ຕາມຂໍ້ມູນຈາກປຶ້ມ ປະຫວັດພຣະທາດເຈດີ ວັດສໍາຄັນ ແລະ ພຣະຄູຍອດແກ້ວວິໂພນສະເມັກ ຄົ້ນຄວ້າໂດຍ ບຸນເຮັງ ບົວສີແສງປະເສີດ ໄດ້ລະບຸໄວ້ວ່າ:​ ວັດເພຍວັດ ຫຼື ພະຍາວັດ ເປັນວັດເກົ່າແກ່ໃນນະຄອນຫຼວງວຽງຈັນ ເປັນວັດທີ່ມີສິລະປະ ແລະ ສະຖາປັດຕະຍາກຳລາວອັນລໍ້າຄ່າ ສະແດງໃຫ້ເຫັນເຖິງສີມືຊ່າງລາວໃນສະໄໝກ່ອນ ເຊິ່ງເຮົາຈະເຫັນໄດ້ຈາກຮູບລັກສະນະຂອງສິມ ລາຍແລະດອກດວງ ແລະ ພຣະພຸດທະຮູບຫຼາຍອົງ ຍັງເປັນຫຼັກຖານໃຫ້ຄົນຮຸ່ນຫຼັງເຫັນວ່າ ຄົນລາວໃນສະໄໝກ່ອນມີຄວາມສີວິໄລຫຼາຍ ໃນການສ້າງສາ ສິລະປະ ແລະ ສະຖາປັດຕະຍາກຳ ເຖິງແມ່ນວ່າ ວັດນີ້ ຈະຖືກທໍາລາຍຈາກສົງຄາມມາຫຼາຍຄັ້ງກໍ່ຕາມ

ສິ່ງທີ່ປະກົດໃຫ້ເຮົາເຫັນຢູ່ໃນປະຈຸບັນ ໃນວັດເພຍວັດນັ້ນກໍ່ຄື ສິມໃຫ່ຍ ເຖິງວ່າຈະໄດ້ຮັບການປະຕິສັງຂອນຂຶ້ນກໍ່ຕາມ ແລະ ຍັງຮັກສາຊົງເດີມໄວ້ຢູ່ ແລະ ພຣະພຸດທະຮູບຫຼາຍຫຼາຍອົງໄດ້ນໍາໄປຮັກສາໄວ້ທີ່ຫໍພຣະແກ້ວ ແລະ ມີຍັງຮັກສາໄວ້ຢູ່ວັດເພຍວັດເອງກໍ່ມີ,​ ໃນສະໄໝກ່ອນ ວັດເພຍວັດ ອາດຈະກວ້າງໃຫ່ຍກ່ວາປະຈຸບັນນີ້ ເພາະແຕ່ກ່ອນເພີ່ນໃສ່ຊື່ວ່າ ວັດພະຍາ

ຫຼັກຖານທີ່ສະແດງໃຫ້ເຫັນວ່າ ວັດເພຍວັດເປັນວັດທີ່ເກົ່າແກ່ ຍ້ອນຫິນສິລາເລກ ຂຽນໄວ້ວ່າ ໄດ້ສ້າງຂຶ້ນໃນປີ  ຈຸລະສັກຣາດ 913 ( ຄ ສ 1551)  ປະຈຸບັນ ຫິນສິລາເລກນີ້ ໄດ້ເກັບຮັກສາໄວ້ທີ່ວັດຫໍພຣະແກ້ວ ມີພຣະພຸດທະຮູບຫຼາຍອົງທີ່ເພີ່ນຂຽນຈຸລະສັກຣາດໄວ້ ສະແດງໃຫ້ເຫັນວ່າ ສ້າງຂຶ້ນໃນສັດຕະວັດທີ່ 16 ຄືກ່ອນສະໄໝພຣະໄຊຍະເຊດຖາທິຣາດທີໜຶ່ງ ລົງມາຕັ້ງເມືອງວຽງຈັນເປັນຣາຊະທານີ ປະມານ 9 ປີ ໂດຍພຣະຍາຈັນທະບຸຣີສີສັດທຳມະໄຕໂລກ  ຜູ້ປົກຄອງເມືອງວຽງຈັນ

ກ່າວຕາມໜັງສືຂອງ ທ່ານເຮນຣີ ປາກມັງເຈ ນັກປຣາດຄົນຝຣັ່ງເສດ ໄດ້ເຂົ້າມາຄົ້ນຄວ້າສີລະປະລາວໃນປີ 1911 ເພີ່ນໄດ້ພົບວ່າ ວັດເພຍວັດ ເປັນວັດທີ່ເກົ່າແກ່ ແລະ ຊຸດໂຊມຫຼາຍ ເປັນວັດທີ່ກ້ວາງໃຫ່ຍຕາມແບບສິລະປະຂອງລາວໂດຍແທ້  ເພີ່ນໄດ້ພົບເຫັນພຣະພຸດທະຮູບໃຫ່ຍຫຼາຍອົງຢູ່ໃນສິມ ແລະ ຢູ່ຕາມຕົ້ນເສົາສິມນັ້ນມີຮູບສັດຕ່າງໆໆ ໃນຕົວສິມນັ້ນມີຮູບຫົວນົກ ແລະ ຫາງມ້າ ປະກົດໃນປີ 1911 ໄດ້ປະຕິສັງຂອນໃໝ່

ປະຈຸບັນ, ສິມ ແລະ ສາລາ ຂອງວັດເພຍວັດ ແມ່ນຈະເປີດໃຫ້ເຂົ້າສັກກາລະບູຊາໄດ້ແຕ່ວັນສຳຄັນທາງສາສະໜາເທົ່າ ແລະ ພຣະພຸດທະຮູບບາງສ່ວນແມ່ນໄດ້ນຳໄປເກັບຮັກສາ ແລະ ສະແດງໄວ້ທີ່ຫໍພຣະແກ້ວ

LEAVE A REPLY

Please enter your comment!
Please enter your name here