ຈາກສະຖິຕິຂອງຜູ້ຕິດເຊື້ອພະຍາດໄຂ້ຍຸງລາຍ ໃນເຂດອາຊຽນຕະເວັນອອກສ່ຽງໃຕ້ ມີຈໍານວນຫຼາຍສຸດ ບໍ່ຕໍ່າກວ່າ 200,000 ກໍລະນີ, ດ້ວຍເຫດນັ້ນ ກຸ່ມສະມາຊິກອາຊຽນ ຈື່ງໄດ້ມີມະຕິຂໍ້ຕົກລົງຮ່ວມກັນ ກຳນົດເອົາວັນທີ 15 ມິຖຸນາ ຂອງທຸກໆປີ ເປັນວັນຕ້ານໄຂ້ຍຸງລາຍອາຊຽນ ເພື່ອປຸກລະດົມໃຫ້ປະຊາຊົນໃນປະເທດຄໍານຶງເຖິງການປ້ອງກັນພະຍາດດັ່ງກ່າວ ພ້ອມທັງຮ່ວມກັນແກ້ໄຂ້ບັນຫາ

ສຳລັບພະຍາດໄຂ້ຍຸງລາຍ ໃນ ສປປ ລາວ ຖືວ່າເປັນບັນຫາໜຶ່ງທີ່ສຳຄັນ ທີ່ກະຊວງສາທາລະນະສຸກໄດ້ເນັ້ນໜັກໃຫ້ທຸກຄົນເອົາໃຈໃສ່ນໍາກັນ, ໂດຍຂໍ້ມູນລ່າສຸດ ຈາກສູນຂ່າວສານການແພດສຸຂະສຶກສາ ໄດ້ລາຍງານວ່າ: ມາຮອດປະຈຸບັນ ສປປ ລາວ ມີຜູ້ຕິດພະຍາດໄຂ້ຍຸງລາຍ ສະສົມແລ້ວເຖິງ 1,767 ຄົນ ເຊິ່ງໃນນີ້ ນະຄອນຫຼວງວຽງຈັນ ແມ່ນມີຜູ້ຕິດເຊື້ອຫຼາຍກວ່າແຂວງອຶ່ນ ຮອງລົງມາແມ່ນ ແຂວງວຽງຈັນ ແລະ ແຂວງອັດຕະປື, ສ່ວນໂຕເລກຜູ້ເສຍຊີວິດ ແມ່ນ 5 ຄົນ ປະກອບມີ ນະຄອນຫຼວງວຽງຈັນ 2 ຄົນ ແຂວງບໍລິຄໍາໄຊ 1 ຄົນ ແຂວງຄໍາມ່ວນ 1 ຄົນ ແລະ ແຂວງໄຊຍະບູລີໜຶ່ງຄົນ

ແນວໃດກໍ່ຕາມ,​ ເຖິງວ່າທົ່ວໂລກ ລວມທັງ ສປປ ລາວ ກຳລັງພົບກັບວິກິດການ ການລະບາດຂອງພະຍາດໂຄວິດ-19 ຢູ່ ແລະ  ສປປ ລາວ ຂອງພວກເຮົາ ກໍ່ໄດ້ປິ່ນປົວຜູ້ຕິດເຊື້ອພະຍາດໂຄວິດ-19 ທັງ 19 ຄົນ ຫາຍດີແລ້ວກໍ່ຕາມ, ແຕ່ທາງຄະນະສະເພາະກິດກໍ່ຍັງສະແດງຄວາມເປັນຫ່ວງຕໍ່ກັບປະຊາຊົນ ແລະ ຮຽກຮ້ອງໃຫ້ພໍ່ແມ່ປະຊາຊົນ ທຸກຄົນຮ່ວມກັນປ້ອງກັນທັງ 2 ພະຍາດນີ້ົໄປພ້ອມໆກັນ

LEAVE A REPLY

Please enter your comment!
Please enter your name here