ວັນທີ 3 ກໍລະກົດ 2020 ສະຖານທູດໄທ ປະຈໍາ ສປປ ລາວ ໄດ້ຈັດງານສຳມະນາອອນລາຍຂຶ້ນ ພາຍໃຕ້ຫົວຂໍ້ ມາດຕະການ ການສົ່ງເສີມການຄ້າ ການລົງທຶນ ລາວ-ໄທ ໃນຊ່ວງການລະບາດຂອງພະຍາດໂຄວິດ-19 ຜ່ານ ເຟສບຸກໄລ ຈາກຫ້ອງຮັບຮອງຂອງສະຖານທູດໄທ ປະຈໍາ ສປປລາວ 

ງານສຳມະນາໃນຄັ້ງນີ້ ໃຫ້ກຽດບັນຍາຍໂດຍ ທ່ານ ດຳຣົງ ໃຄ່ຄວນ ເອກອັກຄະຣາຊາທູດໄທ ປະຈໍາ ສປປ ລາວ, ທ່ານ ນາງ ຄໍາຈັນ ວົງແສນບູນ ຮອງລັດຖະມົນຕີ ກະຊວງແຜນການ ແລະ ການລົງທຶນ ແຫ່ງ ສປປ ລາວ ແລະ ດຳເນີນລາຍການໂດຍ ທ່ານ ປອ ສຸວິດ ມັງຄະລະອັກຄະຣາຊະທູດທີ່ປຶກສາ 

ໜຶ່ງໃນບົດສົນທະນາທີ່ສໍາຄັນແມ່ນ ການຮ່ວມມືກັນທາງດ້ານການຄ້າ ແລະ ການລົງທຶນລະຫວ່າງ ລາວ-ໄທ ໃນຊ່ວງການລະບາດຂອງພະຍາດໂຄວິດ-19 ໂດຍ ທ່ານ ດຳຣົງ ໃຄ່ຄວນ ເອກອັກຄະຣາຊາທູດໄທ ປະຈໍາ ສປປ ລາວ ໄດ້ໃຫ້ຄໍາຄິດເຫັນວ່າ: ຂ້າພະເຈົ້າຄິດວ່າ ທຸກປະເທດຄວນທີ່ຈະເບິ່ງວ່າເຮົາຈະດຳເນີນກິດຈະກຳການຮ່ວມມືຕ່າງໆໃຫ້ໄວທີ່ສຸດໄດ້ດ້ວຍວິທີໃດ  ເພາະຂ້າພະເຈົ້າຄິດວ່າ ທຸກປະເທດຈະຖ້າຈົນກວ່າການຕິດເຊື້ອທີ່ເປັນ 0 ເປັນເວລາຫຼາຍໆເດືອນ ອາດຈະຖ້າບໍ່ໄດ້, ເພາະຍັງມີອີກມິຕິໜຶ່ງ ກໍ່ຄືເລື່ອງຂອງເສດຖະກິດ. ດັ່ງນັ້ນ, ແຕ່ລະປະເທດຕ້ອງເບິ່ງວ່າຈຸດໃດທີ່ເປັນຈຸດທີ່ພໍດີ ເປັນຕົ້ນແມ່ນ ການຕິດເຊື້ອບໍ່ມີ ພາກທຸລະກິດໃດສາມາດດຳເນີນຕໍ່ໄປໄດ້ ເຊິ່ງເປັນເລື່ອງທີ່ຈໍາເປັນທີ່ສຸດ ທີ່ເຮົາຈະດຳເນີນກິດຈະກຳທາງດ້ານເສດຖະກິດດ້ວຍກັນ 

ທ່ານເອກອັກຄະຣາຊາທູດ ຍັງໄດ້ກ່າວວ່າ: ທຸລະກິດທີ່ກ່ຽວຂ້ອງກັບການທ່ອງທ່ຽວ ເປັນຕົ້ນແມ່ນຢູ່ຫຼວງພະບາງ ຖ້າເຮົາປ່ອຍໄປອີກຫຼາຍໆເດືອນ ເຂົາເຈົ້າອາດຈະເຈັບຫຼາຍກວ່ານີ້  ແຕ່ຖ້າເຮົາເລືອກວ່າ ຫຼວງພະບາງ ຈະສາມາດເຊື່ອມຕໍ່ໄດ້ປະເທດໃດ ເຂດໃດ  ແລ້ວຮັບນັກທ່ອງທ່ຽວຈາກປະເທດນັ້ນເຂົ້າມາ ຂ້າພະເຈົ້າຄິດວ່າ ຈະສາມາດຊ່ວຍໂຮງແຮມ ຮ້ານອາຫານ ທຸລະກິດຂົນສົ່ງໄດ້ 

ທ່ານ ນາງ ຄໍາຈັນ ວົງແສນບູນ ຮອງລັດຖະມົນຕີ ກະຊວງແຜນການ ແລະ ການລົງທຶນ ໄດ້ກ່າວຕື່ມວ່າ: ຄືທີ່ເຮົາຮູ້ແລ້ວວ່າ ທັງສອງປະເທດແມ່ນສາມາດຄວບຄຸມພະຍາດໂຄວິດ-19 ໄດ້ດີ ແລະ ສປປ ລາວ ເອງກໍ່ບໍ່ມີຜູ້ຕິດເຊື້ອເພີ່ມມາໄດ້ 80 ກວ່າມືແລ້ວ ແຕ່ເຖິງແນວໃດກໍ່ຕາມລັດຖະບານລາວ ກໍ່ຍັງໃຫ້ຄວາມສໍາຄັນ ຕໍ່ກັບວຽກງານການສະກັດກັ້ນ ແລະ ການປ້ອງກັນການລະບາດຂອງພະຍາດໂຄວິດ-19 ແລະລັດຖະບານປັບປຸງມາດຕະການເພື່ອໃຫ້ສອດຄ່ອງກັບແຕ່ລະໄລຍະ ມາຮອດປະຈຸບັນນີ້ ສຳນັກງານນາຍົກລັດຖະມົນຕີ ກໍ່ໄດ້ອອກແຈ້ງການເລື່ອງການສືບຕໍ່ປະຕິບັດມາດຕາການຜ່ອນຜັນ ແລະ ມາດຕະການສືບຕໍ່ໃນໄລຍະວັນທີ 01-31 ກໍລະກົດ 2020 ເປັນຕົ້ນແມ່ນ ສືບຕໍ່ການປິດດ່ານປະເພນີ ດ່ານທ້ອງຖິ່ນ ແລະ ສາກົນ ສຳລັບການເຂົ້າອອກຂອງບຸກຄົນທົ່ວໄປ, ໂຈະການອອກວິຊ່າທ່ອງທຽວ ຢ້ຽມຢາມ ຂອງບຸກຄົນທີ່ເດີນທາງມາຈາກປະເທດທີ່ມີການລະບາດ ຫຼື ຜ່ານປະເທດທີ່ມີການລະບາດ

ສ່ວນເລື່ອງຂອງການເປີດປິດດ່ານ ທ່ານເອກອັກຄະຣາຊາທູດ ໄດ້ກ່າວວ່າ ຖ້າສະຖານະການທັງສອງປະເທດເລີ່ມນິ້ງແລ້ວ ຂ້າພະເຈົ້າຄິດວ່າອາດຈະເປັນໄປໄດ້ທີ່ຈະມີການເປີດດ່ານ ແຕ່ອາດຈະບໍ່ໄດ້ເປີດພ້ອມກັນທັງໝົດທຸກດ່ານ ອາດຈະເປີດດ່ານທີ່ສຳຄັນ ແລະ ຂ້າພະເຈົ້າກໍ່ຄິດວ່າລັດຖະບານໄດ້ຄິດເຫັນເລື່ອງນີ້ຢູ່ແລ້ວ 

ນອກຈາກນີ້ແລ້ວ, ທ່ານເອກອັກຄະຣາຊາທູດ ຍັງໄດ້ກ່າວເຖິງເລື່ອງຂອງ Travel Bubble ວ່າ: ໄດ້ມີການເຜີຍວ່າປະເທດທີ່ມີຄວາມສ່ຽງຕໍ່າໄດ້ມີການພິຈາລະນາຢູ່ 7-8 ປະເທດ ທີ່ອາດຈະມີການພິຈາລະນະເຮັດ Travel Bubble ແລ້ວໃນ 7-8 ປະເທດນີ້ ກໍ່ມີ ສປປ ລາວລວມຢູ່ນຳ  ແຕ່ຂ້າພະເຈົ້າຍັງຕອບບໍ່ໄດ້ ວ່າຈະເກີດຂຶ້ນຕອນໃດ ແຕ່ຂ້າພະເຈົ້າຕອບໄດ້ວ່າ ຕອນນີ້ລັດຖະບານໄທໄດ້ຄິດແລ້ວ ແລະ ລໍຖ້າຈັ່ງຫວະເວລາຕ່າງໆຢູ່. ຂ້າພະເຈົ້າຍັງຄິດວ່າເຮົາໜ້າຈະເອົາແຜ່ນທີ່ມາເບິ່ງວ່າປະເທດໃດ ທີ່ບໍ່ມີຜູ້ຕິດເຊື້ອ ແລ້ວເຮັດ Travel Bubble  ເປັນໂຊນໆໄປຂ້າພະເຈົ້າຄິດວ່າອາດຈະເປັນຈຸດເລີ່ມຕົ້ນທີ່ດີ ແລະ ໃນຂະນະທີ່ເຮັດ Travel Bubble ເຮົາກໍ່ສາມາດປະສົມມາດຕະການເຂົ້າໄປນໍາ ເຊັ່ນ: ກ່ອນເດີນທາງຕ້ອງໄດ້ກວດໂຄວິດ-19 ກ່ອນ ແລະ ເມື່ອຮອດສະໜາມບິນກໍ່ກວດໂຄວິດ-19 ອີກ ຫຼື ຕ້ອງມີການໃສ່ໜ້າກາກອະນາໄມ ຕ້ອງລ້າງມືດ້ວຍເຈວ ແລະ ຫຼິກລ່ຽງຈຸດສ່ຽງ  ຖ້າເຮົາປະສົມມາດຕະການເຫຼົ່ານີ້ເຂົ້າໄປ ຂ້າພະເຈົ້າຄິດວ່າ Travel Bubble ຈະໄປໄດ້. ເພາະເລື່ອງນີ້ມີຄວາມສຳຄັນ ເພາະຖ້າເຮົາປ່ອຍໄປດົນໆ ເປັນຫຼາຍໆເດືອນ ພາກທຸລະກິດຈະວິກິດໜັກ ເພາະສະນັ້ນເຮົາຕ້ອງຫາຈຸດທີ່ສົມດຸນ ເພື່ອເຮັດໃຫ້ເສດຖະກິດຜ່ອນໜັກໃຫ້ເປັນເບົາໄດ້ 

LEAVE A REPLY

Please enter your comment!
Please enter your name here