ເນື່ອງຈາກວັນທີ 1 ມິຖຸນາ ຂອງທຸກໆປີ ແມ່ນວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ,​ ເຊິ່ງທັງສອງວັນ ລວດແຕ່ແມ່ນວັນສຳຄັນທັງສອງ,​ ໂດຍທຸກໆປີຕາມສະຖານທີ່ຕ່າງໆ ແມ່ນຈະໄດ້ມີການຈັດກິດຈະກຳງານວັນເດັກນ້ອຍສາກົນຂຶ້ນຢ່າງມ່ວນຊື່ນ ແລະ ຕາມຫ້ອງການຕ່າງໆ ກໍ່ຈະໄດ້ຈັດພິທີປູກຕົ້ນໄມ້ຂຶ້ນເຊັ່ນກັນ.​ ແຕ່ເນື່ອງຈາກປີນີ້, ສະຖານະການ ການລະບາດຂອງພະຍາດໂຄວິດ-19 ກໍາລັງລະບາດໃນຫຼາຍປະເທດທົ່ວໂລກ ເຖິງວ່າສະຖານະການໃນ ສປປ ລາວ ເຮົາຈະຜ່ອນຄາຍລົງ ແຕ່ທາງຄະນະສະເພາະກິດໄດ້ມີການໃຫ້ຈັດງານປູກຕົ້ນໄມ້ແບບເໝາະສົມເທົ່ານັ້ນ.

ສະນັ້ນ, ການສະເຫຼີມສະຫຼອງ 2 ວັນສໍາຄັນນີ້ໃຫ້ປອດໄພຈາກພະຍາດຮ້າຍນີ້ ກໍ່ຕ້ອງແມ່ນການສອນລູກສອນຫຼານປູກຕົ້ນໄມ້ຢູ່ເຮືອນ,​ ໂດຍມື້ນີ້ ອິນໄຊລາວ ໄດ້ນຳເອົາຕົ້ນໄມ້ ທີ່ປູກງ່າຍໆ ທີ່ເດັກນ້ອຍກໍ່ສາມາດປູກໄດ້ມາແນະນຳ

ຕົ້ນດອກອັນຊັນ ເປັນຕົ້ນໄມ້ເລື້ອຍ ທີ່ປູກງ່າຍ ທົນແດດ ທົນຝົນ ແລະ ບໍ່ຈໍາເປັນຕ້ອງໄດ້ເບິ່ງແຍງຫຼາຍ, ສາມາດໃຫ້ດອກໄວ ແລະ ດອກອັນຊັນເຮົາຍັງສາມາດເອົາຕົ້ມນໍ້າກິນ ມີສັບພະຄຸນເປັນຢາເຢັນ ຊ່ວຍຫຼຸດອາການຊໍ້າໃນ ບໍາລຸງປະສາດ ຫຼຸດຄວາມຄຽດ ແລະ ອຶ່ນໆອີກຫຼວງຫຼາຍ

ຕົ້ນວາດສະໜາ ເປັນຕົ້ນໄມ້ທີ່ບໍ່ຕ້ອງການນໍ້າຫຼາຍປານໃດ ທົນກັບສະພາບອາກາດໄດ້ດີ ມີກິ່ນຫອມອ່ອນໆ ແລະ ຍັງເປັນຕົ້ນໄມ້ມຸງຄຸນ ເພາະເຊື້ອກັນວ່າ ຜູ້ປູກຈະວາດສະໜາດີ ມີໂຊກມີໄຊ, ນອກຈາກນີ້ ຖ້າປູກໃສ່ເຕົ້າປະດັບພາຍໃນເຮືອນ ຈະຊ່ວຍໃຫ້ເບິ່ງເຢັນຕາ ແລະ ຍັງຊ່ວຍດູດສານພິດໃນກຸ່ມຟໍມາດີໄຣ

ຕົ້ນດອກດາວເຮືອງ ດອກໄມ້ສີເຫຼືອງງາມຕາ ສາມາດປູກໄວ້ຕາມໜ້າບ້ານ  ຫຼື ປູກໄວ້ເຕົ້າປະດັບເຮືອນກໍ່ໄດ້ ເປັນຕົ້ນດອກໄມ້ທີ່ປູກງ່າຍ ສາມາດເຕີບໃຫ່ຍໄດ້ທຸກສະພາບດິນ, ນອກຈາກນີ້ ຄົນລາວເຮົາຍັງສາມາດນຳດອກດາວເຮືອງມາແຕ່ງຂັ້ນຫ້າບູຊາ ໃນວັນສິນໄດ້ອີກດ້ວຍ

ຕົ້ນຜູ້ ເປັນຕົ້ນໄມ້ປະດັບທີ່ສາມາດສ້າງຄວາມແຕກຕ່າງໃຫ້ກັບສວນໜ້າບ້ານໄດ້ ເນື່ອງຈາກເປັນຕົ້ນໄມ້ທີ່ມີສີສັນງາມຕາ ມີລັກສະນະເປັນພຸ່ມ ແລະ ສົ່ງກິ່ນຫອມໃນຕອນກາງຄືນ

LEAVE A REPLY

Please enter your comment!
Please enter your name here