ໃນອາທິດຜ່ານມານີ້ທ່ານ ຄໍາພູນ ແກ້ວມາລາ ຫົວໜ້າພະແນກສຶກສາທິການ ແລະກິລາ ແຂວງອັດຕະປື ໄດ້ລົງຕິດຕາມຊຸກຍູ້ການຮຽນ-ການສອນ ຂອງບັນດາຄູ-ອາຈານ ແລະ ນ້ອງໆນັກຮຽນ ຢູ່ໂຮງຮຽນປະຖົມສຶກສາ ບ້ານກະໂສມ ແລະ ມັດທະຍົມສົມບູນໂພນໄຊສະອາດ, ເພື່ອຕິດຕາມຊຸກຍູ້ການຮຽນການສອນຂອງຄູອາຈານ ແລະ ນັກຮຽນຢູ່ໂຮງຮຽນດັ່ງກ່າວ ໃຫ້ຮັບປະກັນການຈັດຕັ້ງປະຕິບັດມາດຕະການ ສະກັດກັ້ນ,ກັນການລະບາດຂອງພະຍາດໂຄວິດ 19 ຢ່າງເຂັ້ມງວດ.

ທ່ານ ບຸນແຖັດ ຟອງກ່ອງແກ້ວ ຜູ້ອຳນວຍການໂຮງຮຽນ ມ.ປາຍໂພນໄຊ ໄດ້ໃຫ້ຮູ້ວ່າ: ສຳລັບໂຮງຮຽນ ມ.ປາຍໂພນໄຊ ໄດ້ປະຕິບັດມາດຕະການ ສະກັດກັ້ນ, ກັນການລະບາດ, ຄວບຄຸມ ແລະ ກຽມຄວາມພ້ອມ ຮອບດ້ານໃນການຕ້ານພະຍາດໂຄວິດ 19 ຕາມລະຫລັກການທີ່ຄະນະສະເພາະກິດແນະນໍາ ທັງຄະນະຜູ້ບໍລິຫານໂຮງຮຽນ,ຄູ-ອາຈານທຸກຄົນພາຍໃນໂຮງຮຽນ ມີຄວາມສາມັກຄີ ມີຄວາມເປັນເຈົ້າການໃນການປະຕິບັດມາດຕະການຕ້ານ ແລະ ສະກັດກັ້ນເຊື້ອພະຍາດ ໂຄວິດ 19 ແລະ ນ້ອງນັກຮຽນກໍ່ມີຄວາມຕື່ນຕົວສູງ ລວມທັງອຳນາດການປົກຄອງທ້ອງຖິ່ນ,ຜູ້ປົກຄອງນັກຮຽນກໍ່ໃຫ້ການຮ່ວມມືເປັນຢ່າງດີ.

ໃນເບື້ອງຕົ້ນ ໃນການຈັດຊື້ຜ້າອັດປາກ, ແພເຊັດມື ແລະ ອື່ນໆ ແມ່ນນຳໃຊ້ເງິນບໍລິຫານໂຮງຮຽນກ່ອນ ເພື່ອໃຫ້ຖ່ວງທັນກັບເວລາ ເປີດການຮຽນ-ການສອນ ຕາມກຳນົດ ການຈັດສັນນັກຮຽນ ຫ້ອງ 1 ບໍ່ໃຫ້ເກີນ 15 ຄົນ,ໄລຍະຫ່າງການນັ່ງຮຽນຂອງນັກຮຽນບໍ່ຫຸດ 1 ແມັດ. ປັດຈຸບັນ ມ.ປາຍໂພນໄຊ ກໍ່ຄືໂຮງຮຽນຫລາຍໆແຫ່ງຍັງຂາດເຄື່ອງວັດແທກອຸນຫະພູມ ເຄື່ອງມືດັ່ງກ່າວ ຍັງຢູ່ໃນໄລຍະການປະສາສົມທົບກັບຂັ້ນເທິງຢູ່.

ໃນໂອກາດດັ່ງກ່າວ ທ່ານ ຄຳພູນ ແກ້ວມາລາ ຫົວໜ້າພະແນກສຶກສາທິການ ແລະ ກິລາແຂວງ ໄດ້ເນັ້ນໃຫ້ຄະນະຜູ້ບໍລິຫານການສຶກສາ ແລະ ກິລາຂັ້ນໂຮງຮຽນ,ຄູອາຈານ ແລະ ນ້ອງນັກຮຽນ ລວມທັງອຳນາດການປົກຄອງທ້ອງຖິ່ນ ແລະ ພໍ່ແມ່ ແລະ ຜູ້ປົກຄອງນັກຮຽນ ເປັນເຈົ້າການ ໃນການປະຕິບັດມາດຕະການປ້ອງກັນພະຍາດໂຄວິດ 19 ຢ່າງເຂັ້ມງວດ ສ່ວນອຸປະກອນເຄື່ອງມືຕ່າງໆ ທີ່ຈຳເປັນໃຊ້ເຂົ້າໃນການ ຕ້ານພະຍາດໂຄວິດ 19 ທີ່ຍັງບໍ່ທັນພຽງພໍ ແມ່ນໃຫ້ປະສານສົມທົບກັບຂັ້ນເທິງ ຫລືພາກສ່ວນທີ່ກ່ຽວຂ້ອງຢ່າງຮີບດ່ວນ ເພື່ອເຮັດໃຫ້ການຮຽນ-ການສອນ ໄດ້ດຳເນີນໄປຢ່າງມີປະສິດທິພາບສູງ ຕາມທິດຊີ້ນຳຂອງຂັ້ນເທິງວາງອອກ

ທີ່ມາ: ມີເດຍລາວ ອັດຕະປື

LEAVE A REPLY

Please enter your comment!
Please enter your name here