວງ ຜົ້ງສາລີ ທີ່ໄດ້ຕັດສິນໃຈຫັນມາປູກຢາງພາລາຂາຍ ແຕ່ປີ 2005ເປັນຕົ້ນມາ ຈົນມາຮອດປັດຈຸບັນເຊີງເຮັດໃຫ້ຊີວິດການເປັນຢູ່ຂອງຕົນເອງຈາກທີ່ເປັນຊາວນາ, ກາຍເປັນນຄອບຄົວຕົວແບບຂອງເມືອງ, ມີເງິນໃຊ້ຈ່າຍ, ສ້າງລາຍຮັບເຂົ້າຄອບຄົວ 1 ຮ້ອຍ 4 ລ້ານກີບຕໍ່ປີ.

ທ້າວ ຈັນສຸກ ແສງດາວອນເລົ່າໃຫ້ຟັງວ່າ: ຄອບຄົວຂອງຕົນເອງມີທັງໝົດ 6 ຄົນ, ຍິງ 3 ຄົນ ແລະ ແຮງງານຫຼັກ 3 ຄົນ, ກ່ອນໜ້າທີ່ຈະປູກຢາງພາລາຂາຍເມືອກ່ອນແມ່ນມີອາຊີບເປັນຊາວນາທີ່ເຮັດນາຕາມລະດູການ, ຫຼັງໝົດລະດູການເຮັດນາກໍຊອກຫາເງິນລ້ຽງຕົນເອງ ແລະ ຄອບຄົວໄປແຕ່ລະມື້. ໃນໄລຍະນັ້ນຖືວ່າຂາດເຂີນຫຼາຍ, ການໃຊ້ຈ່າຍມີຫຼາຍກວ່າລາຍຮັບ. ຈົນມີໂຄງການສົ່ງເສີມປູກຢາງພາລາເຂົ້າມາ ຈຶ່ງຕັດສິນໃຈຊອກຮູ້ດ້ານເຕັກນິກການປູກຕົ້ນຢາງພາລາ ໂດຍນໍາໃຊ້ທຶນ ແລະ ແຮງງານຕົນເອງເຂົ້າສູ້ເປັນຫຼັກ. ປີທໍາອິດແມ່ນເລີມທົດລອງປູກເນື້ອທີ 1 ຮຕ 320 ຕົ້ນ ໂດຍຊື້ເບ້ຍຈາກບໍລິສັດ 2 ພັນ 5 ຮ້ອຍກີບຕໍ່ເບ້ຍໄລຍະຫ່າງຂອງຕົ້ນຢາງແມ່ນ 2,5 ຄູນ 7 ແມັດ, ປີ 2006 ປູກເພີ່ມຕື່ມ 2 ຮຕ ຈຳນວນ 800 ຕົ້ນ ແລະ ປີ 2008 ຂະຍາຍຕື່ມອີກ 4 ຮຕ ປູກໃນຈຳນວນ 2 ພັນຕົ້ນ ມາຮອດປະຈຸບັນລວມແລ້ວຄອບຄົວທ້າວ ຈັນສຸກ ແສງດາວອນ ມີຕົ້ນຢາງພາລາທັງໝົດ 3 ພັນ 1 ຮ້ອຍ 20 ຕົ້ນ ແລະ ສາມາດປາດເອົານ້ຳຢາງໄດ້ແລ້ວ 1 ພັນ 5 ຮ້ອຍຕົ້ນ ເດືອນໜຶງສາມາດຂາຍນ້ຳຢາງອອກໄດ້ 2 ຄັ້ງ ຂາຍໄດ້ 12 ລ້ານກີບຕໍ່ເດືອນ ລວມລາຍຮັບຂາຍຢາງພາລາໄດ້ 84 ລ້ານກີບຕໍ່ປີ, ນອກນີ້ແລ້ວຍັງເຮັດນາໄດ້ເຂົ້້າບໍ່ຕໍ່ຳກວ່າ 3 ໂຕນປີມູນຄ່າ 20 ລ້ານກີບ.  ແລະ ພໍ່ຮອດລະດູແລ້ງກໍປູກໝາກຖົ່ວ, ໝາກແຕງ ແລະ ພືດຜັກຕ່າງໆຂາຍໃຫ້ພໍ່ຄ້າຊາວຈີນທີເຂົ້້າມາເກັບຊື້ ແລະ ສະໜອງໃຫ້ຕະຫຼາດພາຍໃນເທດສະບານເມືອງບູນໃຕ້ສ້າງລາຍຮັບເພີມຕື່ມປີລະ 30 ລ້ານກີບ.

ຈາກການປູກຢາງພາລາຫຼາຍປີຜ່ານມາສາມາດເວົ້າໄດ້ວ່າ: ການປູກຢາງພາລາຂາຍປ່ຽນຊີວິດຂອງຕົນເອງໄດ້ ຈາກທີ່ຫາເຊົ້າກິນຄໍ່າອົດມື້ອີ່ມມື້, ແຕ່ປັດຈຸບັນມີລາຍຮັບເຂົ້າຄອບຄົວ1 ຮ້ອຍ 34ລ້ານກີບຕໍ່ປີ ເຊີງສະເລ່ຍລາຍຮັບຂອງຄອບຄົວຕົນແມ່ນ 22 ລ້ານ 3 ແສນກີບຕໍ່ຄົນຕໍ່ປີ ໂດຍສາມາດຢັ້ງຢືນວ່າເປັນຄອບຄົວພົ້ນທຸກ ແລະ ເປັນຄອບຄົວແບບຢ່າງໃນການສູ້ຊົນພັດທະນາຄອບຄົວ.

ເຊີງທ່ານ ໄມໜໍ່ ແສງຈັນທະວົງ ຮອງເລຂາພັກບ້ານ- ຮອງນາຍບ້ານ ນາຫວາຍ ໃຫ້ຮູ້ວ່າ: ຄອບຄົວຂອງທ້າວ ຈັນສຸກ ແສງດາວອນ ແມ່ນຄອບຄົວທີ່ ມີຄວາມຕັ້ງໃຈພັດທະນາສ້າງເສດທະກິດຄອບຄົວ, ດຸໜັ່ນຂະຫຍັນພຽນ ຈຶ່ງເຮັດໃຫ້ຄອບຄົວລາວມີລາຍຮັບທີ່ດີ ເປັນນແບບຢ່າງໃຫ້ະຊາຊົນພາຍໃນບ້ານ ນາຫວາຍກໍ່ຄື່ຊາວເມືອງ ບູນໃຕ້.

ທ້າວ ຈັນສຸກ ແສງດາວອນ ຍັງບອກອີກວ່າ: ລາຍຮັບທີ່ໄດ້ມາແມ່ນນຳໃຊ້ເງິນກະກຽມສ້າງເຮືອນກໍ່ຖາວອນ, ຊື້ລົດໃຫຍ່ກະບະ HUNDAI 1 ຄັນໄວ້ຮັບໃຊ້ຄອບຄົວ,ລົດຈັກ 3 ຄັນ, ມີເງີນແຮ່ຈໍຳນວນໜຶ່ງຝາກໄວ້ຢູ່ທະນາຄານ,ມີເງິນໃຊ້ຈ່າຍໂດຍບໍ່ຕ້ອງກູ້ຢືມ ແລະ ຍັງສາມາດສົ່ງນ້ອງສາວຮຽນຈົບມະຫາວິທະຍາໄລໄດ້ອີກ.

ນອກຈາກນີ້, ທ້າວ ຈັນສຸກ ແສງດາວອນຍັງຝາກເຖິງຜູ້ທີ່ຕ້ອງການເຮັດອາຊີບດັ່ງກ່າວວ່າ: ສິ່ງສໍາຄັນທີ່ຕ້ອງຄໍານຶງເຖິງແມ່ນຄວາມມັກ, ຄວາມອົດທົນ ແລະ ຄວາມດຸໝັ່ນ ເພາະການປູກຢາງພາລາແມ່ນນໍາໃຊ້ແຮງງານຄົນເປັນຫຼັກ ບໍ່ວ່າຈະເປັນການປູກ, ການກໍາຈັດຫຍ້າ, ການເກັບກ່ຽວ, ການດູແລຮັກສາທຸກໆຂັ້ນຕອນກໍລ້ວນແລ້ວແຕ່ຕ້ອງໃຊ້ແຮງງານຄົນ, ແນ່ນອນວ່າມັນຕ້ອງເມື່ອຍແຕ່ຖ້າໃຜທີ່ໄດ້ລອງມາເຮັດແລ້ວຈະກາຍເປັນຄວາມຮັກ ແລະ ມີຄວາມສຸກທີ່ໄດ້ເຮັດ.

ລາວຍັງເວົ້້າອີກຕື່ມວ່າໃນຕໍ່ໜ້ານີ້ຈະສືບຕໍ່ບົວລະບັດຮັກສາຕົ້ນຢາງພາລາທີປາດແລ້ວ ແລະ ຍັງບໍ່ທັນປາດເທື່ອໃຫ້ສາມາດປາດໄດ້ທັງໝົດ, ສ້າງຮ່ອງເໝືອງລະບາຍນ້ຳເຂົ້ານາເພື່ອຍົກສະມັດຕະພາບເຂົ້ານາຂຶ້ນຕື່ມ, ເພີ່ມເນື້ອທີປູກພືດລະດູແລ້ງຕາມຄວາມຕ້ອງການຂອງຕະຫຼາດ ເພື່ອສ້າງລາຍຮັບເຂົ້າຄອບຄົວຫຼາຍຂຶ້ນກວ່າເກົ່າ.

LEAVE A REPLY

Please enter your comment!
Please enter your name here