ພະແນກສຶກສາທິການ ແລະ ກິລາ ນະຄອນຫຼວງວຽງຈັນ (ນວ) ຮ່ວມກັບຂະແໜງຈັດຕັ້ງ-ພະນັກງານ ເປີດບັນສອບເສັງບັນຈຸລັດຖະກອນຄູໃໝ່ໃນສົກປີ 2020 ເພື່ອຄັດເລືອກເອົາພະນັກງານຄູໄປສິດສອນຢູ່ໃນບ່ອນທີ່ຂາດເຂີນ ແລະ ບໍ່ພຽງພໍກັບຄວາມຕ້ອງການຢູ່ໃນໂຮງຮຽນແຫ່ງຕ່າງໆ.

ພິທີເປີດບັນສອບເສັງບັນຈຸລັດຖະກອນຄູໃໝ່ ປະຈໍາສົກປີ 2020 ໄດ້ມີຂຶ້ນໃນວັນເສົາ 23 ພຶດສະພາ ຜ່ານມາ ທີ່ໂຮງຮຽນ ມສ ວຽງຈັນ, ໂດຍການເປັນປະທານຂອງທ່ານ ສົມພອນ ສອນດາລາ ວ່າການແທນຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ, ທ່ານ ອຸ່ນຄຳ ອວນສະຫວັນ ຮອງຫົວໜ້າກົມຈັດຕັ້ງ ແລະ ພະນັກງານ ກະຊວງສຶກສາທິການ ແລະ ກິລາ, ທ່ານ ກາບແກ້ວ ນາມມະຈັກ ຮອງຫົວໜ້າພະແນກພາຍໃນ ນະຄອນຫຼວງວຽງຈັນ, ມີຄະນະພະແນກສຶກສາທິການ ແລະ ກິລາ ນະຄອນຫຼວງວຽງຈັນ, ຫົວໜ້າຫ້ອງການສຶກສາທິການ ແລະ ກິລາ 9 ເມືອງ, ຫົວໜ້າຂະແໜງ, ຄະນະກຳມະການສອບເສັງ, ອະນຸກຳມະການຍາມຫ້ອງສອບເສັງ, ພະນັກງານຄູອາຈານ, ວິຊາການ ແລະ ນັກສອບເສັງລັດຖະກອນຄູໃໝ່ເຂົ້າຮ່ວມ.

ສໍາລັບການສອບເສັງໃນຄັ້ງນີ້, ມີນັກສອບເສັງບັນຈຸລັດຖະກອນຄູ ແລະ ບໍລິຫານໃໝ່ ໃນສົກປີ 2020 ທັງໝົດ 993 ຄົນ, ຍິງ 741 ຄົນ ໂດຍແບ່ງອອກເປັນ 5 ສູນສອບເສັງ ຄື: ສູນ ມສ ວຽງຈັນ ມີຈຳນວນນັກສອບເສັງ 262 ຄົນ, ສອບເສັງສາຍວິຊາຟີຊິກສາດ, ພູມສາດ, ພາສາລາວ-ວັນນະຄະດີ, ປະຫວັດສາດ, ຊີວະສາດ, ຄະນິດສາດ ແລະ ເຄມີສາດ ສຳລັບຊັ້ນມັນທະຍົມສຶກສາຕອນປາຍ; ສູນ ມສ ລາວ-ຫວຽດນາມ ມີຈຳນວນນັກສອບເສັງ 212 ຄົນ ສອບເສັງສາຍວິຊາຄູປະຖົມສຶກສາ; ສູນ ມສ ໂພນທັນ ມີນັກສອບເສັງ 119 ຄົນ ສອບເສັງສາຍວິຊາສຶກສາພົນລະເມືອງ, ສິລະປະດົນຕີ, ສິລະປະກຳ, ໄອທີ, ພາສາອັງກິດ ມ ປາຍ ແລະ ຫຼັກການບໍລິຫານ; ສູນ ມສ ເຈົ້າອານຸວົງ ມີນັກສອບເສັງ 181 ຄົນ, ສອບເສັງສາຍວິຊາ ວິທະຍາສາດທຳມະຊາດ, ວິທະຍາສາດສັງຄົມ, ພະລະສຶກສາ, ພາສາລາວ-ວັນນະຄະດີ, ພາສາອັງກິດ ແລະ ຄະນິດສາດສຳລັບມັດທະຍົມສຶກສາຕອນຕົ້ນ ແລະ ສູນ ມ ປາຍ ມິດຕະພາບວຽງຈັນ-ໂຮ່ຈີ່ມິນ ມີນັກສອບເສັງ 219 ຄົນ ສອບເສັງສາຍວິຊາ ຄູປະຖົມ.

ສຳລັບແຕ່ລະສູນຫ້ອງສອບເສັງ ຫ້ອງໝຶ່ງບັນຈຸ 12-15 ຄົນ, ມີອະນຸກຳມະການຍາມຫ້ອງສອບເສັງຫ້ອງລະ 2 ທ່ານ, ມີການຮັກສາໄລຍະຫ່າງ 1 ແມັດ, ມີແພດ ແລະ ທ່ານໝໍ ປະຈຳຢູ່ໃນແຕ່ລະສູນ, ກ່ອນຈະເຂົ້າໄປຫ້ອງສອບເສັງແມ່ນໄດ້ວັດແທກອຸຫະພູມ ແລະ ໃສ່ຜ້າອັດປາກຈຶ່ງໃຫ້ເຂົ້າຫ້ອງສອບເສັງ, ການສອບເສັງໃຊ້ເວລາ 1 ຊົ່ວໂມງ 30 ນາທີ.

ທີ່ມາ: ໜັງສືພີມ ສຶກສາ-ກິລາ ລາຍວັນ

LEAVE A REPLY

Please enter your comment!
Please enter your name here