ລາຍການເຍົາວະຊົນຊາວໜຸ່ມ ແມ່ນລາຍການນ້ອງໃໝ່ຈາກສະຖານີໂທລະພາບນະຄອນຫຼວງວຽງຈັນ ທີ່ຫາກໍ່ອອກອາກາດໄປໄດ້ 2 EP ໂດຍມີຫົວຂໍ້ຫຼັກໆແມ່ນ ລາຍການຂ່າວໃນແວດວົງຂອງການສຶກສາ-ກິລາ ອະນຸຊົນ ເຍົາວະຊົນ ຊາວໜຸ່ມ ວັດທະນະທໍາ ເສດຖະກິດ-ສັງຄົມ ແລະ ຂ່າວເດັ່ນປະຈໍາອາທິດ

ລາຍການດັ່ງກ່າວແມ່ນມີຄວາມຍາວ 30 ນາທີ ປະກອບມີ 2 ໄລຍະຄື: ໄລຍະທຳອິດແມ່ນຈະເນັ້ນໃສ່ຂ່າວດ້ານການສຶກສາ ແລະ ໄລຍະທີສອງແມ່ນເນັ້ນຂ່າວເດັ່ນປະຈໍາອາທິດ

ໂດຍໄດ້ສອງພິທີກອນເຍົາວະຊົນຮຸ່ນໃໝ່ ທ້າວ ປານອໍາຄາ ທຳມະວົງສາ ຫຼື ນ້ອງພິດ ຈາກໂຮງຮຽນມັດຖະຍົມສົມບູນ ລາວ-ຫວຽດ ແລະ ນາງ ປາວິນາ ສໍລະຈໍາປາ ຫຼື ນ້ອງແອມມີ້ ຈາກໂຮງຮຽນມັດຖະຍົມສົມບູນປາດຖະໜາ ມາເປັນຜູ້ດຳເນີນລາຍການ

ທ້າວ ປານອໍາຄາ ທຳມະວົງສາ ໄດ້ໃຫ້ສຳພາດວ່າ: ຈຸດເລີ່ມຕົ້ນກ່ອນທີ່ຈະໄດ້ມາເປັນຜູ້ປະກາດຂ່າວຢູ່ສະຖານີໂທລະພາບນະຄອນຫຼວງນີ້ ພວກນ້ອງທັງສອງຄົນແມ່ນໄດ້ມາແຂ່ງຂັນໂຕ້ວາທີກັບທາງໂທລະພາບ ແລະ ໂທລະພາບກໍ່ໄດ້ເບິ່ງທັກສະໃນການໂຕ້ວາທີ ແລະ ຫຼັງຈາກນັ້ນທາງໂທລະພາບກໍ່ໄດ້ຕິດຕໍ່ຫາໃຫ້ມາເປັນຜູ້ປະກາດຂ່າວກັບທາງໂທລະພາບນະຄອນຫຼວງວຽງຈັນ, ທັງນີ້ ການເປັນຜູ້ປະກາດຂ່າວຍັງເປັນການຝຶກທັກສະການເວົ້າ ກ້າສະແດງອອກ ໄດ້ຄວາມຮູ້ຄວາມສາມາດ, ສໍາລັບໂຕຂ້າພະເຈົ້າເອງ ແມ່ນມັກເລື່ອງໄອທີ ແລະ ຄິດວ່າຖ້າຮຽນຈົບສາຍສາມັນ ກໍ່ອາດຈະເລືອກຮຽນສາຍໄອທີ ແຕ່ກໍ່ຍັງຈະຄົ້ນຫາຕົນເອງໃນສາຍຂອງການເປັນຜູ້ປະກາດຂ່າວໄປນໍາ

ປານອໍາຄາ ທຳມະວົງສາ ໄດ້ກ່າວຕື່ມວ່າ: ຝາກເຖິງໝູ່ໆທີ່ມັກຮັກ ແລະ ຢາກເປັນພິທິກອນ ສິ່ງທຳອິດເລີຍຕ້ອງຝຶກຕົນເອງໃຫ້ກ້າສະແດງອອກຕໍ່ສື່ມວນຊົນ ຝຶກຕົນເອງໃຫ້ເປັນຄົນທີ່ວິເຄາະດ້ວຍເຫດແລະຜົນ

ນາງ ປາວິນາ ສໍລະຈໍາປາ ໄດ້ໃຫ້ສຳພາດຕື່ມວ່າ:  ຕົນເອງຮູ້ສຶກດີໃຈຫຼາຍທີ່ທາງໂທລະພາບໄດ້ໃຫ້ໂອກາດນ້ອງທັງສອງໄດ້ມາເປັນຜູ້ປະກາດຂ່າວ ແລະ ຕົນເອງກໍ່ຄິດວ່າເປັນໂອກາດທີ່ດີເລີຍຕັດສິນໃຈມາເຮັດເບິ່ງ ໂດຍທັງນີ້ ກໍ່ເພື່ອເປັນການຄົ້ນຫາຫຼືຝຶກຝົນຕົນເອງ ໃຫ້ເປັນຄົນທີ່ກ້າເວົ້າ ກ້າສະແດງອອກໃຫ້ຫຼາຍຂຶ້ນ

ປາວິນາ ສໍລະຈໍາປາ ໄດ້ກ່າວຕື່ມວ່າ: ສໍາລັບນ້ອງຍັງບໍ່ໝັ້ນໃຈວ່າມັກສາຍນີ້ແທ້ຫຼືບໍ່ ແຕ່ຫຼັງຈາກໄດ້ເປັນຜູ້ປະກາດຂ່າວແລ້ວ ກໍ່ຮູ້ສຶກວ່າຕົນເອງເຮັດໄດ້ດີກວ່າທີ່ຄິດ ແລະຢາກຝາກເຖິງໝູ່ໆທີ່ມັກການເປັນຜູ້ປະກາດຂ່າວ ຕ້ອງເປັນຄົນທີ່ກ້າເວົ້າກ້າວ່າ ກ້າລອງ ແລະ ສະແດງອອກໃຫ້ຄົນອຶ່ນເຫັນວ່າເຮົາມີຄວາມສາມາດດ້ານນີ້ ໂດຍເລີ່ມຕົ້ນຈາກການເປັນພິທີກອນພາຍໃນໂຮງຮຽນກ່ອນກໍ່ໄດ້

ແນວໃດກໍ່ຕາມ, ລາຍການເຍົາວະຊົນຊາວໜຸ່ມ ແມ່ນບໍ່ໄດ້ເຈາະກຸ່ມເຍົາວະຊົນ ແລະ ຊາວໜຸ່ມເທົ່ານັ້ນ ແຕ່ຍັງສາມາດຮັບຊົມໄດ້ທຸກເພດທຸກໄວ້, ສຳລັບລາຍການແມ່ນອອກອາກາດທຸກໆວັນຈັນ ເວລາ 7:30-8:00 ໂມງ ທາງໂທລະພາບ ນະຄອນຫຼວງວຽງຈັນ

LEAVE A REPLY

Please enter your comment!
Please enter your name here