ວັນນີ 24 ມິຖຸນາ 2020, ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປລາວ ໄດ້ລາຍງານກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ຕໍ່ກອງປະຊຸມສະໄໝສາມັນເທື່ອທີ 09 ຂອງສະພາແຫ່ງຊາດຊຸດທີ VIII. ໂດຍມີລາຍລະອຽດດັ່ງນີ້:

  • ຍ້ອນມີຜົນກະທົບຈາກຫລາຍປັດໄຈ, ອີງໃສ່ການຄາດຄະເນຂອງສະຖາບັນຄົ້ນຄວ້າເສດຖະກິດແຫ່ງຊາດ ແລະ ສູນສະຖິຕິແຫ່ງຊາດ ໂດຍນຳໃຊ້ຂໍ້ມູນ 03 ເດືອນຄາດຄະເນໝົດປີ 2020, ເສດຖະກິດຂອງປະເທດເຮົາ (GDP) ຈະຂະຫຍາຍຕົວຢູ່ໃນລະດັບ 3,3% ຫາ 3,6% (ສະພາແຫ່ງຊາດຮັບຮອງ 6,5%), ເຊີ່ງໃນກໍລະນີ GDP ຂະຫຍາຍຕົວ 3,6% ຈະມີມູນຄ່າໃນປີປະມານ 175.720 ຕື້ກີບ ໃນ 2020

  • ຂະແໜງກະສິກຳ ຂະຫຍາຍຕົວ 2,3% ຫລຸດແຜນການ 0,4%, ເຖິງວ່າຈະບໍ່ບັນລຸຕາມແຜນການທີ່ວາງໄວ້ແຕ່ເຫັນວ່າ:

  1. ປະຊາຊົນ ໄດ້ຫັນມາສູ່ການຜະລິດກະສິກໍາ ເພື່ອສະໜອງພາຍໃນເພີ່ມຂຶ້ນ ຕາມຄວາມຕ້ອງການຂອງຕະຫລາດຍ້ອນການຈໍາກັດການສົ່ງອອກສິນຄ້າກະສິກໍາ ຂອງປະເທດເພື່ອນບ້ານ ເຮັດໃຫ້ການບໍລິໂພກຜະລິດຕະພັນພາຍໃນຫລາຍຂຶ້ນ,
  2. ການປູກພືດ, ຜັກ ແລະ ໝາກໄມ້ຕ່າງໆ ສາມາດປະຕິບັດໄດ້ປະມານ 85.477 ເຮັກຕາ, ຄາດຄະເນຜົນຜະລິດ ຈະໄດ້ຮັບປະມານ 813.970 ກວ່າໂຕນ ເທົ່າກັບ 68% ຂອງແຜນການ,
  3. ການຜະລິດພືດລະດູແລ້ງ ປະຕິບັດໄດ້ໃນເນື້ອທີ່ 24.578 ກວ່າເຮັກຕາ ແລະ ສະເພາະການຜະລິດເຂົ້າສົ່ງອອກໄປ ສປຈີນ ບັນລຸໄດ້ 15.000 ໂຕນ;
  • ຂະແໜງອຸດສາຫະກຳ ຂະຫຍາຍຕົວ 6,8% ຫລຸດແຜນການ 1,5%:
  1. ອຸດສາຫະກໍາປຸງແຕ່ງ ແລະ ຫັດຖະກໍາ ຄາດຄະເນ ປະຕິບັດໄດ້ 3.574 ຕື້ກີບ, ເທົ່າກັບ 24,44% ຂອງແຜນການປີ, ທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 10,20%,
  2. ຄາດຄະເນ 06 ເດືອນຕົ້ນປີ ຈະປະຕິບັດໄດ້ 6.256 ຕື້ກີບ
  • ຂະແໜງບໍລິການ, ເຖິງແມ່ນວ່າລັດຖະບານ ໄດ້ເອົາໃຈໃສ່ຜັນຂະຫຍາຍມາດຕະການຕ່າງໆ ເພື່ອສົ່ງເສີມການທ່ອງທ່ຽວຢ່າງຕໍ່ເນື່ອງ ໂດຍສະເພາະແມ່ນການທ່ອງທ່ຽວລາວ-ຈີນ:
  1. ການລະບາດຂອງພະຍາດໂຄວິດ-19 ໄດ້ສົ່ງຜົນກະທົບຕໍ່ຂະແໜງການບໍລິການ ຢ່າງໜັກໜ່ວງ ຊຶ່ງເຫັນວ່າຈະສາມາດປະຕິບັດໄດ້ພຽງ 1,7% ຫລຸດແຜນການ 5,2% ແລະ ອາດຈະຫລຸດລົງເຖິງ 4,5%,
  2. ສັງລວມແລ້ວ ນັກທ່ອງທ່ຽວເຂົ້າມາປະເທດຂອງເຮົາໃນ 05 ເດືອນຕົ້ນປີ 2020 ມີພຽງ 886.447 ເທື່ອຄົນ, ຫລຸດລົງ 17% ທຽບໃສ່ໄລຍະດຽວກັນຂອງປີຜ່ານມາ,
  3. ຂະນະທີ່ ການຂົນສົ່ງທາງອາກາດ ແລະ ທາງບົກຜູ້ໂດຍສານຫລຸດລົງກວ່າ 90%;
  • ມູນຄ່າການນຳເຂົ້າ-ສົ່ງອອກສິນຄ້າ ປະຕິບັດໄດ້ 39,78% ຂອງແຜນການປີ:
  1. ໃນນັ້ນການສົ່ງອອກຫລຸດລົງ 6,1%, ການນໍາເຂົ້າຫລຸດລົງ 8,1% ຄາດວ່າໝົດປີຈະສາມາດປະຕິບັດ 91,7% ຂອງແຜນການປີ,
  2. ຈະສູນເສຍລາຍຮັບຈາກການສົ່ງອອກ ປະມານ 483,3 ລ້ານໂດລາສະຫະລັດ ຫລື ປະມານ 8,4% ຂອງມູນຄ່າການສົ່ງອອກ ທຽບໃສ່ປີ 2019,
  3. ການຈໍລະຈອນສິນຄ້າພາຍໃນ ປະຕິບັດໄດ້ 29.290 ຕື້ກີບ ເທົ່າກັບ 40,47% ຂອງແຜນການ, ຄາດຄະເນ 06 ເດືອນທ້າຍປີ ຈະສາມາດບັນລຸໄດ້ 90,29% ຂອງແຜນການ;
  •  ລັດຖະບານ ໄດ້ຕິດຕາມ ແລະ ແກ້ໄຂຫລາຍບັນຫາ ທີ່ເກີດຂຶ້ນໃນໄລຍະປິດດ່ານຊາຍແດນ ເຮັດໃຫ້ການຂົນສົ່ງສິນຄ້າ ສາມາດດໍາເນີນໄປໄດ້ເປັນປົກກະຕິ ໄດ້ເອົາໃຈໃສ່ເປັນພິເສດຕໍ່ການຕິດຕາມ, ກວດກາ ແລະ ຄຸ້ມຄອງລາຄາສິນຄ້າອຸປະໂພກ-ບໍລິໂພກ ທີ່ຈໍາເປັນຢ່າງຕັ້ງໜ້າ;
  • ຂະແໜງພະລັງງານ ແລະ ບໍ່ແຮ່, ການຜະລິດກະແສໄຟຟ້າ ປະຕິບັດໄດ້ 18.808 ລ້ານ ກິໂລວັດໂມງ, ມູນຄ່າ 9.792 ຕື້ກີບ ເທົ່າກັບ 46% ຂອງແຜນການປີ:
  1. ຄາດຄະເນໝົດປີ ຈະສາມາດປະຕິບັດໄດ້ 41.340 ລ້ານ ກິໂລວັດໂມງ ມີມູນຄ່າປະມານ 21.286 ຕື້ກີບ ແລະ ເຫັນວ່າລື່ນແຜນເລັກໜ້ອຍ,
  2. ຢ່າງໃດກໍຕາມ, ພາຍຫລັງທີ່ໄດ້ປະກາດນໍາໃຊ້ນະໂຍບາຍໂຄງສ້າງລາຄາໄຟຟ້າໃໝ່ ເຫັນວ່າມີຫາງສຽງສັງຄົມທີ່ຂັດຂ້ອງຈົ່ມວ່າຫລາຍສົມຄວນ,
  3. ດັ່ງນັ້ນ, ລັດຖະບານ ຈິ່ງໄດ້ຊີ້ນໍາໃຫ້ກະຊວງພະລັງງານ ແລະ ບໍ່ແຮ່ ຄົ້ນຄວ້າປັບລາຄາກະແສໄຟຟ້າຄືນ ໃໝ່ໃຫ້ຖືກຕ້ອງ ແລະ ສອດຄ່ອງກັບສະພາບຕົວຈິງ ຊຶ່ງລາຍລະອຽດຂະແໜງການກ່ຽວຂ້ອງຈະຊີ້ແຈງຕໍ່ກອງປະຊຸມຕື່ມ,
  4. ສໍາລັບດ້ານແຮ່ທາດ ສາມາດຜະລິດໄດ້5.181 ຕື້ກີບ ເທົ່າກັບ 47% ຂອງແຜນການ, ທຽບກັບໄລຍະດຽວກັນຂອງປີຜ່ານມາ ຫລຸດລົງ 8% ຍ້ອນບາງໂຄງການໄດ້ຢຸດການຜະລິດ, ຄາດຄະເນໝົດປີການຜະລິດແຮ່ທາດຈະສາມາດປະຕິບັດໄດ້ 10.851 ຕື້ກີບ ລື່ນແຜນການປະມານ 13%;
  • ໃນຂະນະທີ່ ທະນາຄານພັດທະນາອາຊີ (ເອດີບີ) ຄາດຄະເນວ່າເສດຖະກິດຂອງ ສປປລາວ ຈະຂະຫຍາຍຕົວຢູ່ໃນລະດັບ 3,5% ໃນປີ 2020:
  1. ຜົນການຄົ້ນຄວ້າຫລ້າສຸດເຫັນວ່າອາດຈະຕິດລົບເຖິງ -0,5% ຍ້ອນຜົນກະທົບຈາກການລະບາດ ຂອງພະຍາດໂຄວິດ-19 ທີ່ແກ່ຍາວ,
  2. ໃນນີ້, ອາດເຮັດໃຫ້ການບໍລິການຕິດລົບ -3,2% ແລະ ຜົນຜະລິດກະສິກຳ ຈະໄດ້ຮັບຜົນກະທົບຍ້ອນໄພທຳມະຊາດ (ໄພແລ້ງ ແລະ ຝົນຕົກໜັກ);
  • ທະນາຄານໂລກ ກໍໄດ້ຄາດຄະເນເສດຖະກິດລາວຈະເຕີບໂຕພຽງ 1% ແຕ່ຖ້າຜົນກະທົບຈາກໂຄວິດ-19 ແກ່ຍາວ ຫຼື ອາດຈະເຮັດໃຫ້ຕິດລົບ -1,8% ແລະ ສ່ວນອົງການກອງທຶນການເງິນສາກົນ(IMF) ໄດ້ຄາດຄະເນໃຫ້ພຽງ 0,7% ເທົ່ານັ້ນ (ຂໍ້ມູນຈາກສຳນັກງານຂ່າວສານແຫ່ງປະເທດລາວ).

LEAVE A REPLY

Please enter your comment!
Please enter your name here