ວັນທີ 10 ມິຖຸນາ 2020, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໃນນາມລັດຖະບານ ແລະ ຕ່າງໜ້າຄະນະສະເພາະກິດ ໄດ້ຖະແຫຼງ ແລະ ຕີລາຄາຜົນສຳເລັດກ່ຽວກັບການກັດກັ້ນ ແລະ ຕ້ານການແຜ່ລະບາດ ຂອງພະຍາດ COVID-19 ຢູ່ ສປປ ລາວ ດັ່ງນີ້: 

  1. ລັດຖະບານລາວ ໄດ້ມີມາດຕະການປ້ອງກັນແຕ່ຫົວທີ, ເຫັນຄວາມອັນຕະລາຍໄວ້ລ່ວງໜ້າ ແລະ ເລີ່ມສະກັດກັ້ນໄວ້ກ່ອນ ຄືພວກເຮົາເຄີຍໃຊ້ຄຳເວົ້າວ່າ : ປ້ອງກັນດີກວ່າແກ້ ຫຼື ຕັດໄຟແຕ່ຕົ້ນລົມ
  2. ການນຳຂັ້ນສູງສຸດ ໃຫ້ຄວາມສຳຄັນ ແລະ ມີການຊີ້ນຳເປັນປົກກະຕິ ແລະ ເປັນເອກະພາບສູງ ໃນການປະຕິບັດບັນດາມາດຕະການແລະ ໄດ້ຊີ້ນຳຢ່າງຈົດຈໍ່
  3. ທຸກການຈັດຕັ້ງ, ທຸກອົງການຂອງພັກ, ລັດ, ອົງການຈັດຕັ້ງແນວໂຮມ, ອົງການຈັດຕັ້ງມະຫາຊົນ, ການຈັດຕັ້ງສັງຄົມ ໄດ້ເປັນກຳລັງແຮງໃນການຈັດຕັ້ງປະຕິບັດ ບັນດາມາດຕະການທີ່ລັດຖະບານ ວາງອອກ ຢ່າງເປັນເອກະພາບ ແລະ ມີຄວາມຮັບຜິດຊອບ
  4. ປະຊາຊົນທຸກຖ້ວນໜ້າ ເຂົ້າຮ່ວມຢ່າງມີສະຕິ ດ້ວຍຄວາມເປັນເຈົ້າ, ດ້ວຍຄວາມຕື່ນຕົວສູງ, ລວມທັງປະກອບສ່ວນທາງດ້ານວັດຖຸປັດໄຈ, ກຳລັງແຮງ ທັງກາຍ ແລະ ໃຈ ດ້ວຍຄວາມເປັນຈິດໜຶ່ງໃຈດຽວ ແລະ ເສຍສະຫຼະ
  5. ບັນດາໜ່ວຍງານທີ່ມີໜ້າທີ່ຮັບຜິດຊອບ ເຊັ່ນ: ຄະນະສະເພາະກິດທຸກຂັ້ນ, ທຸກລະດັບ, ພາຫະນະສື່ມວນຊົນ, ກຳລັງປ້ອງກັນຊາດ-ປ້ອງກັນຄວາມສະຫງົບ, ພະນັກງານສາທາລະນະສຸກທຸກຂັ້ນ ໄດ້ປະຕິບັດໜ້າທີ່ຢ່າງຕັ້ງໜ້າ ແລະ ມີຄວາມຮັບຜິດຊອບສູງ ແລະປະດິດສ້າງ
  6. ພວກເຮົາໄດ້ຮັບການສະໜັບສະໜູນຢ່າງທັນການຈາກປະເທດເພື່ອນມິດ ແລະ ອົງການຈັດຕັ້ງສາກົນ

ໃນມື້ດຽວກັນ, ຄະນະສະເພາະກິດໄດ້ລາຍງານປະຈຳວັນກ່ຽວກັບການສະກັດກັ້ນ ແລະ ຕ້ານການແຜ່ລະບາດ ຂອງພະຍາດ COVID-19 ໂດຍໃຫ້ຮູ້ວ່າ: ວັນທີ 9 ມິຖຸນາ ໄດ້ເກັບຕົວຢ່າງມາກວດວິເຄາະທັງໝົດ 294 ຄົນ ໃນນັ້ນມີແຮງງານລາວກັບມາແຕ່ໄທ 284 ຄົນ, ກໍລະນີສົງໄສ 10 ຄົນ ຜົນກວດຂອງທັງ 284 ຄົນ ແມ່ນບໍ່ພົບເຊື້ອ 

ສັງລວມມາແຕ່ ເດືອນມັງກອນ ຮອດ ວັນທີ 9 ມິຖຸນາ 2020 ໄດ້ເກັບຕົວຢ່າງມາກວດທັງໝົດ 9220 ກໍລະນີ ກວດພົບເຊື້ອສະສົມພຽງ 19 ກໍລະນີ ແລະ ຖືວ່າເປັນເວລາ  59 ມື້ແລ້ວ ທີ່ບໍ່ມີຜູ້ຕິດເຊື້ອເພີ່ມ

ແນວໃດກໍ່ຕາມ, ທາງລັດຖະບານ ຍັງຮຽກຮ້ອງໃຫ້ ປະຊາຊົນລາວໃນທົ່ວປະເທດ ສືບຕໍ່ຕິດຕາມສະພາບການຢ່າງໃກ້ຊິດ, ມີສະຕິລະວັງຕົວຢ່າງສູງ, ປະຕິບັດຖືກຕ້ອງຕາມຂໍ້ກຳນົດ, ຂໍ້ແນະນຳ ທີ່ທາງການວາງອອກ, ທັງໃຫ້ເອົາໂອກາດນີ້ ໃຫ້ແຕ່ລະຄົນ, ແຕ່ລະຄອບຄົວ, ແຕ່ລະການຈັດຕັ້ງ ແຕ່ເທິງລົງລຸ່ມຕ້ອງໄດ້ປັບວິຖີຊີວິດ ຫຼື ເວົ້າຢ່າງໜຶ່ງວ່າ ການດໍາລົງຊີວິດແບບໃໝ່ (New Normal) ນັ້ນ ທີ່ມີສະຕິລະວັງຕົວກວ່າ, ກ້າວໜ້າ ທັນສະໄໝ, ສີວິໄລ ກວ່າ, ປະຢັດມັດທະຍັດ ແລະ ມີລະບຽບວິໄນ, ທັງໝົດນີ້ກໍ່ເພື່ອບໍ່ໃຫ້ພະຍາດ COVID-19 ກັບຮອບ 2 

LEAVE A REPLY

Please enter your comment!
Please enter your name here