ສຳນັກຂ່າວສານປະເທດລາວ ລາຍງານວ່າ: ໃນວັນທີ 26 ພຶດສະພາ 2020 ທີ່ຜ່ານມາ ພະແນກອຸດສາຫະກຳ ແລະ ການຄ້າ ນະຄອນຫລວງວຽງຈັນ (ນວ) ໄດ້ທໍາລາຍຢາສູບ ແລະ ເຄື່ອງໃນສັດ ທີ່ນຳເຂົ້າບໍ່ຖືກຕ້ອງ ໂດຍໄດ້ຈັດພິທີດັ່ງກ່າວທີ່ ບ້ານນາຫວ້າ ເມືອງທຸລະຄົມ ແຂວງວຽງຈັນ ເປັນກຽດເຂົ້າຮ່ວມ ຂອງ ທ່ານ ນັນຕາ ສານຸວົງ ຮອງຫົວໜ້າພະແນກອຸດສາຫະກຳ ແລະ ການຄ້າ ນະຄອນຫລວງວຽງຈັນ ພ້ອມດ້ວຍພາກສ່ວນທີ່ກ່ຽວຂ້ອງ

ທ່ານ ພູວອນ ພູສະເຫວີຍ ຮອງຂະແໜງການຄ້າພາຍໃນ ພະແນກພະແນກອຸດສາຫະກຳ ແລະ ການຄ້າ ນະຄອນຫລວງວຽງຈັນ ແຈ້ງໃຫ້ຮູ້ວ່າ: ໜ່ວຍງານກວດກາການຄ້າຂັ້ນພະແນກ ແລະ ຈຸງານ ກວດກາຂັ້ນເມືອງ ໄດ້ລົງຕິດຕາມກວດກາສິນຄ້າ ທີ່ລັກລອບນຳເຂົ້ານອກລະບົບ ແຕ່ວັນທີ ວັນທີ 16-25 ພຶດສະພາ ສາມາດຢືດຢາສູບ ຈຳນວນ 30 ແກັດ ແລະ ເຄື່ອງໃນສັດ 11 ແກັດ ນ້ຳໜັກ 500 ກິໂລ ລວມມູນ 136 ລ້ານກວ່າກີບ. ຕໍ່ກັບສິນຄ້າດັ່ງກ່າວ, ໂດຍສະເພາະເຄື່ອງໃນສັດ ພົບວ່າບໍ່ໄດ້ຜ່ານການ ກວດກາຢັ້ງຢືນ ຈາກສັດຕະວະແພດ ຂະແໜງກະສິກຳ ແລະ ປ່າໄມ້, ພ້ອມບໍ່ມີເອກະສານອະນຸຍາດນຳ ເຂົ້າຈາກພາກສ່ວນກ່ຽວຂ້ອງ ຈຶ່ງໄດ້ຢຶດມາທຳລາຍຖິ້ມ.

ໃນໂອກາດນີ້, ທ່ານ ນັນຕາ ສານຸວົງ ກ່າວວ່າ: ຕໍ່ກັບບັນຫາການນຳເຂົ້າສິນຄ້າບໍ່ຖືກຕ້ອງນີ້ ຮຽກຮ້ອງໃຫ້ພໍ່ແມ່ປະຊາຊົນ ຜູ້ປະກອບການທຸລະກິດຄ້າຂາຍ ຈົ່ງເອົາໃຈໃສ່ປະຕິບັດຕາມລະບຽບກົດ ໝາຍວາງອອກ. ພ້ອມທັງຊ່ວຍເປັນຫູເປັນຕາໃຫ້ເຈົ້າໜ້າທີ່ ຫາກພົບເຫັນສິນຄ້ານອກລະບົບ ທີ່ນຳເຂົ້າບໍ່ ຖືກຕ້ອງ, ສິນຄ້າໝົດອາຍຸ ໃຫ້ໂທເຂົ້າສາຍດ່ວນ 1510 ທັນທີ.

ຂໍ້ມູນ ແລະ ຮູບພາບ: ປະເທດລາວ

LEAVE A REPLY

Please enter your comment!
Please enter your name here