ຄະນະກັມມະການຮັບຜິດຊອບ ງານຖວາຍພຣະເພີງ (ຊາປະນະກິດ) ລະດັບຊາດ ພຣະສະຣີຣະສັງຂານ (ພຣະສົບ) ຂອງອົງພຣະຍອດແກ້ວມະຫາງອນ ດຳຣົງບຸນມະຫາເຖຣະເຈົ້າ ໄດ້ແຈ້ງຂ່າວກ່ຽວ ກັບກໍານົດການ ວັນຖວາຍພຣະເພີງ ພຣະສະຣີຣະສັງຂານ ແລະ ພິທີທາງການ ມາຍັງການຈັດຕັ້ງທຸກຂັ້ນ ພຣະສົງ-ສາມະເນນ ອຸປາສົກ-ອຸປາສິກາ ແລະ ພຸດທະສາສະນິກະຊົນລາວບັນດາເຜົ່າ ຢູ່ທັງພາຍໃນ ແລະຕ່າງປະເທດ ໄດ້ຊາບທົ່ວເຖິງກັນວ່າ: ອົງພຣະຍອດແກ້ວມະຫາງອນ ດໍາຣົງບຸນມະຫາເຖຣະເຈົ້າ ປະທານສູນກາງອົງການພຸດທະສາສະໜາສັມພັນແຫ່ງ ສປປ ລາວ ໄດ້ລະສັງຂານ ໃນວັນທີ 24 ມີນາ 2020 (ພຣະພຸດທະສັງກາດ 2562) ເວລາ 7:30 ໂມງ ລວມສິຣິອາຍຸໄດ້ 91 ປີ 91 ວັນ ແລະ ວັດສາຍຸການ 71 ພັນສາ.

 ປັດຈຸບັນ ພຣະສະຣີຣະສັງຂານ (ພຣະສົບ) ຂອງອົງພຣະຍອດແກ້ວ ໄດ້ປະດິດສະຖານໄວ້ທີ່ ຫໍທັມມະສະພາ ຊັ້ນ 2 ວັດພຣະທາດຫຼວງເໜືອ ເມືອງໄຊເຊດຖາ ນະຄອນຫຼວງວຽງຈັນ ເພື່ອບຳເພັນທັກຂິນານຸປາທານ ແລະ ໃຫ້ພຣະສົງ-ສາມະເນນ ພຸດທະສາສະນິກະຊົນທັງຫຼາຍ ໄດ້ຂາບໄຫວ້ ສັກກາຣະບູຊາ ກະທຳກະຕະເວທິຕາການ.

ກຳນົດການ ວັນຖວາຍພຣະເພີງພຣະສະຣີຣະສັງຂານ (ເຜົາພຣະສົບ) ແມ່ນຈະໄດ້ຈັດຂຶ້ນ ໃນ ວັນສຸກ ວັນທີ 26 ມິຖຸນາ 2020 ຢູ່ທີ່ ເດີ່ນພຣະທາດຫຼວງ ເມືອງໄຊເຊດຖາ ນະຄອນຫຼວງວຽງຈັນ ເຊິ່ງ ມີລາຍລະອຽດ ດັ່ງນີ້:

  •  ເວລາ 13:00 ໂມງ ເຄື່ອນພຣະສະຣີຣະສັງຂານ (ພຣະສົບ) ຂອງອົງພຣະຍອດແກ້ວ ອອກຈາກ ຫໍທັມມະສະພາ ສູ່ພຣະເມຣຸມາດຈິຕະກາທານ (ເມນ) ທີ່ເດີ່ນພຣະທາດຫຼວງ
  • ເວລາ 14:00 ໂມງ ພິທີທາງການ ແລະ ສາສະນະພິທີ ຕາມວາລະ
  • ເວລາ 20:00 ໂມງ ພິທີຖວາຍດອກໄມ້ທູບທຽນ ແລະຖວາຍພຣະເພີງ

 ວັນເສົາ ວັນທີ 27/6/2020 ເປັນມື້ບັນຈຸພຣະອັດຖິທາດ (ເກັບດູກ) ແລະບໍາເພັນບຸນກຸສົນ ສູດປະຣິດຕະມຸງຄຸນ ຖວາຍທານ ຢູ່ທີ່ ຫໍທັມມະສະພາ ຊັ້ນ 2

ວັນອາທິດ ວັນທີ 28/6/2020 ເວລາ 7:00 ໂມງ ພິທີຕັກບາດ-ຖວາຍມະຫາທານ ແລະເຄື່ອງໄທຍະທານທັງຫຼາຍ ແດ່ພຣະສົງໝູ່ໃຫຍ່ 108 ອົງ.

 ດັ່ງນັ້ນ, ຈຶ່ງແຈ້ງຂ່າວມາຍັງການຈັດຕັ້ງພັກ-ລັດ, ເອກະຊົນ ແລະບຸກຄົນ-ນິຕິບຸກຄົນ ເພື່ອຊາບ ໂດຍທົ່ວເຖິງກັນ ແລະຖ້າຫາກທ່ານໃດ ມີຄວາມປະສົງຈະໄປເຂົ້າ ຂາບຄາຣະວະສັກກາຣະບູຊາ ພຣະ ສະຣີຣະສັງຂານ (ເຄົາຣົບພຣະສົບ), ເຂົ້າຮ່ວມພິທີບໍາເພັນພຣະກຸສົນທັກຂິນານຸປາທານ ຕັກບາດໃນທຸກໆ ເຊົ້າຂອງວັນເສົາ ແລະຮ່ວມເປັນເຈົ້າພາບເຈົ້າສັດທາ ຖວາຍຈະຕຸປັດໄຈ ຫຼືປະກອບສ່ວນຖວາຍທານໃນພິທີດັ່ງກ່າວ ແມ່ນສາມາດໄປໄດ້ທຸກໆວັນ.

 ສ່ວນການເຂົ້າຮ່ວມພິທີນັ້ນ ຕ້ອງໄດ້ປະຕິບັດຕາມຄໍາສັ່ງເລກທີ 06/ນຍ ແລະຄໍາແນະນໍາຂອງຄະນະສະເພາະກິດ ກ່ຽວກັບມາດຕະການຕ້ານເຊື້ອພະຍາດໂຄວິດ-19 ຢ່າງເຄັ່ງຄັດ.

ໝາຍເຫດ: ສໍາຫຼັບການວາງພວງມາລານັ້ນ ແມ່ນແນະນໍາໃຫ້ເຮັດເປັນຕົ້ນກາລະພຶກມາລາ (ຕົ້ນເງິນ) ໃຊ້ແທນພວງມາລາ ເພື່ອໃຫ້ສອດຄ່ອງກັບຮີດຄອງປະເພນີນິຍົມຂອງລາວເຮົາ.

ກໍານົດເວລາ ແລະລະບຽບການເຂົ້າຄາຣະວະພຣະສະຣີຣະສັງຂານ

ຕັ້ງແຕ່ເວລາ 7:00 ໂມງ-21:00 ໂມງ ເລີ່ມ ແຕ່ວັນທີ 1-25/06/2020. ແຕ່ງສຸພາບ ຕາມປະເພນີນິຍົມ (ນຸ່ງຊຸດຂາວ ຫຼື ໂສ້ງ, ສິ້ນຂາວ ເສື້ອຂາວ) ຕາມວັດທະນະທໍາອັນດີງານຂອງລາວເຮົາ;

ຕິດຕໍ່ສອບຖາມລາຍລະອຽດ: ຫ້ອງການບໍລິຫານງານສູນກາງ ອພສ: 020 95925635, 22228443, 55777352, 55454669 ແລະ ກົມສາສະໜາ ສນຊ: 020 55212277, 55699874

LEAVE A REPLY

Please enter your comment!
Please enter your name here