ຄວາມຊຸ່ມໃນມື້ທີ່ຝົນຕົກ ມັກເຮັດໃຫ້ເກີດກິ່ນອັບໃນເສື້ອຜ້າ ໂດຍສະເພາະຜູ້ທີ່ມັກມີເຫື່ອອອກງ່າຍ ມື້ນີ້ ອິນໄຊລາວຈຶ່ງໄດ້ນໍາເອົາວິທີໃນການກຳຈັດກິ່ນອັບໃນເສື້ອຜ້າຊ່ວງຍາມຝົນມາຝາກທຸກຄົນ

ເບກກິ້ງໂຊດາ ແກ້ບັນຫາກິ່ນອັບໄດ້

ຖ້າເວົ້າເລື່ອງກຳຈັດກິ່ນ ຈະຂາດເບກກິ້ງໂຊດາ ບໍ່ໄດ້ເລີຍ ເພາະວ່າເບກກິ້ງໂຊດາ ສາມາດກຳຈັດກິ່ນລວມໄປເຖິງບັນດາຄາບເປື່ອນຕ່າງໆ ຢູ່ເສື້ອຜ້າໄດ້ດີ ເຊິ່ງວິທີໃຊ້ເບກກິ້ງໂຊດາກຳຈັດກິ່ນອັບນັ້ນກໍ່ງ່າຍຫຼາຍ

  • ເຕີມນໍ້າລົງໃນກະຊາມ ຈາກນັ້ນໃສ່ເບກກິ້ງໂຊດາລົງໄປ 1 ຖ້ວຍ ແລ້ວປະສົມໃຫ້ເຂົ້າກັບນໍ້າ
  • ນໍາເສື້ອລົງໄປແຊ່ ປະມານ 30 ນາທີ ແລ້ວກໍນໍາໄປຊັກຕາມປົກກະຕິອີກຮອບ
  • ບິດເສື້ອໃຫ້ແຫ້ງແລ້ວນໍາໄປຕ່າງບ່ອນທີ່ອາກາດຖ່າຍເທດີ

ວອດກ້າ ແກ້ບັນຫາຜ້າເໝັ່ນອັບແບບດ່ວນໆ

ໃຜທີ່ມີເຄື່ອງດື່ມແອວກໍຮໍ ເປັນຕົ້ນແມ່ນ ວອດກ້າ ຢູ່ເຮືອນ ກໍ່ສາມາດນໍາມາໃຊ້ແກ້ບັນຫາກິ່ນອັບໄດ້ດີ ດ້ວຍວິທີດັ່ງນີ້:

  • ນໍາຂວດສະເປເປົາ ມາໃສ່ນໍ້າປະມານເຄີ່ງຂວດ
  • ຫຼັງຈາກນັ້ນ ເຕີມສ່ວນເຫຼືອດ້ວຍວອດກ້າ ປະສົມສ່ວນປະສົມເຂົ້າກັນ
  • ຫຼັງຈາກນັ້ນປີ້ນດ້ານໃນຂອງເສື້ອມາດ້ານນອກ ສິດສະເປວອດກ້າ ລົງໃສ່ເສື້ອບໍລິເວນທີ່ມີກິ່ນເໝັ່ນອັບໃຫ້ທົ່ວ

ທານໍ້າໝາກນາວກຳຈັດກິ່ນເໝັ່ນອັບ

ນອກຈາກສາມາດກໍາຈັດກິ່ນອັບໄດ້ ໂດຍທີ່ບໍ່ຕ້ອງໃສ່ສານເຄມີ ນໍ້າໝາກນາວຍັງບໍ່ທໍາຮ້າຍ ເນື້ອຜ້າໃຫ້ເສຍຫາຍອີກດ້ວຍ ວິທີງ່າຍໆແມ່ນ ປະສົມນໍ້າໝາກນາວກັບນໍ້າ ແລ້ວນໍາມາເຊັດຄາບເຫື້ອຢູ່ເສື້ອ ພຽງເທົ່ານີ້ ກິ່ນເໝັ່ນອັບຕ່າງໆກໍ່ໝົດໄປ

ໂຮຍກາເຟ່ສົດ ລົດກິ່ນອັບ

ຖືວ່າເປັນເລືອກໂຊກດີຂອງຜູ້ທີ່ມັກກິນກາເຟ່ ແລະ ມັກບົດກາເຟ່ແບບສົດໆ ເພາະຫາກນໍາໄປໂຮຍໃນຖົງເຈ້ຍ ຫຼື ກ່ອງທີ່ເກັບມ້ຽນເຄື່ອງ ກາກກາເຟ່ຈະດູດກິ່ນອັບໄດ້ດີ

ຖ່ານດຳ ບ້ານເຮົາ

ອີກໜຶ່ງຕົວຊ່ວຍສຳຄັນ ໃນການດັບກິ່ນອັບແມ່ນ ຖ່ານດຳ ແຕ່ຄວນນໍາຖ່ານດໍາໄປໃສ່ໄວ້ໃນຖົງເຈ້ຍ ຫຼື ຖ້ວຍກ່ອນ ແລ້ວຄ່ອຍນໍາໄປວາງໄວ້ໃກ້ໆເສື້ອຜ້າ ປະໄວ້ໜຶ່ງຄືນ ກິ່ນອັບຫາຍແນ່ນອນ

ເປັນແນວໃດ ສຳລັບເຄັດບໍ່ລັບທີ່ເຮົານໍາມາຝາກ ຫາກໃຜທີ່ກຳລັງພົບບັນຫາກິ່ນອັບຢູ່ ສາມາດເອົາໄປປັບໃຊ້ໄດ້ເດີ້

LEAVE A REPLY

Please enter your comment!
Please enter your name here