ຝົນມາ ເຮົາກໍ່ຕ້ອງເບິ່ງແຍງສຸຂະພາບໃຫ້ຫຼາຍຂຶ້ນເປັນພິເສດ ເພື່ອຫ່າງໄກຈາກພະຍາດທີ່ມາກັບຍາມຝົນ

ຊ່ວງນີ້ເປັນຊ່ວງທີ່ອາກາດມີການປ່ຽນແປງ ບຶດຮ້ອນ ບຶດຝົນຕົກ ເພາະສະນັ້ນ ເຮົາຄວນເບິ່ງແຍງສຸຂະພາບຕົນເອງໃຫ້ຫຼາຍຂຶ້ນເປັນພິເສດ  ເພື່ອໃຫ້ຮ່າງກາຍສາມາດປັບສະພາບຕໍ່ການປ່ຽນແປງອາກາດໄດ້ ໂດຍບໍ່ກໍ່ໃຫ້ເກີດຜົນກະທົບຕໍ່ສຸຂະພາບ ແລະ ເພື່ອປ້ອງກັນການເກີດພະຍາດຕ່າງໆທີ່ກ່ຽວກັບລະບົບຫາຍໃຈ  ເປັນຕົ້ນແມ່ນ: ໄຂ່ຫວັດ, ປອດບວມ, ຫຼອດລົມອັກເສບ

ດັ່ງນັ້ນ ການເບິ່ງແຍງສຸຂະພາບໃຫ້ດີ ເພື່ອປ້ອງກັນຕົນເອງບໍ່ໃຫ້ເຈັບປ່ວຍໄດ້ງ່າຍ ຈື່ງເປັນວິທີທີ່ດີທີ່ສຸດ ມື້ນີ້ອິນໄຊລາວ ໄດ້ນໍາເອົາບົດຄວາມຈາກເວັບໄຊ honestdocs  ມາໃຫ້ທຸກຄົນໄດ້ເອົາໄປປະຕິບັດ

8 ວິທີເບິ່ງແຍງສຸຂະພາບໃນຊ່ວງລະດູຝົນ

1.       ດື່ມນໍ້າສະອາດຢ່າງນ້ອຍມື້ລະ 1,5 ລິດ

ໃນແຕ່ລະມື້ ເຮົາຄວນດື່ມນໍ້າສະອາດໃຫ້ພຽງພໍຢ່າງນ້ອຍມື້ລະ 1,5 ລິດ ຄວນເປັນນໍ້າອຸ່ນ ເພື່ອໃຫ້ຮັກສາສົມດຸນຂອງຮ່າງກາຍ ຄວບຄຸມລະດັບອຸນຫະພູມຮ່າງກາຍໃຫ້ປົກກະຕິ ນໍ້າຈະຊ່ວຍເພີ່ມການໄຫຼວຽນຂອງເລືອດ ເຮັດໃຫ້ເຊວຕ່າງໆໃນຮ່າງກາຍບໍ່ຂາດນໍ້າ ແລະ ສ້າງພູມຄຸມກັນທີ່ດີ ອີກທັງການດື່ມນໍ້າໃຫ້ພຽງພໍ ບໍ່ເປັນຫວັດໄດ້ງ່າຍອີກ

2.       ນອນຫຼັບພັກຜ່ອນມື້ລະ 6-8 ຊົ່ວໂມງ

ສຳລັບຜູ້ທີ່ຢູ່ໃນໄວອາຍຸຜູ້ໃຫ່ຍ ຄວນນອນຢ່າງໜ້ອຍມື້ລະ  6-8 ຊົ່ວໂມງ ເພື່ອໃຫ້ຮ່າງກາຍໄດ້ປັບປຸງສ່ວນທີ່ອ່ອນເພຍ ຟື້ນຟູສຸຂະພາບຮ່າງກາຍໃຫ້ດີຂຶ້ນ ບໍ່ນອນເດີກ ເພາະການນອນເດີກຈະເປັນການຫຼຸດໂອກາດການຫຼັ່ງຂອງໂກສຮໍໂມນ (ຮໍໂມນແຫ່ງຄວາມອ່ອນເຍົາ) ລົງຫຼາຍເທົ່າ ອີກທັງການນອນເດີກຍັງເຮັດໃຫ້ອະໄວຍະວະທີ່ເຮັດໜ້າທີ່ກຳຈັດສານພິດອອກຈາກຮ່າງກາຍ ເຊັ່ນ ຕັບ ໄຕ ເຮັດວຽກບໍ່ມີຄຸນນະພາບ ສົ່ງຜົນໃຫ່ມີສານພິດຕົກຄ້າງໃນຮ່າງກາຍ

3.       ອອກກຳລັງກາຍເປັນປະຈໍາ

ອອກກຳລັງເປັນປະຈໍາຢ່າງໜ້ອຍ ມື້ລະ 30 ນາທີ ອາທິດລະ 3-4 ເທື່ອ ເພື່ອສົ່ງເສີມ ແລະ ຟື້ນຟູໃຫ້ລະບົບຕ່າງໆໃນຮ່າງກາຍເຮັດວຽກໄດ້ຢ່າງມີຄຸນນະພາບ ໂດຍສະເພາະລະບົບພູມຄຸມກັນພະຍາດ ຮ່າງກາຍທີ່ແຂງແຮງຍ່ອມຫ່າງໄກຈາກພະຍາດ

4.       ກິນອາຫານທີ່ມີປະໂຫຍດ ແລະ ອາຫານປຸງສຸກໃໝ່

ຄວນເລືອກຮັບປະທານອາຫານທີ່ມີປະໂຫຍດ ໂດຍສະເພາະຜັກ ໝາກໄມ້ ທີ່ມີວິຕາມິນ ແລະ ເກືອແຮ່ ທີ່ຈະຊ່ວຍເຮັດໃຫ້ເຊວຕ່າງໆໃນຮ່າງກາຍແຂງແຮງ ແລະ ຫຼຸດຜ່ອນການເກີດພະຍາດໄດ້ ນອກຈາກນີ້ ອາຫານທີ່ມີສະໝຸນໄພຕ່າງໆ ເຊັ່ນ ຂິງ ຂ່າ ຜັກທຽມ ພິກໄທ ຫົວສີໄຄ, ທັງນີ້ ອາຫານຕ້ອງຜ່ານການປຸງສຸກ ແລະ ໃໝ່ ເພື່ອປ້ອງກັນສານຕົກຄ້າງທີ່ຈະພາໃຫ້ເກີດພະຍາດໄດ້

5.       ດື່ມເຄື່ອງດື່ມທີ່ອຸ່ນໆເປັນປະຈໍາ

ໃນມື້ທີ່ຝົນຕົກ ອາກາດເຢັນ ຄວາມຊຸ່ມໃນອາກາດຫຼາຍ ຄວນເລືອກດື່ມຊາສະໝຸນໄພ ເປັນປະຈໍາ ເພື່ອໃຫ້ຄວາມອົບອຸ່ນແກ່ຮ່າງກາຍ ຕ້ານການອັກເສບປອດ ແກ້ຫວັດ ແກ້ເຈັບຄໍ

6.       ຖືຄັນຮົ່ມ ເສື້ອກັນຝົນ ແລະ ຮັກສາຮ່າງກາຍໃຫ່ແຫ້ງສະເໝີ

ເພື່ອເວລາທີ່ເຮົາອອກຈາກເຮືອນ ຫຼື ຫ້ອງການ ແລ້ວເກີດມີຝົນຕົກແບບກະທັນຫັນ

7.       ບໍ່ຄວນເຂົ້າໄປໃນເຂດທີ່ມີຄວາມຊຸ່ມ ແລະ ນໍ້າຖ້ວມຂັງ

ເພາະວ່າເປັນຈຸດກໍ່ຕົວ ຂອງພະຍາດນານາຊະນິດ ເຊິ່ງອາດຈະເຮັດໃຫ້ພະຍາດເຫຼົ່ານັ້ນເຂົ້າສູ່ຮ່າງກາຍໄດ້ ແລະ ເກີດພະຍາດຕ່າງໆຕາມມາ

8.       ປ້ອງກັນບໍ່ໃຫ້ຍຸງກັດ

ເພາະຊ່ວງລະດູຝົນ ຍຸງເປັນພາຫະນະທີ່ຈະນຳພະຍາດມາສູ່ເຮົາ ໂດຍສະເພາະກໍ່ແມ່ນພະຍາດໄຂ້ຍຸງລາຍ ທີ່ກຳລັງມີການລະບາດຢູ່ໃນບ້ານເຮົາ

ພຽງເບິ່ງແຍງສຸຂະພາບເປັນປະຈໍາ ແລະ ສະໝໍ່າສະເໝີ ບໍ່ວ່າຈະເປັນໃນລະດູຝົນ ຫຼື ລະດູອຶ່ນໆ  ຮັບຮອງວ່າ ທ່ານຈະມີສຸຂະພາບຮ່າງກາຍທີ່ແຂງແຮງ ບໍ່ມີພະຍາດມາກວນໃຈ

LEAVE A REPLY

Please enter your comment!
Please enter your name here