ຫຼັງຈາກທີ່ກ່ອນໜ້ານີ້ ຄະນະສະເພາະກິດໄດ້ຜ່ອນຜັນມາດຕະການຕ່າງໆລົງ ໂດຍໄດ້ໃຫ້ໜຶ່ງໃນນັ້ນແມ່ນ ໃຫ້ກະຊວງສຶກສາທິການ ແລະ ກິລາ ແລະ ຂະແໜງອຶ່ນໆ ທີ່ມີໂຮງຮຽນ ຫຼື ສະຖາສຶກສາຂຶ້ນກັບ ເປີດໂຮງຮຽນຄືນ ໃນລະດັບ ປໍ1-ປໍ4, ມໍ1-ມໍ3, ມໍ5-ມໍ6 ແລະ ປີສຸດທ້າຍຂອງມະຫາວິທະຍາໄລເລີ່ມແຕ່ວັນທີ 2 ມິຖຸນາ 2020 ເປັນຕົ້ນໄປ

ສ່ວນຊັ້ນອຶ່ນໆທີ່ເຫຼືອ ແມ່ນໃຫ້ເລີ່ມເປີດໃນ ວັນທີ 15 ມິຖຸນາ 2020 ໂດຍໃຫ້ມີການຮັກສາໄລຍະຫ່າງ 1 ແມັດ, ມີບ່ອນລ້າງມື ດ້ວຍເຈວ ແລະ ສະບູ, ໃສ່ຫນ້າກາກ, ວັດແທກອຸນຫະພູມ ແລະ ອະນາໄມສະຖານທີ່ຕາມຄຳແນະນຳຂອງຄະນະສະເພາະກິດ

ສຳລັບບັນຍາກາດໃນມື້ເປີດຮຽນມື້ທຳອິດຂອງນ້ອງໆ ປີ 1 ປີ ແລະ ປີ 3 ທີ່ມະຫາວິທະຍາໄລແຫ່ງຊາດ ແມ່ນກັບມາເປັນປົກກະຕິແລ້ວ ແຕ່ສິ່ງທີ່ແປກໆຕາຂຶ້ນ ແມ່ນມາດຕະການໃນການປ້ອງກັນພະຍາດໂຄວິດ-19 ເປັນຕົ້ນແມ່ນ: ມີບ່ອນລ້າງມື, ນັກສຶກສາໃສ່ຜ້າປິດປາກ ແລະ ເວລານັ່ງຮຽນແມ່ນຈະຮັກສາໄລຍະຫ່າງ

ນາງ ແສງຈັນ ອ່ອນພັນນວນ ນັກສຶກສາຈາກຄະນະອັກສອນສາດ ປີ 1 ໄດ້ໃຫ້ສຳພາດວ່າ: ຕົນເອງຮູ້ສຶກດີໃຈຫຼາຍ ທີ່ໄດ້ກັບຂຶ້ນມາຮຽນຄືນ ເພາະວ່າ ຕົນເອງໄດ້ຄິດວ່າຈະບໍ່ໄດ້ຂຶ້ນມາຮຽນໝົດປີແລ້ວ ຍ້ອນຢ້ານວ່າການລະບາດຂອງພະຍາດໂຄວິດ-19 ຈະແກ່ຍາວເປັນເວລາດົນ, ຕົນເອງກໍ່ໄດ້ລໍຖ້າໃຈຈົດໃຈຈໍ່ທີ່ຈະໄດ້ເຫັນປະກາດວ່າໃຫ້ເປີດຮຽນຄືນ, ທັງນີ້ ຕົນເອງກໍ່ຍັງຮູ້ສຶກກັງວົນຢູ່ ແຕ່ເຮົາກໍ່ຕ້ອງໄດ້ມີວິທີປ້ອງກັນໂຕເອງ ເປັນຕົ້ນແມ່ນ: ການຫຼີກລ່ຽງສະຖານຊຸມນຸມ, ໃສ່ຜ້າອັດປາກຖ້າໄດ້ອອກໄປບ່ອນຊຸມນຸມ, ມາມະຫາວິທະຍາໄລກໍ່ຕ້ອງໄດ້ຖືເຈວລ້າງມືມາໃຊ້ນໍາ

ນາງ ໄພພັນ ພັນທະວິໄຊ ນັກສຶກສາປີ 1 ກໍ່ໄດ້ໃຫ້ສຳພາດຕື່ມວ່າ: ຕົນເອງກໍ່ຮູ້ສຶກກັງວົນ ໃນຕອນທີ່ຮູ້ຂ່າວການລະບາດຂອງພະບາດໂຄວິດ-19 ແລະ ຕົນເອງກໍ່ໄດ້ເດີນທາງກັບບ້ານເກີດ ເພື່ອລໍຖ້າຟັງຂ່າວວ່າຈະໄດ້ກັບມາຮຽນຄືນ, ແລະ ຫຼັງຈາກທີ່ສະຖານະການໃນບ້ານເຮົາດີຂຶ້ນ ລັດຖະບານກໍ່ອະນຸຍາດໃຫ້ເປີດການຮຽນການສອນໄດ້ຄືເກົ່າ ຕົນເອງກໍ່ຮູ້ສຶກດີໃຈຫຼາຍ ເພາະຍ້ານການລະບາດແກ່ຍາວ ແລະ ຕົນເອງອາດຈະໄດ້ໂຈະການຮຽນໝົດປີ ແຕ່ເມື່ອເປັນແນວນີ້ ກໍ່ດີໃຈ ແຕ່ກໍ່ຕ້ອງໄດ້ມາການຮັກສາມາດຕະການ ການປ້ອງກັນຕົນເອງ ຕາມຄຳແນະນຳຂອງຄູອາຈານ ແລະ ຄະນະສະເພາະກິດ

ແນວໃດກໍ່ຕາມ,​ ເຖິງວ່າສະຖານະການການລະບາດຂອງພະຍາດໂຄວິດ-19 ຢູ່ ສປປ ລາວ ເຮົາຈະບໍ່ຜ່ອນຄາຍລົງ ແລະ ຜູ້ຕິດເຊື້ອສະສົມກໍ່ຍັງຢູ່ທີ 19 ຄົນ ເຊິ່ງທັງ 19 ຄົນກໍ່ປິ່ນປົວຫາຍດີແລ້ວ ແຕ່ຄະນະສະເພາະກິດກໍ່ຍັງສະແດງຄວາມເປັນຫ່ວງຕໍ່ສຸຂະພາບຂອງປະຊາຊົນ ແລະ ໄດ້ຮຽກຮ້ອງໃຫ້ປະຊາຊົນທຸກພາກສ່ວນ ຈົ່ງຮ່ວມກັນປະຕິບັດຕາມຄໍາແນະນໍາຕ່າງໆຄືເກົ່າ ເປັນຕົ້ນແມ່ນ: ການຮັກສາໄລຍະຫ່າງ ການໃສ່ຜ້າປິດປາກ ແລະ ລ້າງມືເປັນປະຈໍາ

LEAVE A REPLY

Please enter your comment!
Please enter your name here