ສະໂມສອນ ດອກປີກໄກ່ ພິຊິດໄຊ ສືບຕໍ່ມຸ້ງໝັ້ນເອົາໃຈໃສ່ຕໍ່ການສົ່ງເສີມການພັດທະນານັກກິລາຮຸ່ນສືບທອດ ຫວັງປັ້ນດາວດວງໃໝ່ເພື່ອກ້າວສູ່ທີມຊາດ ພາຍຫຼັງທີ່ໄດ້ມີການສ້າງຕັ້ງສະໂມສອນ ດັ່ງກ່າວ ຕະຫຼອດໄລຍະ 5 ປີ ຜ່ານມາ (2015-2020) ສາມາດສ້າງນັກກິລາຮຸ່ນເຍົາວະຊົນ ປັ້ນໃຫ້ທີມຊາດລາວເຖິງຫຼາຍຮຸ່ນ.

ເມື່ອບໍ່ດົນມານີ້, ທ່ານ ແກ້ວພູໄທ ບົວສີ ປະທານສະໂມສອນ ດອກປີກໄກ່ ພິຊິດໄຊ ໃຫ້ສໍາພາດ ວ່າ: ສະໂມສອນ ພິຊິດໄຊ ຂອງພວກເຮົາຈະເລີ່ມເປີດໃຫ້ບໍລິການ ແລະ ສືບຕໍ່ພັດທະນານັກກິລາດອກປີກໄກ່ລາວ ເປັນປົກກະຕິອິກຄັ້ງ ນັບຕັ້ງແຕ່ວັນທີ 1 ມິຖຸນາ 2020 ເປັນຕົ້ນໄປ ຫຼັງຈາກທີ່ກ່ອນໜ້ານີ້ໄດ້ປິດການບໍລິການຊົ່ວຄາວ ເນື່ອງຈາກໄດ້ຮັບຜົນກະທົບຈາກການລະບາດຂອງພະຍາດອັກເສບປອດສາຍພັນໃໝ່ ໂຄວິດ-19 ແຜ່ລະບາດໜັກໃນທົ່ວໂລກ ໂດຍສະເພາະ ສປປ ລາວ ເຮົາກໍໄດ້ຮັບຜົນກະທົບເຊັ່ນກັນ ຊຶ່ງສະໂມສອນ ດອກປີກໄກ່ ພິຊິດໄຊ ພວກເຮົາແມ່ນເລີ່ມເປີດໃຫ້ໃຊ້ບໍລິການນັບຕັ້ງແຕ່ປີ 2015 ເປັນຕົ້ນມາ ເພື່ອເປັນອີກຊ່ອງທາງໜຶ່ງໃນການພັດທະນານັກກິລາເຍົາວະຊົນ ລວມເຖິງບຸກຄົນທົ່ວໄປກໍສາມາດຫຼິ້ນໄດ້ ເພື່ອເປັນການອອກກໍາລັງກາຍ ທັງໃຊ້ເວລາຫວ່າງໃຫ້ເປັນປະໂຫຍດ ແລະ ຫ່າງໄກຈາກສິ່ງເສບຕິດຕ່າງໆ ທັງນີ້, ທັງນັ້ນ ກໍເພື່ອເປັນການສົ່ງເສີມສ້າງຂະບວນການແຂ່ງຂັນກິລາດອກປີກໄກ່ ໃຫ້ມີການແຂ່ງຂັນຢ່າງຟົດຟື້ນ ແລະ ຕໍ່ເນື່ອງ ເພື່ອຕໍ່ຍອດໃນການສ້າງນັກກິລາຮຸ່ນສືບທອດສົ່ງໄປແຂ່ງຂັນທັງພາຍໃນ ແລະ ຕ່າງປະເທດອີກດ້ວຍ, ເຊິ່ງໄລຍະທີ່ຜ່ານມາສະໂມສອນຂອງພວກເຮົາໄດ້ປັ້ນນັກກິລາຂຶ້ນຕິດທີມຊາດໄດ້ເຖິງ 10 ຄົນແລ້ວ, ສ່ວນຜົນງານທີ່ຜ່ານມາເຄີຍເຂົ້າຮ່ວມການແຂ່ງຂັນນາໆຊາດ ໂດຍສະເພາະລາຍການ ອິນເຕີເນຊັນແນວຊີຣີ ສາມາດຜ່ານເຂົ້າຮອບ 8 ທີມສຸດທ້າຍ, ສ່ວນລາຍ ການພາຍໃນປະເທດກໍເຄີຍສ້າງຜົນງານໂດດເດັ່ນຫຼາຍໆລາຍການເຊັ່ນກັນ.

   ທ່ານປະທານສະໂມສອນ ດອກປີກໄກ່ ພິຊິດໄຊ ກ່າວຕື່ມອີກວ່າ: ເປົ້າໝາຍຕໍ່ໄປຂອງສະໂມສອນ ແມ່ນຈະສືບຕໍ່ສ້າງນັກກິລາຫຼາຍຮຸ່ນ ເພື່ອກຽມເປັນສ່ວນໜຶ່ງສົ່ງເສີມນັກກິລາເພື່ອເປັນຕົວແທນໃຫ້ແກ່ພາກສ່ວນອື່ນໆ ກຽມເຂົ້າຮ່ວມຊຽງຂວາງເກມ ພ້ອມທັງປັ້ນເຂົາເຈົ້າກ້າວສູ່ທີມຊາດ, ເຊິ່ງໃນປັດຈຸບັນມີນັກກິລາສັງກັດສະໂມສອນທັງຮຸ່ນເຍົາວະຊົນ ແລະ ຊາວໜຸ່ມເຖິງ 20 ກວ່າຄົນ.

 ຊຶ່ງທຸກຄົນແມ່ນມີຄວາມສາມາດຕິດລະດັບແຖວໜ້າຂອງລາວພ້ອມທັງເປັນສ່ວນໜຶ່ງໃນການພັດທະນານັກກິລານ້ອງໃໝ່ຂຶ້ນມາອີກຈຳນວນຫຼວງຫຼາຍ ເພື່ອເປັນການທົດແທນໃນອະນາຄົດ ນອກຈາກຈະເນັ້ນການເອົາໃຈໃສ່ຕໍ່ການພັດທະນານັກກິລາແລ້ວ ທາງສະໂມສອນຂອງພວກເຮົາກໍຍັງໄດ້ເປີດບໍລິການໃຫ້ກັບບຸກຄົນທົ່ວໄປທີ່ຕ້ອງການມາໃຊ້ບໍລິການໄດ້ທຸກໆມື້ອີກດ້ວຍ.

   ຂະນະດຽວກັນ ທ້າວ ໂຊກນໍາພາ ບໍລິວົງ ອະດີດນັກກິລາທີມຊາດລາວ ແລະ ທັງເປັນຄູຝຶກປະຈໍາສະໂມສອນ ພິຊິດໄຊ ກ່າວວ່າ: ເປັນເວລາດົນນານພໍສົມຄວນທີ່ຕົນໄດ້ຮ່ວມຊີວິດທຸກສຸກໃນການຫຼິ້ນໃຫ້ ສະໂມສອນດັ່ງກ່າວ ຜ່ານຜ່າອຸປະສັກຕ່າງໆ ມາສົ່ງຜົນໃຫ້ນັກກິລາທຸກຄົນມີການພັດທະນາ, ມີຄວາມສາມັກຄີຮັກແພງ ແລະ ມີຄວາມຜູກພັນກັນຄືຄອບຄົວໜຶ່ງ ກ່ອນຕົວນ້ອງເອງຈະພັດທະນາກ້າວຂຶ້ນມາເປັນຄູຝຶກ ພ້ອມທັງໄດ້ຝຶກສອນ ແລະ ພັດທະນານ້ອງເຍົາວະຊົນຢ່າງເຕີບໃຫຍ່ຂະຫຍາຍຕົວກວ້າງຂວາງ ກໍຍ້ອນຄວາມເອົາໃຈໃສ່ຂອງປະທານສະໂມສອນ ທີ່ໄດ້ເສຍສະຫຼະ ແລະ ທຸ້ມເທແຮງກາຍ ແລະ ງົບ ປະມານເຮັດໃຫ້ພວກເຮົາທຸກຄົນກ້າວມາເຖິງຈຸດນີ້ ແລະ ຂໍໃຫ້ຄຳໝັ້ນວ່າ ຈະສືບຕໍ່ຝຶກຝົນຕົວເອງ ພ້ອມທັງຖ່າຍທອດຄວາມຮູ້ຄວາມສາມາດ ແລະ ປະສົບການທີ່ຜ່ານມາ ສ້າງນ້ອງນ້ອຍເຍົາວະຊົນ ກ່້າວສູ່ທີມຊາດເໝືອນດັ່ງຕົວເອງເຄີຍຮັບໃຊ້ຊາດໃນເມື່ອກ່ອນ.

ທີ່ມາ: ໜັງສືພຶມ ສຶກສາ-ກິລາລາຍວັນ

LEAVE A REPLY

Please enter your comment!
Please enter your name here