ວັດທາດຫຼວງໃຕ້ ຖືວ່າເປັນວັດທີ່ສຳຄັນແຫ່ງໜຶ່ງຂອງນະຄອນຫຼວງວຽງຈັນ ທີ່ຄຽງຄູ່ກັບວັດທາດຫຼວງເໜືອ ແລະ ພຣະທາດຫຼວງວຽງຈັນ ໂດຍພາຍໃນວັດທາດຫຼວງໃຕ້ ມີປະຕິມະກຳ ພຣະນອນອົງໃຫ່ຍ ທີ່ປະດິດສະຖານໄວ້ດ້ານຂ້າງຂອງວັດ ເຊິ່ງຖືໄດ້ວ່າເປັນຈຸດທີ່ນັກທ່ອງທ່ຽວມັກໄປກຣາບໄຫວ້ ແລະ ທ່ຽວຊົມ.

ແຕ່ເມື່ອບໍ່ດົນມານີ້ ທາງວັດໄດ້ມີການສ້າງອີກໜຶ່ງຈຸດສຳຄັນແຫ່ງໃໝ່ທີ່ຫຼາຍໆຄົນອາດຈະຍັງບໍ່ທັນເຫັນ ກໍ່ຄືປະຕິມະກຳຮູບປັ້ນຂອງ ສິນໄຊ ສີໂຫ ສັງທອງ ທີ່ໄດ້ມີການເລີ່ມສ້າງໃນຕົ້ນປີທີ່ຜ່ານມາ ແລະ ສ້າງສຳເລັດໃນວັນທີ 29 ເມສາ 2020 ເຊິ່ງເປັນໄລຍະທີ່ລັດຖະບານໄດ້ປະກາດໃຫ້ທຸກຄົນຢູ່ເຮືອນ ເພື່ອຮັບມືກັບການລະບາດຂອງພະຍາດຮ້າຍ ເຮັດໃຫ້ຫຼາຍໆຄົນອາດຍັງບໍ່ເຄີຍເຫັນຮູບປັ້ນດັ່ງກ່າວ

ສຳລັບວັນນະຄະດີ ເລື່ອງ “ສັງສິນໄຊ” ແມ່ນເປັນວັນນະຄະດີຊັ້ນຍອດຂອງລາວ ເປັນໜຶ່ງໃນມໍລະດົກແຫ່ງຊາດ ທາງດ້ານວັດທະນະທໍາ ທີ່ລັດຖະບານ ໄດ້ປະກາດອອກໃນກົດໝາຍວ່າດ້ວຍ ມໍລະດົກແຫ່ງຊາດ ປີ 2005 (ພາກທີ 3 ໝວດທີ 1 ມາດຕາ 18) ໂດຍຜູ້ແຕ່ງເດີມໄດ້ແຕ່ງເປັນຄໍາຮ້ອຍແກ້ວ ຫຼື ໜັງສືເທດແບບໜັງສືຊາດົກ ຕໍ່ມາ ທ້າວ ປາງຄໍາ ຈິ່ງໄດ້ແຕ່ງອອກເປັນຄໍາກອນໃຊ້ສຳລັບອ່ານ ຟັງ ໃນເວລາມີຄວາມໂສກເສົ້າ ເປັນຕົ້ນແມ່ນ ເວລາງັນເຮືອນດີ

ສິນໄຊ ສັງທອງ ສີໂຫ ກຳລັງສູ້ກັບງູຊວງ ຈາກປື້ມ ສັງສິນໄຊ ເຫຼັ້ມ 1 ຄຳກອນ ຄູ່ ຮ້ອຍແກ້ວ

ທ້າວ ປາງຄໍາແຕ່ງໜັງສືສັງສິນໄຊ ອອກເປັນຄໍາກອນນີ້ ໄດ້ແຕ່ງແຕ່ຕອນຕົ້ນ ເຊິ່ງໄດ້ກ່າວຕັ້ງແຕ່ ຍັກກຸມພັນມາລັກເອົານ້ອງສາວພະຍາກຸດສະລາດໄປ ຈົນທ້າວສິນໄຊ ໄດ້ໄປນໍາເອົາຜູ້ເປັນອາຄືນ ແລະ ສິນໄຊໄດ້ຂຶ້ນສະເຫວີຍລາດເທົ່ານັ້ນ ສ່ວນຕອນປາຍ ຫຼື ມັດປາຍ ອັນກ່າວເຖິງຕັ້ງແຕ່ຍັກກຸມພັນກັບເກີດຄືນມາ ແລ້ວໄດ້ລັກເອົານາງສຸມຸນທາຄືນໄປອີກ ຈົນເຖິງຕອນລູກທ້າວທັງ 6 ແລະ ລູກທ້າວສິນໄຊ ໄປຮົບກັນນັ້ນ ທ້າວປາງຄໍາແມ່ນ ບໍ່ໄດ້ແຕ່ງ ແຕ່ເປັນອາຈານອື່ນແຕ່ງ

ຕໍ່ມາ  ມະຫາສິລາ ວີຣະວົງ ນັກປາດລາວ ໄດ້ມີລິດຈະນາ ແລະ ແປເປັນຮ້ອຍແກ້ວ ໂດຍທ່ານມະຫາສິລາ ວີລະວົງ ໄດ້ເຫັນວ່າວັນນະຄະດີເລື່ອງນີ້ ມີຄຸນຄ່າຄົບຖ້ວນທາງດ້ານສັນທະສາດ ສັງຄົມ ມະນຸດສະທຳ ການປົກຄອງ ວັດທະນະທໍາ ທຳມະຊາດ ດັ່ງທີ່ທ່ານໄດ້ຂຽນໄວ້ໃນຄໍານໍາ ແຕ່ຊຸມຕົ້ນປີ 1930 ຈາກນັ້ນທ່ານກໍ່ພະຍາຍາມທຸກວິທີທາງ ຈັດພິມ ເຜີຍແຜ່ ແລະ ນໍາໃຊ້ເຂົ້າໃນການສຶກສາ ຕັ້ງແຕ່ປາຍຊຸມປີ 1940 ຈົນເຖິງບັ້ນປາຍຊີວິດ ເຊັ່ນ:  ປີ 1968 ທ່ານໄດ້ກໍ່ຕັ້ງສະມາຄົມ ສິລະປະວັນນະກໍາລາວ ໄຂໂຮງມະໂຫສົບ ປາງຄໍາ ເພື່ອສະແດງໝໍລໍາເລື່ອງສິນໄຊ ເປັນຄັ້ງປະຖົມມະເລິກ ແລະ ຕໍ່ມາປີ 1969 ທ່ານໄດ້ຈັດພີມຄໍາກອນ ສັງສິນໄຊ ເປັນສະບັບສົມບູນທີ່ສຸດ 

ເພື່ອເປັນການສືບສານວັນນະຄະດີ ເລື່ອງ ສັງສິນໄຊ ທີ່ເປັນມໍລະດົກຂອງຊາດ ທ່ານ ທະວີສຸກ ສີລາເພັດ ເຊີ່ງເປັນຜູ້ອອກແບບ ຫໍຫຼັກໂມງໃຫ່ຍ ທີ່ ວົງວຽນດອນໜູນ ແລະ ຍັງເປັນຜູ້ອອກແບບຖານຮູບປັ້ນເຈົ້າອານຸວົງ ໄດ້ມີຄວາມຄິດລິເລີ່ມສ້າງປະຕິມະກຳຮູບປັ້ນ ສິນໄຊ ສີໂຫ ແລະ ສັງທອງ ໄວ້ ເພື່ອໃຫ້ຄົນທີ່ເກີດໃໝ່ໃຫ່ຍລຸນ ໄດ້ເຫັນເຖິງຄວາມງົດງາມຂອງວັນນະຄະດີລາວ

ທ່ານ ທະວີສຸກ ສີລາເພັດ ໄດ້ໃຫ້ສຳພາດກັບອິນໄຊລາວວ່າ: ທຳອິດແມ່ນອອກແບບໃຫ່ຍກວ່ານີ້ ໂດຍມີແນວຄິດວ່າຢາກຈະສ້າງຢູ່ວົງວຽນໃຫ່ຍ ຢູ່ໂພນເຄັງ ແຕ່ກໍ່ບໍ່ໄດ້ຮັບອະນຸຍາດຈາກພາກສ່ວນທີ່ກ່ຽວຂ້ອງ ຈົນເວລາຜ່ານມາ 3 ປີ ຕົນເອງຈື່ງໄດ້ຄິດຢາກຈະສ້າງໄວ້ຢູ່ຈຸດອຶ່ນ ເພື່ອໃຫ້ລູກຫຼານລາວໄດ້ເບີ່ງ ໄດ້ຈາລືກວ່າວັນນະຄະດີເລື່ອງນີ້ ແມ່ນຂອງລາວແທ້ໆ ຫຼັງຈາກນັ້ນ ກໍ່ໄດ້ມາຂໍອະນຸຍາດນຳ ພຣະອາຈານ ອິນປັນ ພິລາວັນ ເຈົ້າອະທິການວັດທາດຫຼວງໃຕ້ ເພື່ອມາສ້າງໄວ້ຢູ່ວັດແຫ່ງນີ້ ແຕ່ກໍ່ໄດ້ເຮັດຂະໜາດນ້ອຍລົງ ເພື່ອໃຫ້ເໝາະສົມກັບສະຖານທີ່ ເຊິ່ງກ່ອນໜ້ານີ້ ໄດ້ອອກແບບໄວ້ຫຼາຍແບບ ເປັນຕົ້ນແມ່ນສີໂຫ ທີ່ທຳອິດໄດ້ອອກແບບໃຫ້ມີຫາງ ແຕ່ໄດ້ປ່ຽນໃຫ້ເປັນທ່ອນເທິງເປັນຊ້າງ ແຕ່ທ່ອນລຸ່ມເປັນມະນຸດ ເພາະວ່າເພີ່ນສາມາດແປງກາຍໄດ້

ທ່ານຍັງໄດ້ກ່າວຕື່ມວ່າ ປະຕິມະກຳຮູບປັ້ນນີ້ ແມ່ນໄດ້ໃຊ້ເວລາສ້າງຕັ້ງແຕ່ຕົ້ນເດືອນມັງກອນ 2020 ແລະ ໄດ້ສ້າງສຳເລັດໃນວັນທີ 29 ມີນາ 2020 ໂດຍໃຊ້ງົບປະມານ 123 ລ້ານກີບ ໂດຍມີເຈົ້າສັດທາຈາກຫຼາຍພາກສ່ວນ

ທັງນີ້, ປະຕິມະກຳຮູບປັ້ນນີ້ ແມ່ນຈະມີພິທີມອບຮັບ ໃຫ້ວັດທາດຫຼວງໃຕ້ເປັນຜູ້ ປົກປັກຮັກສາ ເບິ່ງແຍງສືບຕໍ່ໄປ

LEAVE A REPLY

Please enter your comment!
Please enter your name here