ວັນທີ 28 ພຶດສະພາ 2020 ທີ່ຜ່ານມານີ້, ທ່ານ ພົຕ ຄຳລຽງ ອຸທະໄກສອນ ເຈົ້າແຂວງໄຊສົມບູນ ລົງຊຸກຍູ້ວຽກງານກະສິກໍາ ປູກຝັງ-ລ້ຽງສັດ ຢູ່ສູນສົ່ງເສີມການລ້ຽງແກະ ໂດຍມີທ່ານ ສົມບູນ ສອນລິດທິເດດ, ຫົວໜ້າຫ້ອງວ່າການແຂວງ ແລະ ທ່ານ ລູຊີ ຢໍ່ລໍເຍັຍລົງ, ຫົວໜ້າພະແນກກະສິກຳ ແລະ ປ່າໄມ້ແຂວງ ພ້ອມດ້ວຍພະນັກງານສູນສົ່ງເສີມການລ້ຽງແກະ ເຂົ້າຮ່ວມ.

ໂອກາດນີ້ ທ່ານ ເຈົ້າແຂວງໄດ້ຮັບຟັງການລາຍງານ ສະພາບລວມຂອງສູນສົ່ງເສີມການລ້ຽງແກະໂດຍຫຍໍ້ ຈາກຫົວໜ້າສູນ ເຊິ່ງສູນດັ່ງກ່າວນີ້, ໄດ້ສ້າງຕັ້ງຂື້ນ ໃນປີ 2015 ເປັນທຶນຂອງລັດ 100% ໂດຍໄດ້ຮັບການຊ່ວຍເຫລືອຈາກອະດີດປະທານ ປະເທດ ທ່ານ ຈູມມະລີ ໄຊຍະສອນ, ທຳອິດແມ່ນມີແກະ 48 ໂຕ, ຂະແໜງລ້ຽງສັດ ແລະ ການປະມົງ ເປັນຜູ່ຮັບຜິດຊອບ ຫ່າງຈາກເທດສະບານແຂວງ ປະມານ 2 ກິໂລແມັດ, ມີເນື້ອທີ່ທັງໝົດ 38,38 ເຮັກຕ້າ, ໄດ້ແບ່ງໃຫ້ບໍລິສັດເກົາຫລີສຳປະທານ 10,5 ເຮັກຕ້າ, ເນື້ອທີ່ສູນຍັງເຫລືອທັງໝົດ 27,88 ເຮັກຕ້າ, ປູກຫຍ້າພັນປັບປຸງ 3,5 ເຮັກຕ້າ, ປູກຊາໝ້ຽງຕົ້ມນ້ຳ ປະມານ 3 ເຮັກຕ້າ, ທົ່ງຫຍ້າທຳມະຊາດທັງໝົດ 21,08 ເຮັກຕ້າ ໄດ້ນໍາໃຊ້ພຽງ 5 ເຮັກຕ້າ ມາຮອດປັດຈຸບັນນີ້ ພາຍໃນສູນມີສັດລ້ຽງທັງໝົດ 93 ໂຕ, ມີແກະ 75 ໂຕ, ງົວ 6 ໂຕ ແລະ ແບ້ 12 ໂຕ.

ນອກຈາກນີ້, ທ່ານເຈົ້າແຂວງມີຄໍາເຫັນຊີ້ນໍາ ເຊິ່ງທ່ານໄດ້ເນັ້ນໜັກ ໃຫ້ພະແນກກະສິກໍາ ແລະ ປ່າໄມ້ ແຂວງ ກໍຄືພະນັກງານພາຍໃນສູນສົ່ງເສີມການລ້ຽງແກະ ຈົ່ງພ້ອມກັນເປັນເຈົ້າການສູງ ໃນການເບິ່ງແຍງ-ດູແລສັດລ້ຽງ ໃຫ້ມີສຸຂະພາບແຂງແຮງ, ນຳໃຊ້ເຕັກນິກວິຊາການ ເຂົ້າໃນການລ້ຽງ, ການເບິ່ງແຍງຮັກສາ ແລະ ການໃຫ້ອາຫານ ໃຫ້ຖືກວິທີ. ຈາກນັ້ນ ທ່ານເຈົ້າແຂວງພ້ອມດ້ວຍຄະນະ ກໍໄດ້ທ່ຽວຊົມເບິ່ງໂຮງເຮືອນລ້ຽງສັດ, ເບິ່ງການປະສົມອາຫານໃຫ້ສັດລ້ຽງ  ງົວ, ແບ້ ແລະ ແກະ ພ້ອມນີ້ ທ່ານຍັງໄດ້ທ່ຽວຊົມເບິ່ງເນື້ອທີ່ສູນບາງບ່ອນ ທີ່ພວມກະກຽມປູກຫຍ້າ, ທ່ຽວຊົມເບິ່ງສວນຊາໝ້ຽງຕົ້ມນໍ້າ ແລະ ເດີ່ນຫຍ້າທຳມະຊາດ ຕື່ມອີກ.

ທີ່ມາ: MediaLaos (ສຸກສັນ ອ້ວນລິທິກຸນ)

LEAVE A REPLY

Please enter your comment!
Please enter your name here