“ວັນເຂົ້າພັນສາ” ໃນແຕ່ລະປີ ສ່ວນໃຫ່ຍຈະບໍ່ກົງກັນ ເພາະຖືເອົາ ແຮມ 1 ຄ່ຳເດືອນ 8 ຈົນເຖິງຂຶ້ນ 15 ຄ່ຳເດືອນ 11 ເປັນວັນເຂົ້າພັນສາ  

ກ່າວກັນວ່າ ເມື່ອຮອດ“ລະດູຝົນ” ທີ່ເປັນລະດູການຂອງການຜະລິດກະສິກຳ ໂດຍສະເພາະກໍ່ແມ່ນການປູກພືດຕ່າງໆ ສະນັ້ນແລ້ວ, ການເດີນທາງໄປມາ ຂອງພຣະສົງ-ສາມະເນນ ບໍ່ວ່າຈະເປັນການໄປເທດສະໜາ, ສັ່ງສອນປະຊາຊົນ ຫຼື ໄປທຳກິດຂອງສົງ ກໍໄດ້ຢຽບຍ່ຳຖືກເຄື່ອງປູກຂອງຝັງຂອງປະຊາຊົນ ຈົນຖືກຕຳໜິສົ່ງຂ່າວຈາກປະຊາຊົນ ແລະ ເລື່ອງດັ່ງກ່າວກໍຖືກໄປຂາບທູນພຣະພຸດທະເຈົ້າ (ພຸດທະການຕອນຕົ້ນ ພຣະສົງຍັງບໍ່ໄດ້ເຂົ້າພັນສາ)

ເພື່ອຕັດບັນຫາດັ່ງກ່າວນີ້, ພຣະພຸດທະເຈົ້າ ກໍເລີຍຊົງກຳໜົດໃຫ້ພຣະພິກຂຸສົງ ເມື່ອເຂົ້າລະດູຝົນ ໃຫ້ພຣະສົງຢູ່ກັບທີ່ (ຈຳພັນສາ) ໂດຍເລີ່ມຕັ້ງແຕ່ແຮມ 1 ຄ່ຳເດືອນ 8 ຈົນເຖິງຂຶ້ນ 15 ຄ່ຳເດືອນ 11 ບໍ່ໃຫ້ທ່ອງທ່ຽວໄປມາ ໂດຍສະເພາະແມ່ນຫ້າມໄປນອນແຮມຄືນທີ່ອື່ນ ຖ້າໃຜຕ້ອງການຢາກຟັງເທດກໍໃຫ້ ມາຫາພຣະສົງຢູ່ວັດ ມາເຮັດບຸນຢູ່ວັດ ນັ້ນເອີ້ນວ່າການ “ເຂົ້າພັນສາ”

ແຕ່ອີກມຸມໜຶ່ງ ພຣະອົງຊົງຖືໂອກາດ ທີ່ເກີດເປັນບັນຫານີ້ ໄດ້ຊົງປ່ຽນຄຳກ່າວຫາໃຫ້ກາຍເປັນ ໂອກາດອັນດີຂອງພຣະພິກຂຸສົງ ເມື່ອພຣະພິກຂຸສົງຢູ່ປະຈຳວັດກໍຈະໄດ້ ອົບຮົມສັ່ງສອນພຣະສົງທີ່ບວດໃໝ່ແດ່ ແລະ ພຣະສົງອົງທີ່ບວດໃໝ່ກໍຈະໄດ້ຕັ້ງໜ້າ ສຶກສາຮ່ຳຮຽນຫຼັກທຳ ຄຳສອນ ທຸກມື້ຢ່າງຕໍ່ເນື່ອງ ແລະ ໄດ້ຮັບຜົນດີ.

LEAVE A REPLY

Please enter your comment!
Please enter your name here