ວັນທີ 16 ມິຖຸນາ 2020 ທີ່ ວັດຈອມທອງ ບ້ານ ສວນມອນ ເມືອງ ສີສັດຕະນາກ ນະຄອນຫຼວງວຽງຈັນ ໄດ້ມີພິທີບັນຈຸວັດຖຸມຸງຄຸນໃສ່ໃນອົງພຣະພຸດທະຮູບ (ປ່ອນຫົວໃຈພຣະ) ເຂົ້າໃນອົງພຣະເຈົ້າສຸວັນນະໄຕພູມ ທີ່ອັງເຊີນມາຈາກແຂວງ ບໍ່ແກ້ວ ເພື່ອປະດິດສະຖານ ໃນສາລາໂຮງທໍາ ທີ່ກຳລັງກໍ່ສ້າງໃໝ່ຂອງ ວັດ ຈອມທອງ ວະນາຣາມ ບ້ານສວນມອນ ເມືອງສີສັດຕະນາກ ນວຈ

ໂດຍໃນພິທີ ທ່ານ ນາງ ນາລີ ສີສຸລິດ ພັນລະຍາຂອງທ່ານ ລັດຖະມົນຕີ ແຫ່ງ ສປປ ລາວ ຍັງໄດ້ກ່າວວ່າ: ຂ້າພະເຈົ້າມີຄວາມຮູ້ສຶກເປັນກຽດຢ່າງສູງ ທີ່ໄດ້ມາຮ່ວມງານໃນມື້ນີ້ ໂດຍສະເພາະກໍ່ແມ່ນ ການມາບັນຈຸວັດຖຸມຸງຄຸນ ກໍ່ຄືໝາກຫົວໃຈພຣະ ແລະ ກໍ່ຂໍໃຫ້ພຣະອົງນີ້ ເປັນມີ່ງຂວັນ ແລະຄໍ້າຊູພໍ່ແມ່ພີ່ນ້ອງໃນປະເທດຊາດຂອງພວກເຮົາ ຂໍໃຫ້ມີແຕ່ຄວາມສຸກຄວາມຈະເລີນ ມາສູ່ປະເທດຊາດບ້ານເມືອງ ບໍ່ໃຫ້ພົບຄວາມຫຍຸ້ງຍາກ ແລະ ຂໍໃຫ້ມີແຕ່ສິ່ງດີໆເຂົ້າມາຫາປະເທດຊາດຂອງພວກເຮົາ ພ້ອມກັນສ້າງສາບ້ານເມືອງໃຫ້ມີຄວາມຮັ່ງມີ  ເຂັ້ມແຂງ ຂໍຂອບໃຈ 

ທັງນີ້, ພຣະອາຈານ ບຸນທະວີ ປະສິດທິສັກ ເຈົ້າອະທິການວັດ ຈອມທອງ ວະນາຣາມ ໄດ້ເປີດເຜີຍຈຸດເລີ່ມຕົ້ນຂອງພຣະອົງນີ້ວ່າ: ເລີ່ມຈາກ ເຈົ້າອະທິການວັດ ຈອມທອງ ວະນາຣາມ ພຣະອາຈານ ບຸນທະວີ ປະສິດທິສັກ ໄດ້ມີການສ້າງສາລາໂຮມທໍາ ທີ່ ວັດຈອມທອງ ວະນາຣາມ ຈຶ່ງມີການຊອກຫາເຈົ້າມູນລະສັດທາ ໃນການສ້າງພຣະພຸດທະຮູບ ເພື່ອນຳມາເປັນພຣະປະທານ ໃນສາລາໂຮງທັມແຫ່ງນີ້ ໂດຍການຕິດປະກາດ ໄວ້ພາຍໃນວັດ ເຖິງອອກຕົນຍາດໂຍມທັງຫລາຍ ເປັນເວລາດົນນານເຕີບ ກໍ່ບໍ່ມີໃຜຕິດຕໍ່ມາເລີຍ

ພຣະອາຈານ ບຸນທະວີ ປະສິດທິສັກ ກໍ່ໄດ້ມີໂອກາດໄດ້ໄປຮ່ວມພິທີປະຊຸມ ອພສ ທີເຂດພາກເໜືອ ທີ່ຈັດຂຶ້ນທີແຂວງບໍ່ແກ້ວ ເພິ່ນໄດ້ໄປຢ້ຽມຊົມ ວັດສີບຸນເຮືອງ ເມືອງຕົ້ນເຜິງ ແຂວງບໍ່ແກ້ວ ໂດຍເຈົ້າອາວາດວັດສີບຸນເຮືອງ ພຣະອາຈານ ຈຸ໋ມ ຂັດຕິຍະບາຣະມີ ໄດ້ໃຫ້ການຕ້ອນຮັບແລະ ຈຳວັດທີວັດສີບຸນເຮືອງ ໃນຕອນແລງມື້ນັ້ນ ພຣະອາຈານບຸນທະວີ ປະສິດທິສັກ ໄດ້ເຂົ້າໄປສັກກະລະບູຊາ ພຣະເຈົ້າໃຫຍ່ ພາຍໃນວັດແຫ່ງນັ້ນ ແລະ ຕັ້ງໃຈອະທິຖານເຖິງເຈົ້າມູນລະສັດທາ ທີ່ຈະມາເປັນເຈົ້າພາບໃນການສ້າງພຣະ ຕື່ນເຊົ້າມາກໍ່ມີເຈົ້າພາບມາຫາເພິ່ນເພື່ອຂໍເປັນເຈົ້າພາບ ໃນການສ້າງພຣະເຈົ້າໃຫຍ່ເພື່ອປະດິດສະຖານ ໃນສາລາໂຮງທໍາຂອງວັດຈອມທອງ ວະນາຣາມ

ເມື່ອເປັນແນວນັ້ນ ທາງພຣະອາຈານບຸນທະວີ ປະສິດທິສັກ ກໍ່ເຫັນສົມຄວນທີຈະສ້າງພຣະເຈົ້າໃຫຍ່ ບ່ອນທີເປັນຈຸດກຳເນີດຂອງເຈົ້າສັດທາທີ່ວັດສີບຸນເຮືອງ ເມືອງຕົ້ນເຜິ້ງ ແຂວງບໍ່ແກ້ວ 

ພຣະເຈົ້າໃຫ່ຍອົງນີ້ມີຊື່ວ່າ ພຣະເຈົ້າສຸວັນນະໄຕພູມ ໂດຍມີຄວາມໝາຍດັ່ງນີ້: 

• ສຸວັນນະ = ດິນແດນທີ່ຄໍາ ທີ່ຮຸ່ງເຮືອງ ແລະ ເປັນດິນແດນສຸວັນນະໂຄມຄໍາ ແຫ່ງກຳເນີດ ທີ່ເຄີຍຮຸ່ງເຮືອງສີວິໄລໃນອະດິດ

• ໄຕພູມ = ສ້າງມາຈາກແຮງສັດທາ ຈາກ 3 ປະເທດ ຄື : ລາວ, ໄທ , ມຽນມາ ໃນການປະກອບສ່ວນຕ່າງໆດ້ວຍ 

ພຣະເຈົ້າສຸວັນນະໄຕພູມ ອົງນີ້ເປັນເນື້ອທອງເຫລືອງ ເລິ່ມສ້າງມາແຕ່ ວັນທີ 11 ທັນວາ 2019 , ເປັນປາງສະມາທິ , ມີນ້ຳຫນັກ 2,4 ໂຕນ , ຫນ້າຕັກ 2.6 ແມັດ , ສູງ 4.80 ແມັດ. ມີມູນຄ່າການກໍ່ສ້າງປະມານ 400 ລ້ານກີບ ( ລວມທຸກຢ່າງພ້ອມຄ່າຂົນສົ່ງ ) 

ພຣະອົງນີ້ ອອກແບບ ແລະ ກໍ່ສ້າງໂດຍ ພຣະອາຈານ ຈຸ໋ມ ຂັດຕິຍະບາຣະມີ ແຫ່ງວັດສີບຸນເຮືອງ ເມືອງຕົ້ນເຜີ້ງ ແຂວງບໍ່ແກ້ວ 

ໂດຍໃຊ້ເວລາໃນການເຄື່ອນຍ້າຍມາທີ່ ນະຄອນຫຼວງວຽງຈັນ ຕັ້ງແຕ່ວັນທີ 12 ມິຖຸນາ 2020 ແລະ ໄດ້ມາຮອດ ນະຄອນຫຼວງວຽງຈັນ ໃນວັນທີ  15 ມິຖຸນາ 2020 ລວມເວລາການເດີນທາງທັງໝົດ 4 ວັນ   

LEAVE A REPLY

Please enter your comment!
Please enter your name here