ຂໍຂ່າວບຸນກຸສົນ ມາຍັງບັນດາທ່ານ ສັດທາອອກຕົນຍາດໂຍມ ພຸດທະສາສະນິກະຊົນລາວ ປະຊາຊົນລາວບັນດາເຜົ່າ ໃນຂອບເຂດທົ່ວປະເທດເພື່ອເຂົ້າຮ່ວມງານບຸນສະເຫຼີມສະຫຼອງ ຮູບເໝືອນ ສົມເດັດພຣະໄຊຍະເຊດຖາທັມມິກະຣາດເຈົ້າ ຊົງຊ້າງ ທີ່ຫຼໍ່ດ້ວຍທອງເຫຼືອງ.

ພິທີງານບຸນຈັດຂຶ້ນທີ່ ຫໍທັມມະສະພາ ວັດພຣະທາດຫຼວງເໜືອ ເມືອງໄຊເຊດຖາ ນະຄອນຫຼວງວຽງຈັນ ຕັ້ງແຕ່ ວັນທີ 21 ເຖິງ ວັນທີ 26 ກໍລະກົດ 2020 ເຊິ່ງລຳດັບພິທີບຸນ ມີດັ່ງນີ້:

ວັນທີ 21 ເຖິງ ວັນທີ 25 ກໍລະກົດ 2020

  • ຕັ້ງແຕ່ ເວລາ 08:00 ນາທີ ຍາດໂຍມ ຮ່ວມບຸນ ໂມທະນາທານ ທີ່ຫໍທັມມະສະພາ ວັດພຣະທາດຫຼວງເໜືອ ເສີມບຸນປາຣະມີ ທີ່ຮູບເໝືອນພຣະເຈົ້າໄຊເຊດຖາຊົງຊ້າງ
  • ເວລາ 11:00 ນາທີ ພຣະສົງ ສັນເພນ ອອກຕົນຍາດໂຍມຮັບປະທານອາຫານທ່ຽງ
  • ເວລາ 17:00 ນາທີ ຟັງສູດປະຣິຕະມຸງຄຸນ ຟັງທັມມະເທສະໜາ ປາຣະມີ 30 ທັດ ເສີມບຸນປາຣະມີ ຈາກພຣະສົງ 39 ອົງ.
  • ເວລາ 19:30 ນາທີ ນຸ່ງຂາວຫົ່ມຂາວ ໄຫວ້ພຣະສູດມົນ ຈະເຣີນສະມາທິພາວະນາ ຟັງທັມມະເທສະໜາ ຈົນສົມຄວນແກ່ເວລາ ແລ້ວພັກຜ່ອນ.

ວັນທີ 26 ກໍລະກົດ 2020

  •  ເວລາ 09:00 ນາທີ ເຄື່ອນຮູບເໝືອນ ຂອງພຣະເຈົ້າໄຊເຊດຖາທິຣາດ ອອກຈາກນະຄອນຫຼວງວຽງຈັນ ໄປແຂວງບໍລິຄຳໄຊ ແລະປະກອບພິທີບຸນສະເຫຼີມສະຫຼອງຢູ່ທີ່ ແຂວງບໍລິຄຳໄຊນັ້ນ 1 ຄືນ.
  •  ເວລາ 07:00 ນາທີ ພິທີຕັກບາດ ຖວາຍທານ ແດ່ພຣະສົງ 39 ອົງ

       ຮູບເໝືອນຂອງສົມເດັດພຣະໄຊຍະເສດຖາທັມມິກະຣາດເຈົ້າ ທີ່ຊົງຊ້າງນີ້ ຫຼັງຈາກເຮັດພິທີສະເຫຼີມສະຫຼອງ ບຳເພັນບຸນກຸສົນ ທີ່ ວັດພຣະທາດຫຼວງ ນະຄອນຫຼວງວຽງຈັນ ແລ້ວ ຈະໄດ້ອັນເຊີນໄປປະດິດສະຖານໄວ້ ທີ່ ອະນຸສາວະລີພຣະເຈົ້າໄຊເຊດຖາທິລາດ ບ້ານຫາດຊາຍຂາວ ເມືອງໄຊເຊດຖາ ແຂວງອັດຕະປື.

      ການອັນເຊີນຮູບເໝືອນຂອງພຣະເຈົ້າໄຊຍະເຊດຖາທິ ຈະໄດ້ເຊີນໄປຕາມລຳດັບ ໂດຍຜ່ານແຂວງຕ່າງໆ ຈົນເຖິງ ແຂວງອັດຕະປື ແລະໃນບັນດາແຂວງທີ່ຜ່ານໄປນັ້ນຈະມີການປະກອບພິທີບຳເພັນບຸນ 1 ວັນຄື:

  •       ສະເຫຼີມສະຫຼອງທີ່ ແຂວງບໍລິຄຳໄຊ ໃນວັນທີ 27 ກໍລະກົດ 2020.
  • ສະເຫຼີມສະຫຼອງ ທີ່ ແຂວງຄຳມ່ວນ ໃນວັນທີ 28 ກໍລະກົດ 2020
  • ສະເຫຼີມສະຫຼອງ ທີ່ ແຂວງສະຫວັນນະເຂດ ໃນວັນທີ 29 ກໍລະກົດ 2020
  •  ສະເຫຼີມສະຫຼອງ ທີ່ ແຂວງຈຳປາສັກ ໃນວັນທີ 30 ກໍລະກົດ 2020
  • ສະເຫຼີມສະຫຼອງ ທີ່ ແຂວງອັດຕະປື ໃນວັນທີ 31 ກໍລະກົດ 2020 ແລະ ຈະຍົກຂຶ້ນພຣະແທ່ນປະດິດສະຖານໄວ້ ພ້ອມທັງບຳເພັນບຸນຖວາຍທານ ໃນວັນທີ 01 ສິງຫາ 2020 ເປັນອັນຈົບພິທີ ການອັນເຊີນ ຮູບເໝືອນພຣະເຈົ້າໄຊຍະເຊດຖາທິຣາດ ໄປປະດິດສະຖານ ໄວ້ທີ່ພຣະແທນ ອະນຸສາວະລີ ແຂວງອັດຕະປື ແລະຈະມີກຳໜົດການ ງານບຸນສົມໂພດ ຮູບເໝືອນດັ່ງກ່າວ ເຊິ່ງທາງຄະນະກັມມະການ ຈະແຈ້ງໃຫ້ຊາວໃນພາຍຫຼັງ.

       ວັນທີ 29 ມິຖຸນາ ຄ.ສ 2018 ກົງກັບມື້ຂຶ້ນ ໑໓ ຄ່ຳເດືອນ ໖ ພ.ສ ໒໕໖໑ ເປັນມື້ວາງສີລາຈາລຶກ.

      ວັນທີ 06 ກຸມພາ ຄ.ສ 2020 ກົງກັບມື້ຂຶ້ນ ໑໓ ຄ່ຳ ເດືອນ ໓ ພ.ສ ໒໕໖໒ ເປັນມື້ເທທອງຫຼໍ່ພຣະສຽນ ຢູ່ທີ່ວັດທາດພຣະໄຊ ເມືອງ ໄຊເສດຖາ ແຂວງ ອັດຕະປື.

      ວັນທີ 27 ກໍ​ລະ​ກົດ ຄ.ສ 2020 ກົງກັບມື້ຂຶ້ນ 7 ຄ່ຳ ເດືອນ ໙ ພ.ສ ໒໕໖໓ ຂະບວນແຮ່ ຈາກນະຄອນຫຼວງວຽງຈັນ ລົງມາ ແຂວງອັດຕະປື ໃຊ້ເວລາ ໕ ມື້ ໕ ຄືນ. 

      ຕາມ​ແຜນ​ການ ​ທີ່​ກຳ​ນົດ​ໄວ້​ນັ້ນ ແມ່ນວັນທີ 28 ພະຈິກ ຄ.ສ 2020 ກົງກັບມື້ ຂຶ້ນ ໑໓ ຄ່ຳ ເດືອນ ຈຽງ ເດືອນ ໑ ພ.ສ ໒໕໖໓ ເປັນມື້ສົມໂພດ.

LEAVE A REPLY

Please enter your comment!
Please enter your name here