ເຖິງພະຍາດໂຄວິດ-19 ຈະບໍ່ມີຢູ່ບ້ານເຮົາມາໄດ້ 70 ກວ່າມື້ແລ້ວ, ແຕ່ຍັງສົ່ງຜົນກະທົບຕໍ່ກັບບັນດາຮ້ານອາຫານ ແລະ ຮ້ານຄ້າ ຮ້ານບໍລິການຕ່າງໆ ທີ່ຕ້ອງອາໄສກຸ່ມລູກຄ້າຕ່າງປະເທດເປັນກຸ່ມຫຼັກໆ

ສຳລັບຮ້ານອາຫານ, ຮ້ານຂາຍເຄື່ອງຫັດຖະກຳ (ເຄື່ອງຝາກຂອງຕ້ອນ) ແລະ ຮ້ານບໍລິການຕ່າງໆ ແມ່ນໄດ້ຮັບຜົນກະທົບໂດຍກົງ ເນື່ອງຈາກວ່າທາງລັດຖະບານໄດ້ເລີ່ມປະກາດໃຫ້ປິດ ແລະ ຊ່ວງທໍາອິດກໍ່ໄດ້ອອກຄໍາສັ່ງ ໃຫ້ບັນດາຮ້ານອາຫານຕ່າງໆປິດກິດຈະການຊົ່ວຄາວ ເພື່ອຢຸດການແຜ່ລະບາດຂອງພະຍາດໂຄວິດ-19, ຈົນມາຮອດ ວັນທີ 3 ພຶດສະພາ 2020 ລັດຖະບານໄດ້ອອກແຈ້ງການ ໃຫ້ບັນດາທຸລະກິດ ຮ້ານອາຫານສາມາດດຳເນີນທຸລະກິດຕໍ່ໄດ້ ແຕ່ຕ້ອງຮັກສາມາດຕະການ ການປ້ອງກັນຢ່າງເຂັ້ມງວດ

ເຖິງແນວໃດກໍ່ຕາມ, ສໍາລັບທຸລະກິດ ທີ່ອາໄສລູກຄ້າຊາວຕ່າງປະເທດ ກໍ່ຍັງໄດ້ຮັບຜົນກະທົບຢູ່ ເນື່ອງຈາກວ່າດ່ານສາກົນຕ່າງໆ ແມ່ນຍັງປິດຢູ່ ເຮັດໃຫ້ຮ້ານອາຫານ ແລະ ຮ້ານຄ້າເຫຼົ່ານີ້ ຕ້ອງໄດ້ປັບຕົວ ເພື່ອຮັບມືກັບສະພາບການດັ່ງໃຫ້ໄດ້

ທ່ານ ບຸນອຸ້ມ ໄຊນະວົງ ຜູ້ຈັດການ ຮ້ານວານິລາ ຄາເຟ່ ກໍ່ໄດ້ໃຫ້ສຳພາດວ່າ:  ຫຼັງຈາກທີ່ທາງການໄດ້ອອກມາດຕະການມາ ທາງຮ້ານເຮົາກໍ່ໄດ້ປະຕິບັດຕາມມາດຕະການຢ່າງເຂັ້ມງວດ ໂດຍທາງຮ້ານເອງກໍ່ໄດ້ປິດຮ້ານ ແລະ ຈ່າຍເງິນເດືອນໃຫ້ພະນັກງານ 50% ຂອງເງິນເດືອນ, ມາຮອດວັນທີ 21 ເມສາ 2020 ທາງຮ້ານເຮົາໄດ້ກັບມາບໍລິການຄືນ ແຕ່ເປັນການໃຫ້ຊື້ກັບໄປກິນຢູ່ບ້ານເທົ່ານັ້ນ. ຈົນມາຮອດວັນທີ 1 ພຶດສະພາ 2020 ທາງຮ້ານກໍ່ເປີດໃຫ້ລູກຄ້າສາມາດມານັ່ງກິນຢູ່ຮ້ານໄດ້ ແຕ່ໃຫ້ນັ່ງຫ່າງກັນ ແລະ ທາງຮ້ານກໍ່ໄດ້ເພີ່ມການບໍລິການສົ່ງຮອດບ້ານ ເພື່ອເປັນການເພີ່ມຊ່ອງທາງການຂາຍໃຫ້ຫຼາຍຂຶ້ນອີກດ້ວຍ

ທ່ານ ນາງ ວົງສະຫວັນ ມູນດາລາ ເຈົ້າຂອງຮ້ານ ມີໄຊ ຫັດຖະກຳ ໄດ້ໃຫ້ສຳພາດກັບອິນໄຊລາວວ່າ: ເລີ່ມຕັ້ງແຕ່ເດືອນມັງກອນເປັນຕົ້ນມາ ຕົນເອງກໍ່ໄດ້ຕິດຕາມສະຖານະການຢ່າງໃກ້ຊິດ ແລະ ຕົນເອງກໍ່ຮູ້ເລີຍວ່າ ທຸກສິ່ງທຸກຢ່າງກຳລັງຈະປ່ຽນໄປ ແຕ່ຕອນນັ້ນ ກໍ່ຍັງບໍ່ໄດ້ເຮັດຫຍັງເທື່ອ ມີແຕ່ພະຍາຍາມເກັບ ເທົ່າທີ່ຈະເກັບໄດ້ ແລ້ວກໍ່ປະຫຍັດຄ່າໃຊ້ຈ່າຍ ເພື່ອຕິດຕາມສະພາບຕົວຈີງ, ແລ້ວທາງຮ້ານຂອງພວກເຮົາ ກໍ່ໄດ້ເລີ່ມປິດຮ້ານ ກ່ອນທີ່ຈະມີຄໍາສັ່ງຈາກທາງລັດຖະບານ ເນື່ອງຈາກວ່າ ລູກຄ້າແມ່ນບໍ່ມີແລ້ວ ຈົນມາຮອດທ້າຍເດືອນພຶດສະພາ ຈື່ງໄດ້ກັບມາເປີດຮ້ານອີກຄັ້ງ 

ທ່ານຍັງໄດ້ກ່າວຕື່ມວ່າ: ຫຼັງຈາກໄດ້ເປີດຮ້ານກັບຄືນມາ ທາງຮ້ານກໍ່ໄດ້ເຮັດໂປຣໂມຊັ່ນ ເພື່ອດຶງດູດລູກຄ້າຄົນລາວ ແລະ ຕົນເອງກໍ່ໄດ້ມາເຮັດຂະໜົມຂອງປະເທດອັງກິດ ຂາຍທາງອອນລາຍ ແຕ່ລາຍຮັບກໍ່ເພີ່ມຂຶ້ນໜ້ອຍໜຶ່ງ ດີກວ່າບໍ່ໄດ້ຫຍັງເລີຍ ທັງນີ້ ສຳລັບພະນັກງານ ແມ່ນເຮົາຈ່າຍເງິນເດືອນເຄີ່ງໜຶ່ງ ເນື່ອງຈາກເຄື່ອງເຮົາບໍ່ໄດ້ຂາຍຄືກັບເມື່ອກ່ອນ ແຕ່ຢູ່ກິນແມ່ນຂຶ້ນກັບຮ້ານເລີຍ

ທ່ານ ນາງ ວົງລັດສະໝີ ສີບຸນເຮືອງ ເຈົ້າຂອງ Orange Backpacker Hostel ໄດ້ໃຫ້ກໍ່ໄດ້ໃຫ້ສຳພາດວ່າ: ພວກເຮົາໄດ້ເລີ່ມປິດກິດຈະການຕັ້ງແຕ່ຕົ້ນເດືອນມີນາ ແລ້ວໄດ້ກັບມາເປີດໃໝ່ ໃນວັນທີ 20 ພຶດສະພາ 2020 ແລະ ໃນລະຫວ່າງທີ່ປິດໄປ ພວກເຮົາກໍ່ເຮັດຫຍັງບໍ່ໄດ້ເລີຍ, ແຂກທີ່ມີພັກຈໍານວນໜຶ່ງກໍ່ໄດ້ເດີນທາງກັບບ້ານ ອີກຈໍານວນໜຶ່ງກໍ່ໄດ້ອອກໄປຢູ່ນອກ ເພື່ອເປັນການປະຫຍັດລາຍຈ່າຍຂອງເຂົາເຈົ້າ ໂດຍການໄປ ເຊົ່າເຮືອນຢູ່ເອງ

ທ່ານຍັງໄດ້ກ່າວຕື່ມວ່າ: ທຸລະກິດນີ້ ແມ່ນຮອງຮັບສະເພາະນັກທ່ອງທ່ຽວຕ່າງປະເທດເທົ່ານັ້ນ ເພາະວ່າຄົນລາວເຮົາບໍ່ມັກພັກໃນສະຖານທີ່ແບບນີ້ ທາງເຮົາກໍ່ໄດ້ມີການຫຼຸດຈໍານວນພະນັກງານລົງ ເພາະວ່າແຂກບໍ່ມີ ລາຍຮັບກໍ່ບໍ່ມີ ກໍ່ຕ້ອງໄດ້ຈໍາເປັນເຮັດແບບນັ້ນ ມາຮອດຕອນນີ້ກໍາລັງຄິດວ່າຈະລອງເຮັດອາຫານຂາຍເບິ່ງ ເພື່ອເປັນການຫາຊ່ອງທາງປະຄັບປະຄອງກັນໄປ ເພາະຄິດວ່າຄືຈະຍັງດົນ ທີ່ສະຖານະການຈະກັບມາເປັນຄືເກົ່າ

ແນວໃດກໍ່ດີ ເຖິງວ່າຄົນລາວເຮົາຈະບໍ່ນິຍົມທ່ອງທ່ຽວແບບແບັກແພັກເກີ ແຕ່ກໍ່ຢາກໃຫ້ເບິ່ງທຸລະກິດອຶ່ນໆ ທີ່ຄົນລາວເຮົາສາມາດຊ່ວຍກັນໄດ້  “ເພື່ອເປັນການສະໜັບສະໜູນກັນເອງພາຍໃນປະເທດ ທັງເປັນການປະຄັບປະຄອງ ແລະ ຟື້ນຟູ ເສດຖະກິດໄປນໍາກັນ” ທ່ານ ນາງ ວົງລັດສະໝີ ສີບຸນເຮືອງ ໄດ້ກ່າວຕອນທ້າຍ

LEAVE A REPLY

Please enter your comment!
Please enter your name here