ສຳລັບແຟນໆຂອງ Una Studio  ຄົງຈະຮູ້ກັນດີແລ້ວວ່າ ເມື່ອບໍ່ດົນມານີ້ ເຈົ້າພໍ່ຜູ້ໄທ ເທີຢູ່ນາ ໄດ້ປ່ອຍຮູບເງົາສັ້ນເລື່ອງ “ເດືອນສາມ” ທີ່ໄດ້ເຜີຍແຜ່ໃຫ້ໄດ້ຮັບຊົມໄປແລ້ວ ແລະ ເທີຢູ່ນາເອງ ກໍ່ຍັງໄດ້ກຽມຈະເຮັດພາກສອງ, ໂດຍໜຶ່ງໃນເພງປະກອບຮູບເງົາສັ້ນແມ່ນ “ຫາກສາຍແນນນ່ຽວໂນ້ມ” ຈາກປາຍປາກກາຂອງ ດອກເພັດ ແດນຈຳພອນ

ແລະທີ່ໜ້າສົນໃຈ ເພງນີ້ໄດ້ຂັບຮ້ອງໂດຍ ເມ ຢູ່ນາ ແລະ ສິນລະປິນອາວຸໂສ ມະໄລທອງ ຖິ່ນສະຫວັນ ເຊິ່ງເປັນແມ່ຂອງເມເອງ ແລະນອກຈາກນີ້, ມະໄລທອງ ຖິ່ນສະຫວັນ ແມ່ຂອງສາວເມ ຍັງໄດ້ຂັບລຳຜູ້ໄທ “ສາວຜູ້ໄທຮ່ອນຄຳ” ປະກອບຮູບເງົາສັ້ນເດືອນສາມອີກດ້ວຍ

ແມ່ລູກສາຍເລືອດສິນລະປິນ ປຽບໄດ້ກັບສຸພາສິດທີ່ວ່າ “ໝາກໄມ້ຫຼົ່ນບໍ່ໄກກົກ “

ເມ ຢູ່ນາ ຫຼື ເມທິນີ ໂມລາ ອາຍຸ 18 ປີ ເກີດທີ່ບ້ານ ດົງຄໍາດວນ ນະຄອນໄກສອນພົມວິຫານ ແຂວງ ສະຫວັນນະເຂດ ຮຽນຈົບ ມ 7 ຈາກໂຮງຮຽນ ມສ ໂພນສະຫວັນ ແລະ ເຕີບໃຫ່ຍມາທ່າມກາງສຽງຂັບລຳ ສຽງຮ້ອງເພງ ໂດຍຄອບຄົວເມ ມີວົງອີເລັກໂທນ ເມຈຶ່ງໄດ້ຮ້ອງເພງກັບວົງດົນຕີຂອງພໍ່ແມ່

ປີ 2016 ສາວເມ ໄດ້ຮ້ອງເພງກັບ ວຽງອະນຸໄຊ ຄິດອ່ອນ ນັກຮ້ອງເພງລູກທົ່ງບ້ານນາ ໄດ້ຮັບຄວາມນິຍົມພໍສົມຄວນ ເທີ ຢູ່ນາ ຈຶ່ງໄດ້ຊວນໃຫ້ມາເປັນນັກຮ້ອງໃນສັງກັດ Una Studio

ເມ ຢູ່ນາ ໄດ້ກາຍເປັນນັກຮ້ອງຄູ່ຂວັນກັບ ພອນ ຢູ່ນາ ຫຼື ສີລິພອນ ສີປະເສີດ ໂດຍເທີໄດ້ປ້ອນທັງເພງໃໝ່ ແລະ ເກົ່າໃຫ້ເມໄດ້ຂັບຮ້ອງ

ແນວໃດກໍ່ຕາມ, ທຸກຄົນສາມາດຕິດຕາມຜົນງານຂອງ ເມ ຢູ່ນາ ຜ່ານຊ່ອງຢູທູບ Una Studio

ຂອບໃຈຮູບພາບ: May Una, Una Studio

LEAVE A REPLY

Please enter your comment!
Please enter your name here