ຊ່ວງນີ້ຝົນເລີ່ມມາແລ້ວ ແລະສິ່ງທີ່ມາພ້ອມກັບລະດູຝົນ ແມ່ນພະຍາດໄຂ້ຍຸງລາຍ ທີ່ກຳລັງລະບາດຢູ່ໃນທົ່ວປະເທດຕອນນີ້ ໂດຍຂໍ້ມູນຈາກ ສູນຂ່າວສານການແພດສຸຂະສຶກສາ ໄດ້ລາຍງານຕົວເລກສະສົມຂອງຜູ້ຕິດເຊື້ອຢູ່ທີ່ 1641 ຄົນ ໃນນີ້ເສຍຊີວິດ 4 ຄົນ (ຂໍ້ມູນ 7 ມິຖຸນາ 2020)

ສະນັ້ນ ເພື່ອເປັນຫຼີກລ່ຽງພະຍາດດັ່ງກ່າວ ມື້ນີ້ອິນໄຊລາວ ຈື່ງນໍາເອົາພຶດ 4 ຊະນິດ ທີ່ສາມາດໄລ່ຍຸງໄດ້ ມາແນະນໍາໃຫ້ທຸກຄົນຫາມາປູກໄວ້ຕາມເດີນບ້ານ

ຫົວສີໄຄຫອມ ຖືວ່າເປັນສິ່ງຊ່ວຍໄລ່ຍຸງໄດ້ດີ ເພາະວ່າກິ່ນແຮງ ຄວນປູກໃສ່ເຕົ້າດອກໄມ້ ແລ້ວວາງໄວ້ຢູ່ລະບຽງ ຫຼື ສວນຕາມເດີນບ້ານກໍ່ໄດ້

ຕົ້ນບົວລະພາ ເປັນຕົ້ນໄມ້ທີ່ເປັນພຸ່ມສູງ ນອກຈາກຈະໄວ້ໃຊ້ເປັນວັດຖຸດິບປຸງອາຫານແລ້ວ ກິ່ນຫອມຂອງໃບບົວລະພາ ຍັງສາມາດໄລ່ຍຸງ ແລະ ແມງໄມ້ໄດ້ອີກດ້ວຍ

ຕົ້ນຜັກນາງຕູ່ ຈັດວ່າເປັນພຶດສະໝຸນໄພໃຫ້ກິ່ນແຮງ ຢູ່ໃນຕະກູນດຽວກັບໃບກະເພົາ ແລະ ບົວລະພາ ຖືວ່າເປັນສະໝຸນໄພທີ່ສາມາດໄລ່ຍຸງໄດ້ດີ ແຕ່ຕ້ອງໝັ່ນຍ່ອງໃບ ເພື່ອໃຫ້ກິ່ນຫອມອອກມາໄດ້ດີ

ຫອມລາບ ຫຼື ສາຣະແນ ຖືວ່າເປັນພຶດທີ່ປູກງ່າຍ ພຽງແຕ່ປູກໃສ່ເຕົ້າກໍ່ໄດ້ແລ້ວ ເປັນສະໝຸນໄພ ທີ່ມີຫຼາກຫຼາຍສັບພະຄຸນ ທັງເປັນຢາລະບາຍ ແກ້ພິດໃນຮ່າງກາຍ ແລະ ຍັງສາມາດໄລ່ຍຸງໄດ້ ເພາະມີກິ່ນແຮງ ພຽງແຕ່ນໍາໃບຂອງມັນ ມາຍ່ອງໆ ແລ້ວໄປວາງໄວ້ຈຸດທີ່ມີຍຸງຫຼາຍ ເທົ່ານີ້ຍຸງກໍ່ບໍ່ມາໃກ້ແລ້ວ

ແນວໃດກໍ່ຕາມ, ນອກຈາກຈະປູກສະໝຸນໄພທັງໝົດນີ້ແລ້ວ ຍັງຕ້ອງພາກັນທຳລ້າຍບ່ອນແຜ່ພັນຂອງຍຸງລາຍ ໂດຍການບໍ່ໃຫ້ມີບ່ອນນໍ້າຂັງ ແລະ ອຶ່ນໆ

LEAVE A REPLY

Please enter your comment!
Please enter your name here