ລັດຖະບານໄດ້ສຸມໃສ່ຈັດຕັ້ງປະຕິບັດມາດຕະການຕ່າງໆເພື່ອສະກັດກັ້ນ, ຄວບຄຸມ ແລະ ແກ້ໄຂ ການລະບາດຂອງພະຍາດດັ່ງກ່າວ ຈົນມາຮອດວັນທີ 31 ພຶດສະພາ 2020 ໄດ້ນໍາໃຊ້ງົບປະມານບ້ວງແຮສຸກເສີນທັງໝົດ 30 ຕື້ກີບ 

ຈາກການຖະແຫຼງປະຈຳວັນຂອງຄະນະສະເພາະກິດ ວັນທີ 1 ມິຖຸນາ 2020 ທ່ານ ບຸນໂຈມ ອຸບົນປະເສີດ ຮອງລັດຖະມົນຕີ ກະຊວງການເງິນ ໄດ້ອອກມາຊີ້ແຈງລາຍລະອຽດລາຍຈ່າຍຕ່າງໆຂອງບ້ວງເງິນດັ່ງກ່າວ ໃຫ້ສັງຄົມໄດ້ຮັບຮູ້ຢ່າງໂປ່ງໃສ.

ທ່ານ ບຸນໂຈມ ອຸບົນປະເສີດ ຮອງລັດຖະມົນຕີ ກະຊວງການເງິນ ໄດ້ລາຍງານໃຫ້ຮູ້ເຖິງການຈັດຕັ້ງປະຕິບັດງົບປະມານບ້ວງແຮສຸກເສີນຂອງລັດຖະບານ ບ້ວງ 30 ຕື້ກີບ,​ ໃນການຖະແຫຼງຂ່າວຂອງຄະນະສະເພາະກິດ ປະຈຳວັນທີ 1 ມິຖຸນາ 2020 ວ່າ: ລັດຖະບານອະນຸມັດເງິນແຮສຸກເສີນຄັ້ງທີ 1 ຈໍານວນ 10 ຕື້ກີບ ໂດຍນໍາໃຊ້ເຂົ້າໃນການຈັດຊື້ອຸປະກອນການແພດ, ໜ້າກາກອະນາໄມ (ຜ້າອັດປາກ-ດັງ), ເຄື່ອງເຄມີ, ເຈວລ້າງມື, ຄ່າຫຸ້ມຫໍ່ ແລະ ການຈັດສົ່ງອຸປະກອນການແພດ ຈໍານວນ 6,64 ຕື້ກີບ ເພື່ອຮັບໃຊ້ໃນວຽກງານສາທາລະນະສຸກ. ຈ່າຍລ່ວງໜ້າໃຫ້ກະຊວງສາທາລະນະສຸກ ເພື່ອເບີກຈ່າຍວຽກງານຈໍາເປັນ ແລະ ຮີບດ່ວນ ຈໍານວນ 100 ລ້ານກີບ ເຮັດໃຫ້ຍອດເຫຼືອຈໍານວນເງິນອະນຸມັດຄັ້ງທີ 1 ຈໍານວນ 3,25 ຕື້ກີບ.

ນອກຈາກນີ້ແລ້ວ,​ ລັດຖະບານຍັງໄດ້ອະນຸມັດເງິນແຮສຸກເສີນຄັ້ງທີ 2 ຈໍານວນ 20 ຕື້ກີບ ໂດຍໃຊ້ຈ່າຍລະອຽດດັ່ງນີ້ ຈ່າຍຄັ້ງທີ 1 ໃຫ້ນະຄອນຫຼວງວຽງຈັນ ແລະ ບັນດາແຂວງໃນທົ່ວປະເທດ ຈໍານວນ 9 ຕື້ກີບ (ແຂວງລະ 500 ລ້ານກີບ), ຈ່າຍໃຫ້ກະຊວງປ້ອງກັນຄວາມສະຫງົບ ຈໍານວນ 500 ລ້ານກີບ; ຈ່າຍຄັ້ງທີ 2 ໃຫ້ນະຄອນຫຼວງວຽງຈັນ ແລະ ບັນດາແຂວງໃນຂອບເຂດທົ່ວປະເດທ 6,9 ຕື້ກີບ, ຈ່າຍຊ່ວຍໜູນໃຫ້ນັກສຶກສາລາວຢູ່ເມືອງອູຮັ່ນ (ສປ ຈີນ) ຈໍານວນ 154 ລ້ານກີບ, ຈ່າຍຮັບໃຊ້ຊ່ຽວຊານແພດຈີນ ໄປເຄື່ອນໄຫວວຽກຢູ່ທ້ອງຖິ່ນ ຈໍານວນ 10 ລ້ານກີບ. ຍອດເຫຼືອຈາກການອະນຸມັດຄັ້ງທີ 2 ຈໍານວນ 3,4 ຕື້ກີບ, ລວມແລ້ວຍອດຍັງເຫຼືອທັງໝົດຈາກການອະນຸມັດງົບປະມານທັງຄັ້ງທີ 1 ແລະ ຄັ້ງທີ 2 (10 ຕື້ກີບ + 20 ຕື້ກີບ -23,38 ຕື້ກີບ) = ຈໍານວນ 6,66 ຕື້ກີບ.

ຂໍ້ມູນ ແລະ ຮູບພາບ: ເສດຖະກີດ-ການຄ້າ

LEAVE A REPLY

Please enter your comment!
Please enter your name here